ഹോർമുസ് പ്രതിസന്ധി; ഊർജത്തിനായി അർജന്റീനയെ കൂട്ടുപിടിച്ച് ഇന്ത്യ; എൽപിജി ഇറക്കുമതിയിൽ വൻ വർധന
ന്യൂഡൽഹി: ഇന്ത്യ ഹോർമുസ് മേഖലയിൽ ഉണ്ടായ തടസങ്ങൾക്ക് പിന്നാലെ അർജന്റീനയുമായി ഊർജ പങ്കാളിത്തം ശക്തമാക്കി. അർജന്റീനയിൽ നിന്നുള്ള എൽപിജി (പാചകവാതകം) ഇറക്കുമതി ഗണ്യമായി വർധിച്ചതായാണ് റിപ്പോർട്ടുകൾ സൂചിപ്പിക്കുന്നത്.
ഇന്ത്യയിലേക്കുള്ള പാചകവാതകത്തിന്റെ വലിയൊരു പങ്ക് എത്തിയിരുന്ന ഹോർമുസ് കടലിടുക്ക് മേഖലയിലെ പ്രതിസന്ധിയാണ് പുതിയ നീക്കത്തിന് പിന്നിൽ. പശ്ചിമേഷ്യയിലെ സംഘർഷം രൂക്ഷമായതിനെ തുടർന്ന് ഇന്ത്യയിൽ ഊർജ വിതരണത്തിലും സമ്മർദ്ദം ഉണ്ടായിട്ടുണ്ട്.
ഇറക്കുമതിയിൽ വൻ വർധന
2026ൽ ഇതുവരെ അർജന്റീനയിൽ നിന്ന് ഇന്ത്യയിലേക്ക് ഏകദേശം 50,000 ടൺ എൽപിജി എത്തിയതായി കണക്കുകൾ വ്യക്തമാക്കുന്നു. ഇതിൽ 39,000 ടൺ സംഘർഷത്തിന് മുൻപും, മാർച്ച് 5ന് 11,000 ടൺ കൂടി എത്തിച്ചതുമാണ്.
2025ൽ 22,000 ടൺ മാത്രമായിരുന്നു ഇറക്കുമതി. 2024 വരെ അർജന്റീനയിൽ നിന്ന് ഇന്ത്യ എൽപിജി ഇറക്കുമതി ചെയ്തിരുന്നില്ല. ഇരു രാജ്യങ്ങൾ തമ്മിലുള്ള ഊർജ ബന്ധം വേഗത്തിൽ വളരുന്നതിന്റെ സൂചനയാണിത്.
വെല്ലുവിളികളും നിലനിൽക്കും
അർജന്റീനയിലെ ബഹിയാ ബ്ലാങ്ക തുറമുഖം മുതൽ ഗുജറാത്തിലെ ദഹേജ് തുറമുഖം വരെ ഏകദേശം 20,000 കിലോമീറ്റർ ദൂരമുണ്ട്. ഗതാഗത ചെലവും കാലതാമസവും കാലാവസ്ഥാ അപകടസാധ്യതകളും പ്രധാന വെല്ലുവിളികളാണ്.
എങ്കിലും പരമ്പരാഗത വിതരണ പാതകളിലേക്കുള്ള ആശ്രയം കുറയ്ക്കാനുള്ള ഇന്ത്യയുടെ പ്രധാന നീക്കമായി ഇത് വിലയിരുത്തപ്പെടുന്നു.
English Summary
India has increased LPG imports from Argentina following disruptions in the Strait of Hormuz, marking a strategic shift to diversify energy supply sources.
india-argentina-lpg-import-hormuz-crisis
ഇന്ത്യ, അർജന്റീന, എൽപിജി, ഊർജ പ്രതിസന്ധി, ഹോർമുസ്
