മലയാളത്തിലെ പ്രിയഗാനങ്ങളുടെ ശില്പി; സംഗീതസംവിധായകൻ എസ്.പി വെങ്കിടേഷ് അന്തരിച്ചു
ചെന്നൈ: പ്രശസ്ത സംഗീതസംവിധായകൻ എസ്.പി വെങ്കിടേഷ് (70) അന്തരിച്ചു. ചെന്നൈയിലെ വസതിയിൽ ഹൃദയാഘാതത്തെ തുടർന്നായിരുന്നു അന്ത്യം.
മലയാള സിനിമയിലെ അനവധി പ്രിയഗാനങ്ങൾക്ക് സംഗീതം പകർന്ന വെങ്കിടേഷ്, ഹിറ്റ് ഗാനങ്ങളുടെ ശിൽപിയായി പ്രേക്ഷകഹൃദയങ്ങളിൽ ഇടം നേടിയ കലാകാരനാണ്.
‘വിണ്ണിലെ ഗന്ധർവ വീണകൾ’, ‘ശാന്തമീ രാത്രിയിൽ’, ‘തളിർവെറ്റിലയുണ്ടോ’, ‘പാതിരാക്കിളി വരൂ’ തുടങ്ങിയ ഗാനങ്ങൾ മലയാളികൾ ഇന്നും സ്നേഹത്തോടെ ഓർക്കുന്നവയാണ്.
നൂറിലേറെ സിനിമകൾക്ക് സംഗീതം നൽകിയ അദ്ദേഹം നിരവധി സിനിമകളിൽ പശ്ചാത്തല സംഗീതവും ഒരുക്കിയിട്ടുണ്ട്.
1971ൽ സംഗീത സംവിധായകൻ വിജയഭാസ്കറിനൊപ്പം ഗിറ്റാറിസ്റ്റായി സിനിമയിൽ തുടക്കം കുറിച്ച വെങ്കിടേഷ്, 1975ൽ കന്നഡ സിനിമകളിൽ അസിസ്റ്റന്റ് മ്യൂസിക് ഡയറക്ടറായി പ്രവർത്തിച്ചു.
‘പ്രേമയുദ്ധ’ എന്ന തെലുങ്ക് ചിത്രത്തിലൂടെ 1981ലാണ് സ്വതന്ത്ര സംഗീത സംവിധായകനായത്.
മലയാള സിനിമയിൽ രാഘവൻ മാസ്റ്റർ ഉൾപ്പെടെയുള്ള സംഗീതജ്ഞർക്കൊപ്പം മാൻഡലിൻ വായിച്ചും അസിസ്റ്റന്റ് മ്യൂസിക് ഡയറക്ടറായും പ്രവർത്തിച്ച അദ്ദേഹം,
സത്യൻ അന്തിക്കാട് സംവിധാനം ചെയ്ത ‘ടി.പി ബാലഗോപാലൻ എം.എ’യിൽ എ.ടി. ഉമ്മറിന്റെ അസിസ്റ്റന്റായി പശ്ചാത്തല സംഗീതം ഒരുക്കിയിട്ടുണ്ട്. പിന്നീട് മലയാള സിനിമയിലെ ശ്രദ്ധേയ സംഗീത സംവിധായകരിലൊരാളായി വെങ്കിടേഷ് മാറി.
ഡെന്നിസ് ജോസഫും തമ്പി കണ്ണന്താനവും ചേർന്നാണ് എസ്.പി വെങ്കിടേഷിനെ മലയാളത്തിൽ കൂടുതൽ പരിചിതനാക്കിയത്.
തമ്പി കണ്ണന്താനത്തിന്റെ ‘രാജാവിന്റെ മകൻ’ ചിത്രത്തിലെ സംഗീതവും പശ്ചാത്തല സംഗീതവും ഏറെ ശ്രദ്ധ നേടിയിരുന്നു.
തൊണ്ണൂറുകളോടെ മലയാള സിനിമയിൽ എസ്.പി വെങ്കിടേഷ് തിളങ്ങി. ‘രാജാവിന്റെ മകൻ’, ‘വിളംബരം’, ‘വഴിയോരക്കാഴ്ചകൾ’, ‘ദൗത്യം’, ‘ഭൂമിയിലെ രാജാക്കൻമാർ’, ‘വ്യൂഹം’, ‘കുട്ടേട്ടൻ’, ‘നാടോടി’, ‘കാഴ്ചയ്ക്കപ്പുറം’, ‘എന്നോടിഷ്ടം കൂടാമോ’, ‘കിലുക്കം’,
‘ജോണി വാക്കർ’, ‘ധ്രുവം’, ‘വാൽസല്യം’, ‘പൈതൃകം’, ‘സൈന്യം’, ‘സോപാനം’, ‘മിന്നാരം’, ‘മാന്നാർ മത്തായി സ്പീക്കിങ്’, ‘മാന്ത്രികം’, ‘സ്ഫടികം’ തുടങ്ങിയ നിരവധി ഹിറ്റ് ചിത്രങ്ങളിൽ അദ്ദേഹം സംഗീത സംവിധായകനായും പശ്ചാത്തല സംഗീത സംവിധായകനായും സജീവ സാന്നിധ്യമായിരുന്നു.
ENGLISH SUMMARY
Renowned music composer S.P. Venkitesh (70) passed away due to a heart attack at his residence in Chennai. Known for composing several evergreen Malayalam film songs, he worked on numerous hit movies and contributed extensively as a composer and background score artist, especially during the 1990s.
music-composer-sp-venkitesh-passed-away
SP Venkitesh, music composer, Malayalam cinema, Chennai, death news, heart attack, film music, background score, Rajavinte Makan, Kilukkam, Valsalyam, Spadikam, evergreen songs
