പത്തനംതിട്ട: പോലീസിനെതിരെ ഗുരുതര ആരോപണങ്ങളുമായി നൗഷാദ് തിരോധാന കേസില്‍ പ്രതിയായിരുന്ന അഫ്സാന. തന്റെ പേരിലുള്ള കേസ് പോലീസ് കെട്ടിച്ചമച്ചതാണെന്ന് അഫ്സാന പറഞ്ഞു. പോലീസ് മുന്നാം മുറ ഉപയോഗിച്ചതായും അവര്‍ വ്യക്തമാക്കി.
താന്‍ അങ്ങിനെ ഒരു തെറ്റ് ചെയ്തിട്ടില്ലെന്ന് അഫ്സാന പറഞ്ഞു. ഭര്‍ത്താവിനെ കൊല്ലാന്‍ മാത്രം ക്രൂരയല്ല താന്‍. തനിക്ക് മാനസിക പ്രശ്നങ്ങളുമില്ല. താന്‍ ജീവനുതുല്യം സ്നേഹിച്ച ഭര്‍ത്താവിനെ കൊന്നു എന്ന് പറയാന്‍ ആവശ്യപ്പെട്ടത് പോലീസാണ്. മുകളിലെ കുഴി താനല്ല കാണിച്ച് കൊടുത്തത്. അവരാണ് അവിടെ കുഴിച്ചത്. ഒരു സ്ഥലവും താന്‍ കാണിച്ച് കൊടുത്തില്ല. പോലീസിന്റെ പുറകില്‍ നില്‍ക്കുക മാത്രമാണ് ചെയ്തത്. ഒറ്റയ്ക്ക് ഇത്തരം ഒരു കൃത്യം തനിക്ക് ചെയ്യാന്‍ സാധിക്കില്ലെന്നും അഫ്സാന കൂട്ടിച്ചേര്‍ത്തു.
ഏറ്റവും തലപ്പത്ത് ഇരിക്കുന്ന ഡി.വൈ.എസ്.പിയാണ് തന്നെ മര്‍ദിച്ചത്. പിന്നെ ഫിറോസ് എന്ന് പേരുള്ള വ്യക്തിയും മര്‍ദിച്ചു. മറ്റുള്ളവരുടെ പേരറിയില്ലെങ്കിലും കണ്ടാലറിയാം. യൂണിഫോം ഇട്ടവരും ഇടാത്തവരും തന്നെ മര്‍ദിച്ചു. അവരുടെ ആയുധം കൈകളാണ്. കൈ ചുരുട്ടിയാണ് തന്നെ അവര്‍ അടിച്ചത്. ഒരു ആണിനെ പോലും അവര്‍ ഇങ്ങനെ ഉപദ്രവിക്കില്ല. എന്നാല്‍ തനിക്ക് തന്റെ കുടുംബമാണ് വലുത്. അവരെ എല്ലാവരെയും കേസില്‍ ഉള്‍പ്പെടുത്തുമെന്ന് ഭീഷണിപ്പെടുത്തി. പിതാവിനെ കേസില്‍പ്പെടുത്തുമെന്ന് പറഞ്ഞു. ഈ പ്രശ്നങ്ങള്‍ നടക്കുമ്പോള്‍ പിതാവ് സ്ഥലത്തില്ലെന്നും അഫ്സാന ചൂണ്ടിക്കാട്ടി.
‘ആരും സമ്മതിച്ചുപോകും, അതുപോലുള്ള പീഡനങ്ങളാണ് കിട്ടുന്നത്. പോലീസിന്റെ മൂന്നാംമുറയെന്നൊക്കെ കേട്ടിട്ടേയുള്ളൂ. അവരാണ് പറയുന്നത് ഞാന്‍ കൊന്നു എന്ന്. എന്റെ കുഞ്ഞിനെ ഓര്‍ത്ത് ഞാന്‍ സമ്മതിച്ചു. കുട്ടികള്‍ക്കുള്ള കൗണ്‍സിലിങ് റൂമില്‍ വച്ചാണ് മര്‍ദിച്ചത്. ഞാന്‍ ജയിലില്‍ കയറുന്നത് വരെ ഒരുപാട് സഹിച്ചു. വ്യാഴാഴ്ചയാണ് തെളിവെടുപ്പിന് കൊണ്ടുപോകുന്നത്. ക്യാമറകളൊന്നും ഇല്ലാ എന്ന് പറഞ്ഞാണ് എന്നെ കൊണ്ടുപോകുന്നത്. എന്നാല്‍ അവിടെ വച്ച് ഞാന്‍ കാണുന്നത് ധാരാളം ക്യാമറകളാണ്’, അഫ്സാന പറഞ്ഞു.
നൗഷാദ് ജീവനോടെ ഉണ്ട് എന്നും ഇല്ലാ എന്നും മനസ്സിലുണ്ടായിരുന്നു. പോലീസുകാര്‍ നൗഷാദ് മരിച്ചുവെന്ന് ഉറപ്പിച്ച് പറഞ്ഞു. കേരളത്തില്‍ നൗഷാദ് ഇല്ലെന്നും അവര്‍ പറഞ്ഞു. ഞാന്‍ ജയിലിലായതിന്റെ തൊട്ടടുത്ത ദിവസം നൗഷാദ് പോലീസ് സ്റ്റേഷനിലെത്തി, അഫ്സാന പറഞ്ഞു.
നൗഷാദിന് ഒപ്പം ജീവിക്കാന്‍ തനിക്ക് താത്പര്യമില്ല. ഒരുപാട് സഹിച്ചു. വിവാഹമോചനത്തിനുള്ള നടപടിയുമായി മുന്നോട്ട് പോകും. എന്നാല്‍ അദ്ദേഹം മക്കളെ കാണുന്നതില്‍ തനിക്ക് വിരോധമില്ലെന്നും അഫ്സാന പറഞ്ഞു. വിഷയത്തില്‍ മുഖ്യമന്ത്രിക്കും ഡി.ജി.പിക്കും പരാതി നല്‍കാനാണ് തീരുമാനം. ഒരു സ്ത്രീക്കും ഇതുപോലെ ഒരവസ്ഥ വരാന്‍ പാടില്ല. വിഷയത്തില്‍ കോടതിയേയും സമീപിക്കും. ഈ വിഷയത്തില്‍ നീതി ലഭിക്കുന്നത് വരെ അവര്‍ പോരാടുമെന്നും അഫ്സാന വ്യക്തമാക്കി.
