ഇംഗ്ലീഷ് സ്റ്റാറ്റിസ്റ്റിഷ്യനും ക്രിക്കറ്റിലെ ഡക്ക്വർത്ത് ലൂയിസ് സ്റ്റേൺ (ഡിഎൽഎസ്) രീതിയുടെ കണ്ടുപിടുത്തക്കാരിൽ ഒരാളുമായ ഫ്രാങ്ക് ഡക്ക്വർത്ത് 84-ാം വയസ്സിൽ അന്തരിച്ചു. മഴമൂലം തടസപ്പെടുന്ന കളികളിൽ വിജയികളെ കണ്ടെത്താനാണ് സുഹൃത്തായ ടോണി ലൂയിസുമായി ചേർന്ന് ‘ഡക്വർത്ത്–ലൂയിസ്’ എന്ന മഴ നിയമം ആവിഷ്ക്കരിച്ചത്. (Frank Duckworth, one of the originators of Cricket’s Duckworth-Lewis Law, has died)
1997ലാണ് ഈ നിയമം ആദ്യമായി നടപ്പിലാക്കിയത്. 2001-ൽ നിയന്ത്രിത ഓവർ ഗെയിമുകളിൽ പുതുക്കിയ ടാർഗെറ്റുകൾ സജ്ജീകരിക്കുന്നതിനുള്ള സ്റ്റാൻഡേർഡ് രീതിയായി ഐസിസി ഔപചാരികമായി ഇതിനെ സ്വീകരിച്ചു.
ക്രിക്കറ്റ് മത്സരങ്ങളിൽ മഴ വില്ലനായി വരുന്ന സാഹചര്യത്തിലാണ് വിജയികളെ കണ്ടെത്താൻ പ്രത്യേക നിയമം പ്രയോഗിച്ചു തുടങ്ങിയത്. ഡക്ക്വർത്തും ലൂയിസും വിരമിച്ചതിന് ശേഷം ഈ രീതിയെ ഡക്ക്വർത്ത്-ലൂയിസ്-സ്റ്റേൺ രീതി എന്ന് പുനർനാമകരണം ചെയ്യുകയായിരുന്നു. തുടർന്ന് ഓസ്ട്രേലിയൻ സ്റ്റാറ്റിസ്റ്റിഷ്യൻ സ്റ്റീവൻ സ്റ്റെൺ ചില പരിഷ്കാരങ്ങൾ വരുത്തി.
ആധുനിക സ്കോറിങ് രീതികളുമായി കൂടുതൽ ചേർന്നുപോകുന്ന മാറ്റങ്ങളാണ് സ്റ്റീവൻ സ്റ്റേൺ വരുത്തിയത്. തുടർന്ന്, ഡക്വർത്ത് ലൂയിസ് എന്ന പേരിനൊപ്പം സ്റ്റീവൻ സ്റ്റേണിന്റെ പേരുകൂടി ചേർക്കപ്പെട്ടു. അങ്ങനെയാണ് ഇപ്പോഴത്തെ മഴനിയമം ‘ഡിഎൽഎസ്’ എന്ന് അറിയിപ്പെടുന്നത്.
