10-ാം വയസിൽ മകൾ നിഷ സ്വന്തമായി പണം സമ്പാദിക്കുന്നുവെന്ന് അഭിമാനത്തോടെ സണ്ണി ലിയോൺ
പത്താം വയസിൽ തന്നെ സ്വന്തമായി ഒരു ഉൽപ്പന്നം രൂപകൽപ്പന ചെയ്ത് പേറ്റന്റ് നേടുകയും വരുമാനം സമ്പാദിക്കുകയും ചെയ്യുന്ന മകൾ നിഷയെക്കുറിച്ച് അഭിമാനത്തോടെ സംസാരിച്ച് ബോളിവുഡ് താരം സണ്ണി ലിയോൺ. ‘ഫൺ വിത്ത് ഫറ’ പരിപാടിയിലൂടെയാണ് മകളുടെ ഈ അപൂർവ നേട്ടം താരം വെളിപ്പെടുത്തിയത്.
‘ഫൺ വിത്ത് ഫറ’ എന്ന പരിപാടിയുടെ പുതിയ എപ്പിസോഡിലാണ് സണ്ണി ലിയോൺ, പത്തുവയസ്സുകാരിയായ മകൾ നിഷ സ്വന്തമായി രൂപകൽപ്പന ചെയ്ത ഉൽപ്പന്നത്തെക്കുറിച്ച് വിശദീകരിച്ചത്.
‘ബൂ ബോക്സ്’ (Boo Box) എന്ന പേരിലുള്ള ഈ കണ്ടുപിടിത്തം 2-ഇൻ-1 ടിഷ്യൂ ഹോൾഡറാണ്. ടിഷ്യൂ എടുക്കാനും ഉപയോഗിച്ച ടിഷ്യൂ കളയാനും പ്രത്യേക ബിൻ തേടേണ്ട സാഹചര്യം ഒഴിവാക്കുന്ന രീതിയിൽ ചെറിയ വേസ്റ്റ് ബിൻ ഉൾപ്പെടുത്തി രൂപകൽപ്പന ചെയ്തതാണ് ഇത്.
ഈ ആശയത്തിന് ഇതിനകം പേറ്റന്റ് ലഭിച്ചതായും, ആശയം മുതൽ രൂപകൽപ്പനയും നടപടിക്രമങ്ങളും വരെ എല്ലാം നിഷ തന്നെയാണ് ചെയ്തതെന്നും സണ്ണി അഭിമാനത്തോടെ പറഞ്ഞു.
“അവൾ വളരെ ബുദ്ധിമതിയാണ്. തുടക്കം മുതൽ ഒടുക്കം വരെ അവൾ തന്നെ പരിശ്രമിച്ചു,” എന്നാണ് സണ്ണിയുടെ പ്രതികരണം.
നഗരത്തിലെ പൊടിപടലങ്ങൾ കാരണം നിഷയ്ക്കും അലർജി ഉണ്ടെന്നും, ടിഷ്യൂകൾ അലക്ഷ്യമായി ഇടുന്നതിനെ തുടർന്ന് ഉണ്ടായ ഒരു ചെറിയ സംഭവമാണ് ഈ കണ്ടുപിടിത്തത്തിന് തുടക്കമായതെന്നും താരം വ്യക്തമാക്കി.
ഒരുദിവസം ടിഷ്യൂ ബോക്സിനോട് ചേർത്ത് ഒരു ഡിസ്പോസിബിൾ കപ്പ് ടേപ്പ് ഉപയോഗിച്ച് ഒട്ടിച്ചിരുന്നതാണ് നിഷയുടെ ആദ്യ പ്രോട്ടോടൈപ്പ്. അതാണ് പിന്നീട് ‘ബൂ ബോക്സ്’ ആയി രൂപാന്തരപ്പെട്ടത്.
2017-ൽ മഹാരാഷ്ട്രയിലെ ലാതൂരിൽ നിന്നാണ് സണ്ണി ലിയോൺ ഭർത്താവ് ഡാനിയേൽ വെബറിനൊപ്പം നിഷയെ ദത്തെടുത്തത്. പിന്നീട് വാടക ഗർഭധാരണത്തിലൂടെ നോഹയും അഷറും എന്ന ഇരട്ട ആൺകുട്ടികളുടെ മാതാപിതാക്കളായി.
മൂന്ന് കുഞ്ഞുങ്ങളും ജീവിതത്തിൽ ഒരേ ദിവസമാണ് എത്തിയതെന്ന് സണ്ണി മുമ്പ് പങ്കുവെച്ചിട്ടുണ്ട്.
മകളുടെ സംരംഭകത്വം കുടുംബത്തിൽ സന്തോഷം നിറച്ചിരിക്കുകയാണെന്ന് താരം വ്യക്തമാക്കി.
ENGLISH SUMMARY
Bollywood actor Sunny Leone revealed that her 10-year-old daughter Nisha has invented and patented a 2-in-1 tissue holder called the “Boo Box.” Nisha has already started earning through her innovation. Sunny shared the proud moment during Farah Khan’s show, highlighting her daughter’s creativity and entrepreneurial spirit.
