അമ്പലപ്പുഴ: അപകടത്തിൽ വലതു കൈ നഷ്ടപ്പെട്ട വേദന മറന്ന് എഴുതിയ സിവിൽ സർവിസ് പരീക്ഷയിൽ പാർവതിക്ക് മിന്നുംവിജയം. അമ്പലപ്പുഴ ക്ഷേത്രത്തിന് പടിഞ്ഞാറ് അമ്പാടിയിൽ ഗോപകുമാർ-ശ്രീലത ദമ്പതികളുടെ മകൾ പാർവതിക്ക് സിവിൽ സർവിസ് പരീക്ഷയിൽ 282ാം റാങ്കാണ് ലഭിച്ചത്.
ചൊവ്വാഴ്ച ഫലം പ്രഖ്യാപിച്ചപ്പോൾ വേദനകൾക്കിടയിലും തിളക്കമാർന്ന നേട്ടം കൈവരിച്ചതിന്‍റെ ആഹ്ലാദത്തിലാണ് ഈ കുടുംബം. 2010ൽ പിതാവുമായി ബൈക്കിൽ പോകുമ്പോൾ അപകടമുണ്ടായതിനെത്തുടർന്നാണ് വലതുകൈ മുട്ടിന് താഴെ മുറിച്ചുമാറ്റേണ്ടി വന്നത്. ഇപ്പോൾ കൃത്രിമകൈയാണ് പിടിപ്പിച്ചിരിക്കുന്നത്. ഒന്നുമുതൽ അഞ്ചുവരെ കാക്കാഴം സ്കൂളിലും ആറുമുതൽ 10 വരെ ചെന്നിത്തല നവോദയ സ്കൂളിലുമായിരുന്നു പാർവതിയുടെ പഠനം. പ്ലസ് ടു അമ്പലപ്പുഴ ഗവ. മോഡൽ ഹയർ സെക്കൻഡറി സ്കൂളിലുമായിരുന്നു. പിതാവ് ഗോപകുമാർ ആലപ്പുഴ കലക്ടറേറ്റിലെ ഡെപ്യൂട്ടി തഹസിൽദാറും മാതാവ് ശ്രീകല കാക്കാഴം ഗവ. ഹയർ സെക്കൻഡറി സ്കൂൾ അധ്യാപികയുമാണ്. സഹോദരി: രേവതി.
