വാർധക്യത്തിലും ‘അന്നം’ മുടക്കാതെ; ഈ 94-കാരൻ ജനറൽ ആശുപത്രിയുടെ പുണ്യം; ബിഗ് സല്യൂട്ടുമായി ലാലേട്ടൻ
തിരുവനന്തപുരം: കാൽനൂറ്റാണ്ടിലേറെയായി അശരണരായ രോഗികളുടെ വിശപ്പകറ്റാൻ ജീവിതം സമർപ്പിച്ച വ്യക്തിയാണ് പേട്ട കവറടി റോഡിലെ ലക്ഷ്മി മന്ദിരത്തിൽ താമസിക്കുന്ന എം. രാധാകൃഷ്ണപിള്ള. തിരുവനന്തപുരം ജനറൽ ആശുപത്രിയിലെ ഒൻപതാം വാർഡിൽ 26 വർഷമായി അദ്ദേഹം സൗജന്യമായി ഭക്ഷണം വിതരണം ചെയ്യുന്നു.
94ാം വയസ്സ് പിന്നിട്ടിട്ടും ഓരോ ദിവസവും വിശക്കുന്നവരെക്കുറിച്ചാണ് അദ്ദേഹത്തിന്റെ ചിന്ത. സ്വന്തം പെൻഷനും സുമനസുകൾ നൽകുന്ന സംഭാവനകളും ചേർത്താണ് അന്നദാനം തുടരുന്നത്. പിന്തുണയായി എന്നും കൂടെയുണ്ടായിരുന്ന ഭാര്യ ഇന്ദിരാമ്മയുടെ മരണദിവസം പോലും ഭക്ഷണവിതരണം മുടക്കാതിരുന്നതാണ് അദ്ദേഹത്തിന്റെ സേവനത്തിന്റെ ആഴം വ്യക്തമാക്കുന്നത്.
പാല സ്വദേശിയായ രാധാകൃഷ്ണപിള്ള സാങ്കേതിക വിദ്യാഭ്യാസ വകുപ്പിൽ ജോലി ലഭിച്ചതോടെയാണ് തലസ്ഥാനത്ത് എത്തിയത്. സൂപ്രണ്ടായി വിരമിച്ചശേഷം വിശക്കുന്നവർക്കായി ഭക്ഷണം നൽകണമെന്ന് തീരുമാനിച്ചു. ആദ്യം ഫോർട്ട് ആശുപത്രിയിൽ ശ്രമിച്ചെങ്കിലും അവസരം ലഭിച്ചില്ല. തുടർന്ന് തിരുവനന്തപുരം ജനറൽ ആശുപത്രിയിൽ എത്തി. അന്നത്തെ സൂപ്രണ്ടിന്റെ പിന്തുണയോടെ 2000 ഏപ്രിലിൽ ഒൻപതാം വാർഡിൽ അന്നദാനം ആരംഭിച്ചു.
വീട്ടിൽ തയ്യാറാക്കിയ ഭക്ഷണം മാത്രമേ നൽകാവൂ എന്ന ആശുപത്രി നിർദേശം ഇന്നും അദ്ദേഹം പാലിക്കുന്നു. ഇതിന് പിന്തുണയായി മാതാ വനിതാ ചാരിറ്റബിൾ ട്രസ്റ്റ് രൂപീകരിക്കുകയും ചെയ്തു. ദിവസേന കുറഞ്ഞത് നാല് തരത്തിലുള്ള കറികളോടുകൂടിയ ഭക്ഷണമാണ് ഒരുക്കുന്നത്. അതേ ഭക്ഷണമാണ് കുടുംബവും ഉപയോഗിക്കുന്നത്.
പ്രായാധിക്യം കാരണം ഇപ്പോൾ ആശുപത്രിയിൽ നേരിട്ട് എത്താൻ പ്രയാസമുണ്ടെങ്കിലും ജീവനക്കാർ വീട്ടിൽ നിന്ന് ഭക്ഷണം കൊണ്ടുപോകുന്ന രീതിയാണ് തുടരുന്നത്. പിറന്നാളും തിരുവോണവും ഉൾപ്പെടെ എല്ലാ പ്രധാന ദിവസങ്ങളും അദ്ദേഹം ഒൻപതാം വാർഡിൽ തന്നെ ചെലവഴിക്കുന്നു.
അദ്ദേഹത്തിന്റെ സേവനജീവിതത്തെ പ്രശംസിച്ച് നടൻ മോഹൻലാൽ “വിശപ്പിന്റെ വില അറിയുന്ന സ്വാമി അപ്പൂപ്പന് ബിഗ് സല്യൂട്ട്” എന്നാണ് പ്രതികരിച്ചത്.
English Summary
M. Radhakrishna Pillai, a 94-year-old philanthropist from Thiruvananthapuram, has been providing free meals to needy patients at the General Hospital for 26 years. Using his pension and donations, he continues this service without interruption—even on the day his wife passed away. Actor Mohanlal praised his dedication.
