നിയമസഭാ തിരഞ്ഞെടുപ്പിൽ മത്സരിക്കില്ല; രാജ്യസഭയിലേക്ക് വിളിച്ചാൽ റെഡി; ഐ.എം. വിജയൻ
തിരുവനന്തപുരം: സജീവ രാഷ്ട്രീയത്തിലേക്ക് പ്രവേശിക്കുന്നതിനെക്കുറിച്ചുള്ള ചർച്ചകൾ ശക്തമാകുന്നതിനിടെ നിയമസഭാ തിരഞ്ഞെടുപ്പിൽ സ്ഥാനാർത്ഥിയാകില്ലെന്ന് മുൻ ഇന്ത്യൻ ഫുട്ബോൾ നായകൻ ഐ.എം. വിജയൻ വ്യക്തമാക്കി. വിവിധ രാഷ്ട്രീയ വൃത്തങ്ങളിൽ നിന്ന് പേര് ഉയർന്ന സാഹചര്യത്തിലാണ് അദ്ദേഹം തന്റെ നിലപാട് തുറന്ന് പറഞ്ഞത്.
തന്നെ രാഷ്ട്രീയത്തിലേക്ക് ക്ഷണിച്ച് പ്രധാനമന്ത്രിയുടെ പ്രത്യേക ദൂതൻ നേരിട്ട് വന്ന് സംസാരിച്ചുവെന്ന് ഐ.എം. വിജയൻ വെളിപ്പെടുത്തി. കൂടാതെ നടനും കേന്ദ്രമന്ത്രിയുമായ സുരേഷ് ഗോപി ഫോണിൽ വിളിച്ച് സംസാരിച്ചിരുന്നുവെന്നും അദ്ദേഹം പറഞ്ഞു.
അതേസമയം, മൂന്ന് പ്രധാന രാഷ്ട്രീയ മുന്നണികളുമായും തനിക്ക് അടുത്ത ബന്ധമുണ്ടെന്നും അതിനാൽ ഒരു പ്രത്യേക പാർട്ടിയുടെ ഭാഗമായിരിക്കാൻ താൽപര്യമില്ലെന്നും വിജയൻ വ്യക്തമാക്കി.
എന്നാൽ, രാജ്യസഭയിലേക്ക് നാമനിർദ്ദേശം ചെയ്യപ്പെട്ടാൽ ആ ഉത്തരവാദിത്വം ഏറ്റെടുക്കാൻ താൽപര്യമുണ്ടെന്ന് അദ്ദേഹം പറഞ്ഞു.
ഫുട്ബോൾ രംഗത്ത് ദീർഘകാലം രാജ്യത്തെ പ്രതിനിധീകരിച്ച ഐ.എം. വിജയൻ സാമൂഹിക വിഷയങ്ങളിൽ ഇടയ്ക്കിടെ പ്രതികരിക്കുന്ന വ്യക്തിയുമാണ്. അദ്ദേഹത്തിന്റെ രാഷ്ട്രീയ നിലപാട് വ്യക്തമാക്കിയതോടെ തിരഞ്ഞെടുപ്പ് ചർച്ചകളിൽ പുതിയ വഴിത്തിരിവാണ് ഉണ്ടായിരിക്കുന്നത്.
English Summary
Former Indian football captain I.M. Vijayan clarified that he will not contest in the upcoming Kerala Assembly elections despite discussions about his possible entry into active politics. He revealed that a special envoy of the Prime Minister had personally approached him to discuss politics and that Union Minister and actor Suresh Gopi also spoke to him over the phone. Vijayan said he has close ties with all three major political fronts and does not want to align with a single party. However, he added that he would be willing to accept a nomination to the Rajya Sabha if offered.
