മനുഷ്യരെപ്പോലെ തന്നെ ചിമ്പാൻസികൾക്കിടയിലും ആഭ്യന്തര യുദ്ധമോ? രണ്ട് വിഭാഗങ്ങളായി പിരിഞ്ഞ് നടത്തിയ ആക്രമണത്തിൽ 28 മരണം; ഗവേഷകരെ ഞെട്ടിച്ച് കിബാലെ കാട്
കമ്പാല: ഉഗാണ്ടയിലെ കിബാലെ ദേശീയോദ്യാനത്തിൽ ഏറെക്കാലമായി ഒരുമിച്ച് ജീവിച്ചിരുന്ന എൻഗോഗോ ചിമ്പാൻസി സമൂഹം രണ്ട് വിഭാഗങ്ങളായി തിരിഞ്ഞ് പരസ്പരം ആക്രമിക്കുന്നതായി റിപ്പോർട്ട്. ഈ അപൂർവമായ ആഭ്യന്തര സംഘർഷം ഗവേഷകരെ പോലും ഞെട്ടിച്ചിരിക്കുകയാണ്.
1995 മുതൽ നിരീക്ഷിച്ചുവരുന്ന ലോകത്തിലെ ഏറ്റവും വലിയ ചിമ്പാൻസി കൂട്ടങ്ങളിൽ ഒന്നാണ് എൻഗോഗോ സംഘം. 2015ഓടെയാണ് ഇവയിൽ വിഭജനം ആരംഭിച്ചത്. 2017ൽ രോഗബാധയെ തുടർന്ന് കുഞ്ഞുങ്ങൾ ഉൾപ്പെടെ 25 ചിമ്പാൻസികൾ മരിച്ചതോടെ സാമൂഹിക ബന്ധങ്ങൾ തകരുകയും, 2018 മുതൽ രണ്ട് വിഭാഗങ്ങളായി പിരിഞ്ഞ് ആക്രമണങ്ങൾ ശക്തമാവുകയും ചെയ്തതായി ശാസ്ത്രജ്ഞർ പറയുന്നു.
കടി, അടിക്കൽ, വലിച്ചിഴയ്ക്കൽ തുടങ്ങിയ ആക്രമണരീതികളാണ് ചിമ്പാൻസികൾ ഉപയോഗിക്കുന്നത്. ഇതിനകം 17 കുഞ്ഞുങ്ങൾ ഉൾപ്പെടെ 28 ചിമ്പാൻസികൾ കൊല്ലപ്പെട്ടതായി റിപ്പോർട്ടുണ്ട്.
പെൺ ചിമ്പാൻസികളും ഇപ്പോൾ ആക്രമണങ്ങളിൽ സജീവമാണെന്ന് ടെക്സസ് സർവകലാശാലയിലെ ഗവേഷകൻ ഡോ. ആറോൺ സാൻഡൽ വ്യക്തമാക്കി. ഭക്ഷണത്തിനുള്ള മത്സരവും സാമൂഹിക അധികാര പോരാട്ടവുമാണ് സംഘർഷത്തിന് കാരണമെന്നാണ് പ്രാഥമിക വിലയിരുത്തൽ.
English Summary
A rare internal conflict has broken out among chimpanzees in Uganda’s Kibale National Park, splitting into two groups. At least 28 chimpanzees have died, shocking researchers.
