അയലയും മത്തിയും അല്ല; ഭക്ഷണപ്രേമികൾ ഇപ്പോൾ തിരയുന്നത് ഈ മത്സ്യം
സമുദ്രമത്സ്യങ്ങളെക്കാൾ ഇന്ന് പലർക്കും ഇഷ്ടം പുഴമത്സ്യങ്ങളോടാണ്. കേരള–തമിഴ്നാട് അതിർത്തിയായ നെട്ട മേഖലയിലെ ഹോട്ടലുകളിൽ പുഴമത്സ്യ വിഭവങ്ങൾ തേടി എത്തുന്നവരുടെ എണ്ണം ദിവസേന ഉയരുകയാണ്. രുചിയും വിലക്കുറവും പ്രകൃതിസൗന്ദര്യവും ഒരുമിച്ചെത്തുമ്പോൾ ഈ പ്രദേശം ഭക്ഷണപ്രേമികളുടെ പുതിയ ലക്ഷ്യസ്ഥാനമായി മാറിയിരിക്കുകയാണ്.
തിരുവനന്തപുരം ജില്ലയിലെ കേരള–തമിഴ്നാട് അതിർത്തിയായ നെട്ട മേഖലയിൽ പുഴമത്സ്യ വിഭവങ്ങൾക്ക് വലിയ ആവശ്യമാണ് ഉയർന്നിരിക്കുന്നത്. ചിറ്റാർ ജലസംഭരണിയുടെ ഭാഗമായ ഈ പ്രദേശം പുഴമത്സ്യ വിഭവങ്ങൾക്കായി അറിയപ്പെടുന്ന സ്ഥലമായി മാറിയിരിക്കുകയാണ്.
നെട്ട മുതൽ ശിവലോകം വരെ റോഡിന്റെ ഒരുവശം ചിറ്റാർ ജലസംഭരണിയോടൊപ്പമാണ് നീളുന്നത്. ഈ വഴിയിലുടനീളം മത്സ്യ വിഭവങ്ങൾ വിളമ്പുന്ന ഹോട്ടലുകളും ചെറുകിട ഭക്ഷണശാലകളും പ്രവർത്തിക്കുന്നുണ്ട്. ചിറ്റാർ, കോതയാർ, ചേച്ചിപ്പാറ, പെരുംചാണി എന്നീ ഡാമുകളിൽ നിന്നുള്ള മത്സ്യങ്ങളാണ് പ്രധാനമായും ഇവിടെ എത്തുന്നത്.
ആറ്റുവാള, കട്ട്ല, റോബ്, സ്ലോപ്പിയ, കരിമീൻ തുടങ്ങിയ പുഴമത്സ്യങ്ങൾക്കൊപ്പം ചെമ്പല്ലിയും ഇവിടെ ലഭ്യമാണ്. രുചികരമായ പുഴമത്സ്യ വിഭവങ്ങൾ ലഭിക്കുന്നതായി സമൂഹമാധ്യമങ്ങളിൽ പ്രചരിച്ചതോടെ കേരളത്തിന്റെ വിവിധ ജില്ലകളിൽ നിന്നും തമിഴ്നാട്ടിൽ നിന്നുമുള്ള ആളുകൾ ഇവിടെ എത്തിത്തുടങ്ങി.
കപ്പയും മീൻകറിയും, മീൻ ഫ്രൈയും, തലക്കറിയുമടക്കമുള്ള വിവിധ വിഭവങ്ങളാണ് ഹോട്ടലുകളിൽ ലഭിക്കുന്നത്. രാവിലെ എത്തുന്ന പലരും ഡാമിന്റെ ചുറ്റുപാടുകളിൽ സന്ദർശനം നടത്തി പ്രകൃതിദൃശ്യം ആസ്വദിച്ച ശേഷം ഭക്ഷണം കഴിച്ചാണ് മടങ്ങുന്നത്.
മറ്റിടങ്ങളുമായി താരതമ്യം ചെയ്യുമ്പോൾ അതിർത്തി മേഖലയിലെ ഹോട്ടലുകളിൽ ഭക്ഷണത്തിന് കുറഞ്ഞ വിലയാണുള്ളത്. ഇതും ഭക്ഷണപ്രേമികളെ കൂടുതൽ ആകർഷിക്കുന്ന കാരണമായി മാറിയിട്ടുണ്ട്. എന്നാൽ ആവശ്യക്കാർ വർധിച്ചതോടെ ആവശ്യത്തിന് മത്സ്യം ലഭിക്കുന്നില്ലെന്ന ആശങ്ക വ്യാപാരികൾ പങ്കുവയ്ക്കുന്നു.
English Summary
River fish dishes are becoming increasingly popular among food lovers at Nette, a Kerala–Tamil Nadu border area near the Chittar reservoir. Restaurants along the road from Nette to Sivalokam serve a variety of freshwater fish dishes sourced from nearby dams like Chittar, Kodayar, Chechippaarai and Perunchani. The taste, scenic surroundings and affordable prices have attracted visitors from different parts of Kerala and Tamil Nadu, making the area a new hotspot for fish cuisine lovers.
