കോട്ടയം: കാർട്ടൂണിസ്റ്റ് ജോർജ് കുമ്പനാട് (എ.വി ജോർജ്) അന്തരിച്ചു. 94 വയസ്സായിരുന്നു. ഇന്ന് രാവിലെ 9.30നായിരുന്നു അന്ത്യം. വാർധക്യ സഹജമായ അസുഖങ്ങളെ തുടർന്ന് തിരുവല്ല കുമ്പനാട് മാർത്തോമ ഫെല്ലോഷിപ്പ് ആശുപത്രിയിൽ ചികിത്സയിലായിരുന്നു.
മലയാളികളുടെ മനസ്സിൽ ചിരപ്രതിഷ്ഠ നേടിയ ഉപ്പായി മാപ്ല എന്ന കാർട്ടൂൺ കഥാപാത്രത്തെ സൃഷ്ടിച്ചത് ജോർജ് കുമ്പനാടാണ്. കേരള ധ്വനിയിൽ ജോർജ് വരച്ച ഈ കാർട്ടൂൺ കാരക്ടറിനെ പിന്നീട് ടോംസ്, മന്ത്രി , കെ എസ് രാജൻ തുടങ്ങിയ കാർട്ടൂണിസ്റ്റുകൾ തങ്ങളുടെ, ബോബനും മോളിയും, പാച്ചുവും കോവാലനും, ലാലു ലീല തുടങ്ങിയ കാർട്ടൂൺ പംക്തികളിൽ ഉപയോഗിക്കുകയായിരുന്നു.
കേരള കാർട്ടൂൺ അക്കാദമി വിശിഷ്ടാംഗമായിരുന്നു ജോർജ് കുമ്പനാട്. പരേതയായ ജോയമ്മയാണ് ഭാര്യ. നാല് പെൺമക്കളുണ്ട്. ജോർജ് കുമ്പനാടിന്റെ നിര്യാണത്തിൽ കേരള കാർട്ടൂൺ അക്കാദമി അനുശോചനം രേഖപ്പെടുത്തി.
