മലപ്പുറം: കോൺഗ്രസ് നേതാവായ അധ്യാപകനെതിരെ പീഡനപരാതിയുമായി അധ്യാപിക രംഗത്ത്. മലപ്പുറം വള്ളിക്കുന്ന് മൂന്നിയൂർ സ്വദേശി എ വി അക്ബർ അലിക്കെതിരെയാണ് യുവതി പൊലീസിൽ പരാതി നൽകിയത്.
യൂത്ത് കോൺഗ്രസ് നേതാവും കെപിഎസ്ടിഎ ഭാരവാഹിയുമായ അക്ബർ അലി ഇയാളുടെ കുടുംബത്തിന്റെ ഉടമസ്ഥതയിലുള്ള സ്കൂളിൽവെച്ച് പീഡിപ്പിക്കാൻ ശ്രമിച്ചെന്നാണ് ഇതേ സ്കൂളിലെ അധ്യാപികയായിരുന്ന യുവതിയുടെ പരാതി. അക്ബർ അലിയും ഇതേ സ്കൂളിൽ തന്നെയാണ് ജോലി ചെയ്യുന്നത്.
2022 ലായിരുന്നു പീഡനശ്രമം നടന്നത്. സ്കൂളിലെ താൽക്കാലിക അധ്യാപികയായിരുന്നു പരാതിക്കാരിയായ യുവതി. ജോലി സ്ഥിരപ്പെടുത്തി നല്കാമെന്ന് വാഗ്ദാനം ചെയ്തായിരുന്നു പീഡനശ്രമം നടന്നത്. പണം നൽകാമെന്നും വാഗ്ദാനം ചെയ്തും അക്ബർ അലി ഉപദ്രവിക്കാൻ ശ്രമിച്ചെന്ന് അധ്യാപിക നൽകിയ പരാതിയിൽ പറയുന്നു. വഴങ്ങാതെ വന്നതോടെ ഭീഷണിപെടുത്താൻ തുടങ്ങിയെന്നും ഇതോടെ താൽക്കാലിക ജോലി ഉപേക്ഷിക്കേണ്ടിവന്നെന്നും പരാതിക്കാരിയായ അധ്യാപിക പറഞ്ഞു.
അധ്യാപികയുടെ പരാതിയിൽ തിരൂരങ്ങാടി പൊലീസ് കേസെടുത്ത് അന്വേഷണം തുടങ്ങി. അക്ബറലിയെ യൂത്ത് കോൺഗ്രസ് വള്ളിക്കുന്ന് നിയോജക മണ്ഡലം പ്രസിഡണ്ട് സ്ഥാനത്തുനിന്നും നീക്കിയിട്ടുണ്ടെന്ന യൂത്ത് കോൺഗ്രസ് ജില്ലാ നേതൃത്വം അറിയിച്ചു.
