യുകെയില് ഇന്നൊവേറ്റര് ഓഫ് ദി ഇയര് പുരസ്കാരത്തിന് അര്ഹരായി മലയാളി സംരംഭകര്
കൊച്ചി: യുകെ സർക്കാരിന്റെ ഔദ്യോഗിക എൻഡോഴ്സ്മെന്റ് ബോഡി നൽകുന്ന ‘ഇന്നൊവേറ്റർ ഓഫ് ദി ഇയർ’ പുരസ്കാരത്തിന് മലയാളി സംരംഭകരായ ഹെർമർച്ചീസ് ബാലനും സിറിൽ റോയിയും അർഹരായി.
യുകെ ഹോം ഓഫിസിന്റെ Innovator Founder Visa പദ്ധതിയുടെ ഭാഗമായ ഔദ്യോഗിക എൻഡോഴ്സ്മെന്റ് ബോഡിയായ ‘എൻവെസ്റ്റേഴ്സ് ലിമിറ്റഡ്’ നൽകുന്ന പുരസ്കാരമാണ് ഇരുവരും നേടിയത്.
യുകെയിലെ ആരോഗ്യരംഗം നേരിടുന്ന ഗുരുതര വെല്ലുവിളികൾക്ക് പരിഹാരമാകുന്ന ലക്ഷ്യബോധമുള്ള സ്റ്റാർട്ടപ്പ് സംരംഭം വികസിപ്പിച്ചതിനാണ് ഈ അംഗീകാരം.
യുകെ ഗവൺമെന്റിന്റെ ഇന്നൊവേറ്റർ ഫൗണ്ടർ വിസയിലൂടെ യുകെയിലെത്തി ആശയങ്ങളെ വിജയകരമായ സംരംഭങ്ങളാക്കി മാറ്റുന്നവരെയാണ് പുരസ്കാരത്തിനായി തെരഞ്ഞെടുക്കുന്നത്.
ലോകത്തിന്റെ വിവിധ ഭാഗങ്ങളിൽ നിന്നുള്ള പത്ത് വിഭാഗങ്ങളിലായി 750-ലധികം സ്റ്റാർട്ടപ്പുകളെയാണ് പരിഗണനയ്ക്കെടുത്തത്.
ഇതിൽ നിന്നാണ് മലയാളി സംരംഭകരായ ഹെർമർച്ചീസിനെയും സിറിളിനെയും പുരസ്കാരത്തിനായി തെരഞ്ഞെടുത്തത്.
ഇന്ത്യയിൽ നിന്ന് യുകെ സ്റ്റാർട്ടപ്പ് വിസ നേടിയ ചുരുക്കം ചില സംരംഭകരിൽ ഹെർമർച്ചീസും സിറിലും ഉൾപ്പെടുന്നു.
യുകെയിലെ ആരോഗ്യപരിപാലന മേഖലയിലെ നിർണായക വെല്ലുവിളികൾക്ക് സാങ്കേതിക പരിഹാരങ്ങൾ വികസിപ്പിക്കുക എന്ന ലക്ഷ്യത്തോടെ ഇവർ ‘മെന്റർ മെർലിൻ യു.കെ. ലിമിറ്റഡ്’ എന്ന ഹെൽത്ത്കെയർ ട്രെയിനിംഗ്–ടെക്നോളജി കമ്പനിയാണ് ആരംഭിച്ചത്.
ഈ സംരംഭത്തിലൂടെ യുകെയിൽ നേരിട്ടിരുന്ന നഴ്സുമാരുടെ ക്ഷാമം മറികടക്കുന്നതിനായി ഫലപ്രദമായ പരിശീലന സംവിധാനങ്ങളും സാങ്കേതിക പരിഹാരങ്ങളും അവതരിപ്പിച്ചതാണ് പുരസ്കാരത്തിന് പ്രധാനമായി പരിഗണിക്കപ്പെട്ടത്.
2019ൽ നിലവിൽ വന്ന സ്റ്റാർട്ടപ്പ് വിസയും ഇന്നൊവേറ്റർ ഫൗണ്ടർ വിസയും ആരംഭിച്ചതിനുശേഷം ഇത്തരത്തിൽ അവാർഡ് നൽകുന്നത് ഇതാദ്യമായാണെന്ന് അധികൃതർ അറിയിച്ചു.
തുടക്കം മുതൽ ഈ പദ്ധതിയുടെ ഭാഗമായി എത്തിയ എല്ലാ സംരംഭകരെയും പരിഗണിച്ച ശേഷമാണ് ഹെർമർച്ചീസിനെയും സിറിലിനെയും പുരസ്കാരത്തിനായി തെരഞ്ഞെടുത്തത്.
ഇന്നൊവേറ്റർ ഓഫ് ദി ഇയർ പുരസ്കാരത്തിനായി മത്സരിച്ച നൂറുകണക്കിന് അന്താരാഷ്ട്ര കമ്പനികളിൽ ദീർഘവീക്ഷണമുള്ള ആശയം, ധീരമായ കാഴ്ചപ്പാട്, കാര്യക്ഷമമായ നിർവഹണം, സാമൂഹിക സ്വാധീനം എന്നിവയിലൂടെ ‘മെന്റർ മെർലിൻ’ വ്യത്യസ്തമായി തിളങ്ങിയതായി വിലയിരുത്തപ്പെട്ടു.
വെറും നാല് വർഷം കൊണ്ടാണ് ഈ സ്ഥാപനം ദേശീയ തലത്തിൽ അംഗീകരിക്കപ്പെട്ട സ്ഥാപനമായി വളർന്നത്.
കേരളത്തിനും ഇന്ത്യയുടെ വളർന്നുവരുന്ന ആഗോള സ്റ്റാർട്ടപ്പ് സാന്നിധ്യത്തിനും അഭിമാനകരമായ നേട്ടമാണ് ഈ പുരസ്കാരം.
സാമൂഹിക ഉത്തരവാദിത്വം നിലനിർത്തിക്കൊണ്ട് ആഗോളതലത്തിൽ പ്രസക്തമായ പരിഹാരങ്ങൾ സൃഷ്ടിക്കാൻ ശ്രമിക്കുന്ന ഇന്ത്യൻ സംരംഭകർക്ക് ഈ നേട്ടം പ്രചോദനമാകുമെന്ന് ഇരുവരും പറഞ്ഞു.
തുടക്കം മുതൽ തങ്ങൾക്ക് പിന്തുണയും സഹകരണവും നൽകിയ എല്ലാവർക്കും ഈ പുരസ്കാരം സമർപ്പിക്കുന്നതായി ഹെർമർച്ചീസ് പറഞ്ഞു.
കേരളത്തിൽ നിന്ന് കൂടുതൽ യുവസംരംഭകർ ആശയങ്ങളുമായി മുന്നോട്ട് വരാനും ആഗോള അവസരങ്ങൾ തേടാനും ഈ അംഗീകാരം പ്രചോദനമാകുമെന്ന് സിറിൽ അഭിപ്രായപ്പെട്ടു.
തൃശൂർ ഇരിങ്ങാലക്കുട സ്വദേശിയാണ് ഹെർമർച്ചീസ്. കോട്ടയം കൈപ്പുഴ സ്വദേശിയാണ് സിറിൽ റോയ്.
2023ലും 2024ലും യുകെ എൻഎച്ച്എസിന്റെ 75-ാം വാർഷിക പ്രസിദ്ധീകരണത്തിലും കോമൺവെൽത്തിന്റെ 75-ാം വാർഷിക പ്രസിദ്ധീകരണത്തിലും മെന്റർ മെർലിൻ യു.കെ. ലിമിറ്റഡ് ഇടം നേടിയിരുന്നു.
നിക്ഷേപ–ഇന്നൊവേഷൻ മേഖലയിൽ പ്രവർത്തിക്കുന്ന യുകെ ആസ്ഥാനമായ പ്രമുഖ സ്ഥാപനമാണ് എൻവെസ്റ്റേഴ്സ് ലിമിറ്റഡ്.
യുകെയിൽ നൂതന സംരംഭങ്ങൾ ആരംഭിക്കാനും അവയെ വിപുലീകരിക്കാനും ആഗ്രഹിക്കുന്ന സംരംഭകർക്കായി മെന്റർഷിപ്പ്, നിക്ഷേപക ശൃംഖലകൾ, അടിസ്ഥാന സൗകര്യങ്ങൾ എന്നിവ ഒരുക്കുന്ന സ്ഥാപനമാണിത്.
English Summary
Malayali entrepreneurs Hermarchies Balan and Cyril Roy have won the UK ‘Innovator of the Year’ award for developing a healthcare-focused startup that addresses key challenges in the UK health sector. Their company, Mentor Merlin UK Ltd, was recognised for its technology-driven solutions and contribution to easing the nursing shortage in the UK.
malayali-entrepreneurs-win-uk-innovator-of-the-year-award
UK Innovator of the Year, Malayali entrepreneurs, Hermarchies Balan, Cyril Roy, Mentor Merlin UK, UK healthcare startup, Innovator Founder Visa, Kerala startup, Indian startups, UK awards
