പാലക്കാട്ടെ ജനങ്ങൾക്ക് വേണ്ടി ശബ്ദമാകാൻ യുവ നേതാവ് എത്തുമെന്ന് വടകരയിലെ നിയുക്ത എംപി ഷാഫി പറമ്പിൽ. പാലക്കാട് നിയമസഭ ഉപതെരഞ്ഞെടുപ്പിൽ യുഡിഎഫ് സ്ഥാനാർത്ഥിയായി യൂത്ത് കോണ്‍ഗ്രസ് സംസ്ഥാന അധ്യക്ഷന്‍ രാഹുൽ മാങ്കൂട്ടത്തിൽ എത്തിയേക്കുമെന്ന സൂചനയാണ് ഷാഫി പറമ്പിൽ നൽകുന്നത്. ഔദ്യോഗിക ചർച്ചകൾക്ക് ശേഷം ഉടൻ സ്ഥാനാർത്ഥിയെ പ്രഖ്യാപിക്കുമെന്നും ഷാഫി പറമ്പിൽ പറഞ്ഞു. (Shafi Parambil indicates Rahul Mamkootathil may contest for udf in Palakkad bypoll)
പാലക്കാട്ടെ ജനങ്ങളുടെ പ്രശ്നങ്ങൾക്കും നാട്ടിലെ വികസനത്തിനും കൂടെ നിൽക്കുന്ന ചെറുപ്പക്കാരനായ നേതാവ് തന്നെ വരുമെന്നും ഷാഫി പറമ്പിൽ പറഞ്ഞു.
ഷാഫി പറമ്പിലിന്റെ വാക്കുകൾ:
ഔപചാരികമായ ചര്‍ച്ചകള്‍ ആരംഭിച്ചിട്ടില്ല. ജനങ്ങള്‍ ഇഷ്ടപ്പെടുന്ന, ജനങ്ങള്‍ ആഗ്രഹിക്കുന്ന, പാലക്കാടിന്റെ ശബ്ദമാകാന്‍ കഴിയുന്ന ഒരു സ്ഥാനാർത്ഥി പാലക്കാടേക്ക് വരുമെന്ന് തന്നെയാണ് പ്രതീക്ഷിക്കുന്നത്. അദ്ദേഹം പിന്നീട് പാലക്കാടിന്റെ സാരഥിയായി മാറുമെന്ന് തന്നെയാണ് പ്രതീക്ഷിക്കുന്നത്.
നാടിന്റെ വികസനകാര്യങ്ങളിലും പൊതുവായ കാര്യങ്ങളിലും നിരന്തരം ഇടപെടാന്‍ കഴിയുന്ന ഒരാള്‍. വേണമെങ്കില്‍ ഒരു ചെറുപ്പക്കാരനായ ആള്‍ തന്നെ വരട്ടെ.
സ്ഥാനാർത്ഥിയെ സംബന്ധിച്ച അഭിപ്രായം പാര്‍ട്ടി ഫോറത്തില്‍ കൃത്യമായ സമയത്ത് അത് പറയും. ഒറ്റക്കെട്ടായിത്തന്നെ ഞങ്ങള്‍ ഉപതിരഞ്ഞെടുപ്പ് നേരിടും. ‘2019-ലെ പാര്‍ലമെന്റ് തിരഞ്ഞെടുപ്പിലും 2021-ലെ നിയമസഭാ തിരഞ്ഞെടുപ്പിലും യു.ഡി.എഫാണ് പാലക്കാട് നിയമസഭാ മണ്ഡലത്തില്‍ മുന്നിലെത്തിയത്.
2024-ലെ പാര്‍ലമെന്റ് തിരഞ്ഞെടുപ്പില്‍ വി.കെ. ശ്രീകണ്ഠന് ചരിത്രഭൂരിപക്ഷമാണ് പാലക്കാട് നിയമസഭാ മണ്ഡലത്തിലും ലഭിച്ചത്. അത് കാണാതെ പോകരുത്. തുടര്‍ച്ചയായ തിരഞ്ഞെടുപ്പുകളില്‍ പാലക്കാട്ടെ ജനത നല്ല പിന്തുണ ഞങ്ങള്‍ക്ക് തരുന്നുണ്ട്. ഞങ്ങളതിനെ വിലകുറച്ചുകാണുന്നില്ല.
ബി.ജെ.പിക്ക് ലീഡുണ്ട് എന്നുപറയപ്പെടുന്ന സ്ഥലങ്ങളുടെ പട്ടികയില്‍ പാലക്കാട് ഉള്‍പ്പെടുന്നില്ല. എനിക്ക് ലഭിച്ചതിനേക്കാള്‍ മൂന്നിരട്ടി ലീഡാണ് ഇക്കഴിഞ്ഞ തിരഞ്ഞെടുപ്പില്‍ യു.ഡി.എഫിന് ലഭിച്ചത്
Read More: 30 കോടിയുടെ ലഹരിമരുന്ന് വിഴുങ്ങി വിദേശ ദമ്പതിമാര്‍ പറന്നിറങ്ങി; വലയിലാക്കി ഡിആര്‍ഐ
