‘പറയാത്ത കാര്യങ്ങൾ പ്രചരിപ്പിക്കുന്നു’; നുണ പ്രചരിപ്പിക്കുന്നവർ തെളിയിക്കണമെന്ന് വീണാ ജോർജിന്റെ വെല്ലുവിളി
തിരുവനന്തപുരം ∙ തനിക്കെതിരെ സോഷ്യൽ മീഡിയ വഴി നടക്കുന്ന വ്യാജപ്രചാരണങ്ങൾക്കെതിരെ നിയമനടപടിക്കൊരുങ്ങി ആരോഗ്യ മന്ത്രി വീണാ ജോർജ്.
മന്ത്രി പറയാത്ത കാര്യങ്ങൾ പറഞ്ഞുവെന്ന തരത്തിൽ പോസ്റ്ററുകളും പ്രചാരണങ്ങളും വ്യാപകമായി പ്രചരിപ്പിക്കുന്നവർക്കെതിരെയാണ് നടപടി സ്വീകരിക്കാനൊരുങ്ങുന്നതെന്ന് മന്ത്രി വ്യക്തമാക്കി.
കേരളത്തിലെ സർക്കാർ ആശുപത്രികളിലെ സൗകര്യങ്ങൾ കണ്ടതിനെ തുടർന്ന് പ്രസവം നിർത്തിയ സ്ത്രീ വീണ്ടും പ്രസവിക്കാൻ തയ്യാറായെന്നും അതിനായി ഭർത്താവിനോട് വഴക്കിടുകയാണെന്നും മന്ത്രി പറഞ്ഞുവെന്ന തരത്തിലുള്ള പോസ്റ്ററുകളാണ് ചില സോഷ്യൽ മീഡിയ പ്രൊഫൈലുകൾ വഴി വ്യാപകമായി പ്രചരിക്കുന്നത്.
എന്നാൽ താൻ ഇത്തരമൊരു പ്രസ്താവന നടത്തിയിട്ടില്ലെന്നും, ഈ നുണ പ്രചരിപ്പിക്കുന്നവർ അത് എവിടെയാണ് പറഞ്ഞതെന്ന് തെളിയിക്കണമെന്നും മന്ത്രി വെല്ലുവിളിച്ചു.
കഴിഞ്ഞ പത്ത് വർഷത്തിനിടെ കേരളത്തിലെ ആരോഗ്യരംഗം കൈവരിച്ച നേട്ടങ്ങളെക്കുറിച്ച് താൻ പലതവണ പറഞ്ഞിട്ടുണ്ടെന്ന് മന്ത്രി ഫേസ്ബുക്ക് കുറിപ്പിൽ പറഞ്ഞു.
എന്നാൽ രാഷ്ട്രീയ ലക്ഷ്യത്തോടെ ചില കേന്ദ്രങ്ങൾ ആസൂത്രിതമായി വ്യാജവാർത്തകൾ ചമയ്ക്കുകയാണെന്നും മന്ത്രി ആരോപിച്ചു.
ഒരേ നുണ ഒരേ സമയം വിവിധ സോഷ്യൽ മീഡിയ പ്ലാറ്റ്ഫോമുകളിൽ പ്രചരിപ്പിക്കുന്നത് ഒരു പ്രത്യേക ‘ഫാക്ടറിയിൽ’ നിന്നുള്ള ഉൽപ്പന്നമാണെന്ന് ജനങ്ങൾക്ക് തിരിച്ചറിയാനാകുമെന്നും മന്ത്രി പരിഹസിച്ചു.
സത്യം പറഞ്ഞ് വോട്ട് നേടാൻ കഴിയാത്തവരാണ് ഇത്തരം ഹീനമായ മാർഗങ്ങൾ സ്വീകരിക്കുന്നതെന്നും, വ്യാജപ്രചരണങ്ങൾക്കെതിരെ ശക്തമായ നിയമനടപടി സ്വീകരിക്കുമെന്നും മന്ത്രി വ്യക്തമാക്കി.
English Summary
Kerala Health Minister Veena George has said she will initiate legal action against those spreading fake posts and posters on social media attributing false statements to her. She denied making the controversial remarks and challenged those circulating the content to prove where she allegedly said it. The minister termed the campaign politically motivated and warned of strong legal steps.
veena-george-legal-action-against-fake-social-media-campaign
Veena George, Kerala Health Minister, Fake News, Social Media, Legal Action, Kerala, Health Sector, Facebook Post, Political Propaganda, Kerala News
