ആലപ്പുഴ: ആലപ്പുഴയിൽ യുവതിയ്ക്ക് ചെള്ളുപനി സ്ഥിരീകരിച്ചു. 22 വയസ്സുകാരിക്കാണ് രോഗം സ്ഥിരീകരിച്ചത്. രണ്ടാഴ്ചയായി മെഡിക്കൽ കോളജ് ആശുപത്രിയിൽ ചികിത്സയിൽ കഴിയുകയാണ് യുവതി.
കുടുംബത്തോടൊപ്പം മൂന്നാറിൽ യാത്ര പോയി തിരിച്ചെത്തിയ യുവതിക്കു കടുത്ത പനി ബാധിക്കുകയായിരുന്നു. ആശുപത്രിയിൽ പ്രവേശിപ്പിച്ചതിനെ തുടർന്ന് നടത്തിയ പരിശോധനയിലാണ് ചെള്ളുപനി സ്ഥിരീകരിച്ചത്. ഐസിയുവിൽ കഴിയുന്ന യുവതിയുടെ ആരോഗ്യനില മെച്ചപ്പെടുകയാണെന്ന് അധികൃതർ അറിയിച്ചു.
ചെള്ളുപനി എന്നാൽ എന്ത്?
ഓറിയന്ഷ്യ സുസുഗാമുഷി എന്ന ബാക്ടീരിയ മൂലമുണ്ടാകുന്ന പകര്ച്ചവ്യാധിയാണ് ചെള്ളുപനി അഥവാ സ്ക്രബ് ടൈഫസ് എന്നറിയപ്പെടുന്നത്. പ്രധാനമായും എലി, അണ്ണാന്, മുയല് തുടങ്ങിയ ജീവികളിലാണ് ഈ രോഗാണു കാണപ്പെടുന്നത്. ചെറു പ്രാണികളായ ചെള്ളു (മൈറ്റു) കളുടെ ലാര്വ ദശയായ ചിഗ്ഗര് മൈറ്റുകള് വഴിയാണ് മൃഗങ്ങളില് നിന്ന് മനുഷ്യരിലേക്കു രോഗം എത്തുന്നത്.
ചിഗ്ഗര് മൈറ്റ് കടിച്ച് 10 മുതല് 12 ദിവസം കഴിയുമ്പോഴാണ് രോഗലക്ഷണങ്ങള് പ്രകടമാവുക. കടിയേറ്റ ഭാഗം തുടക്കത്തില് ഒരു ചെറിയ ചുവന്ന തടിച്ച പാടായി കാണുകയും പിന്നീട് കറുത്ത വ്രണമായി (എസ്കാര്) മാറുകയും ചെയ്യുന്നു. കക്ഷം, കാലിന്റെ ഒടി, ജനനേന്ദ്രിയങ്ങള്, കഴുത്ത് തുടങ്ങിയ ശരീര ഭാഗങ്ങളിലാണ് സാധാരണയായി ഇത്തരം പാടുകള് കാണപ്പെടുന്നത്.
വിറയലോടുകൂടിയ പനി, തലവേദന, കണ്ണ് ചുവക്കല്, കഴലവീക്കം, പേശീവേദന, വരണ്ട ചുമ എന്നിവയാണ് ചെള്ളുപനിയുടെ പ്രധാന രോഗലക്ഷണങ്ങള്. ചുരുക്കം ചിലരില് തലച്ചോറിനെയും ഹൃദയത്തേയും ബാധിക്കുന്ന തരത്തിലുള്ള സങ്കീര്ണത സംഭവിക്കാറുണ്ട്.
