നന്മ ചെയ്യാൻ അധികം സമയം ഒന്നും ആവശ്യമില്ല. മനസ്സ് മാത്രം മതി എന്ന് തെളിയിച്ചിരിക്കുകയാണ് ഈ ഡെലിവറി ബോയ്. പൊരിവെയിലത്ത് സഞ്ചരിക്കുന്നതിനിടയിലും ഡെലിവറി ബോയിമാർ ഏർപ്പെട്ട പ്രവർത്തികൾ പലപ്പോഴും പ്രശംസകൾക്ക് വഴിവെച്ചിട്ടുണ്ട്. തൻ്റെ പ്രവർത്തികൾക്ക് ആദരവും ഭരണാധികാരിയിൽ നിന്ന് സമ്മാനങ്ങളും ലഭിച്ചവരുണ്ട്. (The young man saved life of a kitten in seconds)
29കാരനായ സുബൈർ അൻവർ മുഹമ്മദ് എന്ന യുവാവാണ് സംഭവത്തിലെ ഹീറോ. തന്റെ ജോലിക്കിടെയാണ് അവിചാരിതമായി യുവാവ് ഒരു ജീവന്റെ രക്ഷകനാകുന്നത്. സമൂഹ മാധ്യമങ്ങളിലും അതിരുത്തരുടെ ഇടയിലും ഏറെ പ്രശംസ പിടിച്ചുപറ്റി ഈ ഒരൊറ്റ സംഭവത്തിലൂടെ ഈ പാക്കിസ്ഥാനി യുവാവ്. മെയ് നാലിനാണ് മനാഫ് കെ.അബ്ബാസ് എന്നയാളാണ് വീഡിയോ സമൂഹമാധ്യമങ്ങളിൽ പോസ്റ്റ് ചെയ്തത്.
തന്റെ ജോലിക്കിടെ വാഹനം സിഗ്നലിൽ നിർത്തിയപ്പോൾ വാഹനത്തിനിടയിൽ കുടുങ്ങിയ പൂച്ചക്കുഞ്ഞിനെ നിമിഷങ്ങൾക്കകം രക്ഷപ്പെടുത്തിയാണ് യുവാവ് ശ്രദ്ധേയനായത്. യുഎഇയിലെ അബുദാബി അൽ മഹർ കൊട്ടാരത്തിനടുത്ത് തിരക്കേറിയ അൽ ഫലാഹ് സ്ട്രീറ്റിൽ വച്ചാണ് സംഭവം നടന്നത്.
ഭക്ഷണം എത്തിക്കാനായി ബൈക്കിൽ പോകുമ്പോൾ തെരുവിലെ ട്രാഫിക് സിഗ്നലിൽ കാത്ത് നിൽക്കുകയായിരുന്നു സുബൈർ. ഇതിനിടയിലാണ് പൂച്ചക്കുട്ടി എവിടെ നിന്നോ ഓടിയെത്തി സിഗ്നൽ കാത്ത് റോഡിന്റെ മധ്യത്തിൽ നിർത്തിയിട്ടിരിക്കുകയായിരുന്ന എസ്യുവിയുടെ അടിയിലേക്ക് ഓടി കയറുന്നത് യുവാവിന്റെ ശ്രദ്ധയിപ്പെട്ടത്. വാഹനം മുന്നോട്ടെടുത്താൽ ആ ജീവൻ നഷ്ടമാകും.
സെക്കൻഡുകൾ മാത്രമാണ് സിഗ്നൽ പച്ചയാവാൻ ബാക്കിയുള്ളത് എന്ന തിരിച്ചറിവിൽ യുവാവ് ഉടൻ പ്രവർത്തിച്ചു. വാഹനത്തിൽ നിന്നിറങ്ങി നൊടിയിടയിൽ പൂച്ചക്കുഞ്ഞിനെ എടുത്ത് റോഡിന്റെ മറുവശത്ത് സുരക്ഷിതമായ സ്ഥലത്ത് വിട്ടുകൊണ്ട് തിരിച്ചു വന്നപ്പോഴേക്കും സിഗ്നലും പച്ചയായി. സംഭവത്തിൻ്റെ ദൃശ്യങ്ങൾ മറ്റൊരു വാഹനത്തിലുണ്ടായിരുന്ന മലയാളി യുവാവ്പകർത്തി സോഷ്യൽ മീഡിയയിൽ പോസ്റ്റ് ചെയ്തതോടെയാണ് പുറംലോകമറിഞ്ഞത്.
കഴിഞ്ഞ 5 വർഷമായി എമിറേറ്റിൽ ഡെലിവറി ബോയിയായി ജോലിചെയ്യുകയാണ് സുബൈർ.ഒരു മിണ്ടാപ്രാണിയുടെ ജീവൻ രക്ഷിക്കാൻ കഴിഞ്ഞതിൽ സന്തോഷമുണ്ടെന്നാണ് സുബൈർ പറയുന്നത്. സുബൈറിനെ നേരിട്ട് കണ്ടവരും അഭിനന്ദനങ്ങൾ അറിയിച്ചു.
