ശാസ്താംകോട്ട: പോരുവഴി ഇടയ്ക്കാട്ടിൽ എ.സി. പൊട്ടിത്തെറിച്ച് വീടിന് തീപിടിച്ച് വൻ നാശനഷ്ടം. മുണ്ടുകുളഞ്ഞി പള്ളിപ്പറമ്പിൽ ഡെന്നി സാമിന്റെ വീട്ടിലെ എ.സിയാണ് പൊട്ടിത്തെറിച്ചത്. കഴിഞ്ഞ ദിവസം രാത്രിയിലാണ് സംഭവം. ഈ സമയം വീട്ടുകാരാരും വീട്ടിലുണ്ടായിരുന്നില്ല. സമീപത്ത് പ്രാർത്ഥനയ്ക്ക് പോയി തിരിച്ചു വന്നപ്പോഴാണ് സംഭവം അറിയുന്നത്. എ.സി. പൊട്ടിത്തെറിച്ചതോടെ വീടിന് ഉൾവശം മുഴുവൻ പുക നിറഞ്ഞു. കട്ടിൽ, മെത്ത, ജനാല എന്നിവ പൂർണമായി കത്തി നശിച്ചു. നാട്ടുകാരുടെ നേതൃത്വത്തിൽ തീയണക്കാനുള്ള ശ്രമം നടത്തിയെങ്കിലും കഴിഞ്ഞില്ല. ശാസ്താംകോട്ട ഫയർഫോഴ്‌സ് എത്തി തീയണച്ചു.
