കണ്ണൂര്: അങ്കണവാടിയില് കളിച്ചുകൊണ്ടിരിക്കെ വീണ് മൂന്നര വയസുകാരന്റെ തലയ്ക്ക് പരിക്ക്. മറ്റുകുട്ടികളോടൊപ്പം ഓടി കളിക്കുന്നതിനിടയില് വീണ് കട്ടിളപ്പടിയില് ഇടിച്ചാണ് പരിക്കേറ്റത്. സംഭവത്തിൽ അങ്കണവാടി വര്ക്കറേയും ഹെല്പ്പറേയും അന്വേഷണവിധേയമായി സസ്പെന്ഡ് ചെയ്തു.(A three-and-a-half-year-old boy suffered a head injury after falling while playing in Anganwadi)
പരിക്കേറ്റ കുട്ടി കോഴിക്കോട് മെഡിക്കല് കോളജ് ആശുപത്രിയില് ചികിത്സയിലാണ്. ഇന്നലെ ഉച്ചയ്ക്ക് മുന്പാണ് അപകടമുണ്ടായത്. എന്നാൽ വൈകുന്നേരം കുട്ടിയെ വീട്ടിലേക്ക് വിളിക്കാന് ചെന്ന സമയത്ത് മാത്രമാണ് പരിക്കുപറ്റിയ വിവരം വീട്ടുകാരെ അധികൃതര് അറിയിച്ചത്. തുടര്ന്ന് വീട്ടുകാര് കുട്ടിയെ വീടിനടുത്തുള്ള ആശുപത്രിയിലും തുടര്ന്ന് പരിയാരം മെഡിക്കല് കോളേജ് ആശുപത്രിയിലും എത്തിച്ചു. ഇവിടെ നിന്ന് വിദഗ്ധ പരിശോധനയ്ക്ക് വേണ്ടി കോഴിക്കോട് മെഡിക്കല് കോളേജ് ആശുപത്രിയിലേക്ക് മാറ്റുകയായിരുന്നു.
സംഭവം ശ്രദ്ധയില്പ്പെട്ടയുടനെ മന്ത്രി വീണാ ജോര്ജ് അടിയന്തര അന്വേഷണം നടത്തി റിപ്പോര്ട്ട് നല്കാന് വനിത ശിശു വികസന വകുപ്പ് ഡയറക്ടര്ക്ക് നിര്ദേശം നല്കിയിരുന്നു. അന്വേഷണത്തില് ജീവനക്കാർക്ക് വീഴ്ച പറ്റിയെന്ന് കണ്ടെത്തുകയായിരുന്നു. തുടർന്നാണ് നടപടിയെടുത്തത്. കുട്ടിയ്ക്ക് വിദഗ്ധ ചികിത്സ ഉറപ്പാക്കാനും മന്ത്രി നിര്ദേശം നല്കി.
