പ്രേക്ഷകരുടെ പോക്കറ്റ് കീറും; കേരളത്തിൽ സിനിമാ ടിക്കറ്റ് നിരക്ക് വർധനവ് ഉടൻ
തിരുവനന്തപുരം ∙ കേരളത്തിലെ സിനിമാ പ്രേക്ഷകർക്ക് അധിക ചെലവുണ്ടാക്കുന്ന തീരുമാനം ഉടൻ പ്രാബല്യത്തിൽ വരാനിടയുണ്ട്. സംസ്ഥാനത്ത് സിനിമാ ടിക്കറ്റ് നിരക്കുകൾ വർധിപ്പിക്കുന്നതിനുള്ള നടപടികളിലേക്കാണ് സർക്കാർ നീങ്ങുന്നത്.
ടിക്കറ്റിന് 5 മുതൽ 15 രൂപ വരെ വർധനവ് വരാനാണ് നിലവിലെ സൂചനകൾ.
സർവീസ് ചാർജും സെസും പുനഃക്രമീകരിക്കാൻ സർക്കാർ നിയോഗിച്ച സമിതി ഈ ആഴ്ച റിപ്പോർട്ട് സമർപ്പിക്കുമെന്ന് അറിയുന്നു. നിലവിലെ സാമ്പത്തിക സാഹചര്യങ്ങൾ പരിഗണിച്ച് സെസ് തുക വർധിപ്പിക്കണമെന്നതാണ് സമിതിയുടെ പ്രധാന ശുപാർശ.
സർവീസ് ചാർജ് പുതുക്കുന്നതിൽ നേരത്തെ തന്നെ ധാരണയായിരുന്നുവെന്നും സർക്കാർ വൃത്തങ്ങൾ അറിയിച്ചു.
സെസ് വർധനവിലൂടെ ലഭിക്കുന്ന അധിക വരുമാനം ചലച്ചിത്ര മേഖലയിലെ കലാകാരന്മാരുടെയും തൊഴിലാളികളുടെയും ക്ഷേമത്തിനായി വിനിയോഗിക്കാനാണ് സർക്കാരിന്റെ പദ്ധതി.
സിനിമാ മേഖലയുമായി ബന്ധപ്പെട്ട പ്രവർത്തകർക്കു കൂടുതൽ സുരക്ഷയും സാമൂഹിക പിന്തുണയും ഉറപ്പാക്കുന്നതിന്റെ ഭാഗമായാണ് നീക്കം.
സമിതിയുടെ ശുപാർശകൾ വലിയ ഭേദഗതികളില്ലാതെ അംഗീകരിക്കാനാണ് സാധ്യത. പുതിയ നിരക്കുകൾ പ്രാബല്യത്തിൽ വന്നാൽ പ്രേക്ഷകർക്ക് ടിക്കറ്റിനായി കൂടുതൽ തുക ചെലവഴിക്കേണ്ടിവരും.
ഇതുസംബന്ധിച്ച ഔദ്യോഗിക വിജ്ഞാപനം അടുത്ത ദിവസങ്ങളിൽ പുറത്തിറങ്ങാനാണ് സാധ്യത. അന്തിമ തീരുമാനം സർക്കാർ പ്രഖ്യാപനത്തോടെ വ്യക്തമായേക്കും.
English Summary
The Kerala government is likely to increase cinema ticket prices in the state, with a proposed hike of ₹5 to ₹15 per ticket. A government-appointed committee reviewing service charges and cess is expected to submit its report this week. The main recommendation is to raise the cess considering current economic conditions. The additional revenue is planned to be used for the welfare of artists and workers in the film industry. An official notification is expected soon after the government takes a final decision.
kerala-cinema-ticket-price-hike-likely
Kerala Government, Cinema Ticket Rate, Ticket Price Hike, Film Industry Welfare, Service Charge, Entertainment News, Kerala Cinema
