ഡെങ്കിപ്പനി മുമ്പ് വന്നിട്ടുള്ളവര്ക്ക് വീണ്ടും ബാധിച്ചാല് ആരോഗ്യനില സങ്കീര്ണമാകാന് സാധ്യതയുണ്ടെന്ന് ആരോഗ്യ വകുപ്പ് മന്ത്രി വീണാ ജോര്ജ്. ഡെങ്കിപ്പനി ബാധിക്കുന്നവരില് ഭൂരിപക്ഷം പേരിലും രോഗ ലക്ഷണങ്ങള് കുറവായിരിക്കുമെന്നും 5 ശതമാനം പേര്ക്ക് തീവ്രതയാകാന് സാധ്യതയുണ്ടെന്നും മന്ത്രി പറഞ്ഞു. അതിനാല് പലര്ക്കും ഒരിക്കലെങ്കിലും അറിയാതെ ഡെങ്കി വൈറസ് ബാധിച്ചിരിക്കാം എന്നാണാണ് ആഗോള തലത്തില് തന്നെ കണക്കാക്കപ്പെടുന്നത്. ഇവര്ക്ക് ഡെങ്കിപ്പനി രണ്ടാമതും ബാധിച്ചാല് ഗുരുതരമാകാമെന്നും മന്ത്രി കൂട്ടിച്ചേർത്തു.
മന്ത്രിയുടെ വാക്കുകൾ ഇപ്രകാരം:
ഡെങ്കി വൈറസിന് നാല് വകഭേദങ്ങളാണുള്ളത്. ഇതില് ആദ്യം ബാധിക്കുന്ന വകഭേദത്തിനെതിരെ ജീവിതകാലം മുഴുവന് പ്രതിരോധ ശേഷിയുണ്ടായിരിക്കും. എന്നാല് അതേ വ്യക്തിക്ക് മറ്റൊരു വകഭേദം മൂലം ഡെങ്കിപ്പനിയുണ്ടായാല് രോഗം ഗുരുതരമാകാന് സാധ്യതയുണ്ട്. അതിനാല് തന്നെ കൊതുകിന്റെ ഉറവിട നശീകരണം വളരെ പ്രധാനമാണ്.
പ്രമേഹം, രക്താതിമര്ദം, ഹൃദ്രോഗം, വൃക്ക രോഗം തുടങ്ങിയ അനുബന്ധ രോഗങ്ങളുള്ളവര്, പ്രായമായവര്, ഗര്ഭിണികള്, കുഞ്ഞുങ്ങള്, രോഗ പ്രതിരോധശേഷി കുറവുള്ളവര് എന്നിവര് പ്രത്യേകം ശ്രദ്ധിക്കേണ്ടതാണ്. ഗുരുതരമായ ഡെങ്കിപ്പനിയും മരണങ്ങളും തടയാനായി പ്രതിരോധത്തിനും ചികിത്സയ്ക്കും വളരെയേറെ പ്രാധാന്യമുണ്ട്.
ഈഡിസ് കൊതുകുകള് പരത്തുന്ന ഡെങ്കി വൈറസ് മൂലമുണ്ടാകുന്ന രോഗമാണ് ഡെങ്കിപ്പനി. കെട്ടിക്കിടക്കുന്ന വെള്ളത്തിലാണ് ഇത്തരം കൊതുകുകള് മുട്ടയിട്ട് വളരുന്നത്. കൊതുകുവഴി മാത്രമേ ഡെങ്കിപ്പനി ഒരാളില് നിന്നും മറ്റൊരാളിലേക്ക് പകരുകയുള്ളൂ. ഈഡിസ് കൊതുകിന്റെ സഞ്ചാര ദൂരം ചെറുതാണ്. അതിനാല് വീടും സ്ഥാപനങ്ങളും പരിസരങ്ങളും കൊതുക് മുക്തമാക്കുന്നത് ഡെങ്കിപ്പനി തടയാന് സഹായിക്കും.
വെള്ളം കെട്ടിനില്ക്കുന്ന ഏത് വസ്തുവിലും കൊതുക് മുട്ടയിടുമെന്നതിനാല് സാധനങ്ങള് പുറത്തേക്ക് വലിച്ചെറിയരുത്. പൊതു സ്ഥലങ്ങള് വൃത്തിയായി സൂക്ഷിക്കണം. തദ്ദേശ സ്ഥാപനങ്ങളും റെസിഡന്സ് അസോസിയേഷനുകളും ശ്രദ്ധിക്കണം. വെള്ളി, ശനി, ഞായര് ദിവസങ്ങളില് കൃത്യമായി ഡ്രൈ ഡേ ആചരിക്കണം.
അപായ സൂചനകള് മറക്കരുത്
ചെറിയ പനി വന്നാല് പോലും ധാരാളം പാനീയങ്ങള് കുടിക്കുക. ക്ഷീണം മാറാനും നിര്ജലീകരണം ഒഴിവാക്കാനും പാനീയങ്ങള് ഏറെ സഹായിക്കും. തിളപ്പിച്ചാറ്റിയ കഞ്ഞി വെള്ളം നല്ലത്. വിശ്രമം വളരെ പ്രധാനമാണ്. മൂന്ന് ദിവസത്തിലധികം നീണ്ട് നില്ക്കുന്ന പനിയോ അപായ സൂചനകളോ കണ്ടാല് എന്തായാലും വിദഗ്ധ ചികിത്സ തേടണം.
ശക്തമായ വയറുവേദന, നീണ്ടു നില്ക്കുന്ന ഛര്ദി, കഠിനമായ ക്ഷീണം, തൊലിപ്പുറത്തും മോണകളിലുമുള്ള ചുവന്ന പാടുകളോ രക്തസ്രാവമോ തുടങ്ങിയ അപായ സൂചനകള് കണ്ടാല് എത്രയും വേഗം വിദഗ്ധ ചികിത്സ തേടേണ്ടതാണ്.
രോഗം പരത്തുന്ന കൊതുകുകളെ നിയന്ത്രിക്കുകയാണ് ഏറ്റവും പ്രധാനം. വീടും സ്ഥാപനങ്ങളും പരിസരങ്ങളും പൊതുസ്ഥലങ്ങളും വൃത്തിയായി സൂക്ഷിക്കണം.
Read More: വീണ്ടും അധികാരമേൽക്കും ഹേമന്ത് സോറൻ; തീരുമാനം നിയമസഭാ കക്ഷി യോഗത്തിൽ
Read More: ഇഷ്ടതാരത്തിന് വധഭീഷണിയെന്ന് ഇൻസ്റ്റഗ്രാം മെസ്സേജ്; രക്ഷിക്കാൻ 50 ലക്ഷം നൽകി യുവതി
