ഡോഗ് ഹോസ്റ്റലുകൾക്കായി അര ഏക്കറെങ്കിലും വിസ്തൃതിയുള്ള ഭൂമി
ആലപ്പുഴ ∙ സ്ഥലപരിമിതിയും ജനവാസ മേഖലകളിലെ ശക്തമായ പൊതുജന എതിർപ്പും വെല്ലുവിളിയായതോടെ, ഡോഗ് ഷെൽട്ടറുകൾ സ്ഥാപിക്കുന്നതിനായി വനഭൂമിയോട് ചേർന്ന വിജന പ്രദേശങ്ങളിൽ ഭൂമി കണ്ടെത്താനുള്ള നടപടികൾ സംസ്ഥാനത്ത് ആരംഭിച്ചു.
വനപ്രദേശങ്ങളിലും വനമില്ലാത്ത ജില്ലകളിൽ കൃഷിക്കും ജനവാസത്തിനും അനുയോജ്യമല്ലാത്ത ആൾപ്പാർപ്പില്ലാത്ത സ്ഥലങ്ങളിലുമാണ് അര ഏക്കറെങ്കിലും വിസ്തൃതിയുള്ള ഭൂമി ഡോഗ് ഹോസ്റ്റലുകൾക്കായി കണ്ടെത്തുന്നത്.
ജില്ലാ കളക്ടർമാരുടെ നേതൃത്വത്തിലാണ് ഭൂമി തെരച്ചിൽ പുരോഗമിക്കുന്നത്.
തിരുവനന്തപുരം ജില്ലയിലെ കല്ലറ, പാങ്ങോട് മേഖലകൾ ഉൾപ്പെടെ കൊല്ലം, പത്തനംതിട്ട, കോട്ടയം, ഇടുക്കി ജില്ലകളിലെ വനമേഖലകളോട് ചേർന്ന പ്രദേശങ്ങളിലാണ് ഷെൽട്ടറുകൾക്കായി ഭൂമി കണ്ടെത്താൻ ജില്ലാ മൃഗസംരക്ഷണ ഓഫീസറും തദ്ദേശ സ്വയംഭരണ വകുപ്പ് ജോയിന്റ് ഡയറക്ടറും നേതൃത്വം നൽകുന്നത്.
സ്ഥലം കണ്ടെത്തിയാൽ എട്ടടിയോളം ഉയരമുള്ള വേലി സ്ഥാപിച്ച് സുരക്ഷ ഒരുക്കുന്നതിനും, മഴയും വെയിലും ബാധിക്കാതെ നായകളെ പാർപ്പിക്കുന്നതിനും ഭക്ഷണം പാകം ചെയ്യുന്നതിനുള്ള അടുക്കള സൗകര്യം ഉൾപ്പെടെയുള്ള അടിസ്ഥാന സംവിധാനങ്ങൾ ഒരുക്കുന്നതിനുമായി ഫണ്ടും അനുവദിച്ചിട്ടുണ്ട്.
തെരുവുനായ നിയന്ത്രണവും പേവിഷബാധ തടയലും ലക്ഷ്യമാക്കി സുപ്രീം കോടതിയുടെ നിർദേശത്തിന്റെ അടിസ്ഥാനത്തിലാണ് തദ്ദേശ സ്വയംഭരണ വകുപ്പും മൃഗസംരക്ഷണ വകുപ്പും ചേർന്ന് സംസ്ഥാന സർക്കാർ ഷെൽട്ടറിംഗ് പദ്ധതി രൂപീകരിച്ചത്.
സ്ഥലപരിമിതിയും ജനസാന്ദ്രതയും കാരണം എ.ബി.സി (ആനിമൽ ബർത്ത് കൺട്രോൾ) പദ്ധതി നടപ്പാക്കുന്നതിൽ ബുദ്ധിമുട്ടുകൾ നേരിടുന്ന സാഹചര്യത്തിലാണ് ജനവാസമില്ലാത്ത പ്രദേശങ്ങൾ ഷെൽട്ടറുകൾക്കായി പരിഗണിക്കാൻ തീരുമാനിച്ചത്.
ജന്തുക്ഷേമ സംഘടനകളുടെ പങ്കാളിത്തം
സർക്കാർ ഉടമസ്ഥതയിലുള്ള ഷെൽട്ടറുകൾക്ക് പുറമെ മൃഗസ്നേഹികളും ജന്തുക്ഷേമ സംഘടനകളും ഷെൽട്ടറിംഗ് ചുമതല ഏറ്റെടുക്കാൻ തയ്യാറായി മൃഗസംരക്ഷണ വകുപ്പിനെ സമീപിച്ചിട്ടുണ്ട്.
തിരുവനന്തപുരം നഗരത്തിൽ വനിതാ പൊലീസ് ഉദ്യോഗസ്ഥയുടെ വീട്ടിൽ നിന്ന് പിടികൂടിയ അമ്പതിലധികം നായകൾക്ക് ഷെൽട്ടർ ഒരുക്കിയ പൂവാർ ആസ്ഥാനമായ സംഘടന ഉൾപ്പെടെ ഒരു ഡസനോളം സംഘടനകൾ ഇതിനകം തന്നെ തിരുവനന്തപുരം നഗരസഭയടക്കമുള്ള തദ്ദേശ സ്ഥാപനങ്ങളിൽ താൽപ്പര്യപത്രം സമർപ്പിച്ചിട്ടുണ്ട്.
നായകളുടെ പരിപാലനത്തിനായി സംഘടനകൾക്ക് നൽകേണ്ട ചെലവ് സംബന്ധിച്ച തീരുമാനമുണ്ടായാൽ, നായകളെ ജന്തുക്ഷേമ സംഘടനകളുടെ ഷെൽട്ടറുകളിലേക്ക് മാറ്റാൻ കഴിയുമെന്നാണ് അധികൃതർ വ്യക്തമാക്കുന്നത്.
കഴിഞ്ഞ മാസം സുപ്രീം കോടതിയിൽ നിന്നുണ്ടായ ഉത്തരവിന്റെ അടിസ്ഥാനത്തിൽ മിക്ക ജില്ലകളിലും ഷെൽട്ടറിംഗിന് അനുയോജ്യമായ സ്ഥലങ്ങൾ കണ്ടെത്തിയിട്ടുണ്ട്.
അവിടങ്ങളിൽ ആവശ്യമായ സൗകര്യങ്ങൾ ഒരുക്കുന്നതിന് നടപടികൾ സ്വീകരിക്കുമെന്നും, സൗകര്യങ്ങൾ വിലയിരുത്തിയ ശേഷം അന്തിമ തീരുമാനമെടുക്കുമെന്നും തദ്ദേശ സ്വയംഭരണ വകുപ്പിലെ ജോയിന്റ് ഡയറക്ടർ അറിയിച്ചു.
English Summary
Due to space constraints and public opposition in residential areas, the Kerala government has begun identifying vacant land near forest regions to set up dog shelters. District collectors, along with animal husbandry and local self-government officials, are leading efforts to find at least half-an-acre plots in uninhabited locations. The initiative follows Supreme Court directions aimed at controlling stray dogs and preventing rabies, with animal welfare organisations also coming forward to support shelter operations.
kerala-dog-shelters-forest-adjacent-land-search-stray-dog-control
dog shelter, stray dog control, Kerala government, animal husbandry department, local self government department, forest adjacent land, animal welfare organisations, Supreme Court order, rabies prevention
