ട്വന്റി20 തരംഗമോ? മത്സരിച്ച മണ്ഡലങ്ങളിലെല്ലാം വമ്പൻ പോളിങ്; കുന്നത്തുനാട്ടിൽ 84.9 ശതമാനം!
കൊച്ചി: നിയമസഭാ തെരഞ്ഞെടുപ്പിൽ ട്വന്റി20 മത്സരത്തിനിറങ്ങിയ മണ്ഡലങ്ങളിൽ പോളിങ് ശതമാനം ശ്രദ്ധേയമായി ഉയർന്നു. ട്വന്റി20യുടെ ശക്തികേന്ദ്രമായ കുന്നത്തുനാട്ടിൽ ശക്തമായ ത്രികോണ പോരാട്ടത്തിനിടെ 84.9 ശതമാനം പോളിങാണ് രേഖപ്പെടുത്തിയത്.
മൂന്നു മുന്നണികളും ശക്തമായ പ്രചാരണം നടത്തിയതോടെ വോട്ടർമാരുടെ പങ്കാളിത്തം വർധിച്ചതായി വിലയിരുത്തപ്പെടുന്നു. ട്വന്റി20യുടെ വോട്ടുകളും ബിജെപി വോട്ടുകളും ഒരുമിച്ചാൽ മണ്ഡലം എൻഡിഎയ്ക്ക് അനുകൂലമാകുമെന്ന പ്രചാരണം ഇവിടെ ശക്തമായിരുന്നു.
ട്വന്റി20 മത്സരിച്ച തൃപ്പൂണിത്തുറയിൽ 81.4 ശതമാനവും വൈപ്പിനിൽ 80.05 ശതമാനവും പോളിങ് രേഖപ്പെടുത്തി. എറണാകുളം ജില്ലയിലെ കൊച്ചി, തൃക്കാക്കര, അങ്കമാലി, പെരുമ്പാവൂർ, മൂവാറ്റുപുഴ, പിറവം തുടങ്ങിയ മണ്ഡലങ്ങളിലും ശക്തമായ ത്രികോണ മത്സരം പ്രകടമായി.
കോട്ടയം, ഇടുക്കി, പത്തനംതിട്ട ജില്ലകളിലെ ഏറ്റുമാനൂർ, തൊടുപുഴ, റാന്നി മണ്ഡലങ്ങളിലും ട്വന്റി20 ആദ്യമായി മത്സരിച്ചതോടെ പോളിങ് ഉയർന്നു. റാന്നിയിൽ 68.99%, ഏറ്റുമാനൂരിൽ 75.65%, തൊടുപുഴയിൽ 75.97% എന്നിങ്ങനെയാണ് പോളിങ്.
ട്വന്റി20യുടെ സാന്നിധ്യം ക്രിസ്ത്യൻ ന്യൂനപക്ഷ വോട്ടുകളിൽ സ്വാധീനം ചെലുത്തുമെന്ന് ബിജെപി പ്രതീക്ഷ പ്രകടിപ്പിക്കുന്നു.
English Summary
Polling percentage increased in constituencies where Twenty20 contested in the Kerala Assembly elections.
Kunnathunadu recorded 84.9% turnout amid a strong triangular contest, with similar trends seen in other constituencies.
