കട്ടപ്പന: പോസ്റ്റ് ഓഫീസുകാരുടെ ഗുരുതര അനാസ്ഥ മൂലം ഭിന്നശേഷിക്കാരന് നഷ്ടമായത് സർക്കാർ ജോലി. കട്ടപ്പന വെള്ളയാംകുടി വട്ടക്കാട്ട് ലിന്റോ തോമസ് (30) ആണ് പരാതിക്കാരൻ. നടപടി ആകാതെ വന്നതോടെ വെള്ളയാംകുടി പോസ്റ്റ് ഓഫീസിനു മുന്നിൽ ഭിക്ഷ യാചിച്ച് സമരം നടത്തുകയായിരുന്നു യുവാവ്. സർക്കാർ സ്കൂളിലെ അനധ്യാപക തസ്തികയിലേക്കുള്ള നിയമനത്തിനായാണ് എംപ്ലോയ്മെന്റ് എക്സ്ചേഞ്ചിൽ നിന്നും ലിന്റോയ്ക്ക് ഇന്റർവ്യൂ കാർഡ്അയച്ചത്. മാർച്ച് 18നു കത്ത് പോസ്റ്റ് ഓഫിസിൽ എത്തി. 23ന് ആയിരുന്നു ഇന്റർവ്യൂ. എന്നാൽ, 10 ദിവസത്തിനുശേഷം 28ന് ആണു കത്ത്നൽകിയതെന്നാണ് ആക്ഷേപം. മറ്റൊരാൾക്കു സ്കൂളിൽ നിയമനവും ലഭിച്ചു. മുഖ്യമന്ത്രി, കളക്ടർ. തപാൽ വകുപ്പ് ഉദ്യോഗസ്ഥർ എന്നിവർക്കെല്ലാം പരാതി നൽകിയിട്ടും നടപടി ഉണ്ടാകാതെ വന്നതോടെയാണ് ലിന്റോ ഭിക്ഷ യാചിച്ച് സമരത്തിനിറങ്ങിയത്. എന്നാൽ, ലിന്റോയുടെ മൊബൈൽ നമ്പർ ലഭിക്കാത്തതിനാലാണ് കത്ത് കൈമാറാൻ വൈകിയതെന്നാണ് പോസ്റ്റ് ഓഫീസിൽ നിന്ന് ലഭിച്ച മറുപടി. പ്രതിഷേധമറിഞ്ഞ് പൊലീസും സ്ഥലത്തെത്തിയിരുന്നു. ഇവർ സ്കൂൾ അധികൃതരുമായി ബന്ധപ്പെട്ടു. തുടർന്ന് നിയമനടപടിയുമായി മുന്നോട്ട് പോകാൻ അഭിഭാഷകന്റെ സഹായം ലഭ്യമാക്കാമെന്ന് പൊലീസ് പറഞ്ഞതോടെയാണ് ലിന്റോ ഇന്നലെ സമരം അവസാനിപ്പിച്ചത്.
Read Also: സിപിഎമ്മിൻ്റെ ന്യൂനപക്ഷപ്രേമലു; സുപ്രഭാതത്തിൽ മുസ്ലിം സ്നേഹവും ദീപികയിൽ ക്രിസ്ത്യൻ സ്നേഹവും
