സ്റ്റേഷനു മുന്നിൽ കാറിനകത്ത് മദ്യപാനം: ഗ്രേഡ് എഎസ്ഐ ഉൾപ്പെടെ ആറു പൊലീസുകാർക്ക് എട്ടിന്റെ പണി
തിരുവനന്തപുരം: കഴക്കൂട്ടം പൊലീസ് സ്റ്റേഷനു മുന്നിൽ നിർത്തിയിട്ട സ്വകാര്യ വാഹനത്തിനകത്ത് ഇരുന്ന് പൊലീസുകാർ മദ്യപിച്ച സംഭവത്തിൽ കടുത്ത നടപടി. ഗ്രേഡ് എഎസ്ഐ ഉൾപ്പെടെ ആറു പൊലീസ് ഉദ്യോഗസ്ഥരെ സസ്പെൻഡ് ചെയ്തു.
കൂടാതെ ഇവരെ നല്ല നടപ്പ് പരിശീലനത്തിനും (Good Conduct Training) അയയ്ക്കും.
സസ്പെൻഡ് ചെയ്യപ്പെട്ടവർ കഴക്കൂട്ടം പൊലീസ് സ്റ്റേഷനിലെ ഉദ്യോഗസ്ഥരാണ്. ഗ്രേഡ് എഎസ്ഐ ബിനു, സിവിൽ പൊലീസ് ഓഫീസർമാരായ (സിപിഒ) രതീഷ്, മനോജ്, അരുൺ, അഖിൽരാജ് എന്നിവരും മറ്റൊരു സിപിഒയായ അരുണുമാണ് നടപടി നേരിട്ടത്.
പൊലീസ് സ്റ്റേഷനു തൊട്ടുമുന്നിലെ റോഡരികിൽ ഉദ്യോഗസ്ഥർ സിവിൽ ഡ്രസ്സിൽ കാറിനകത്ത് ഇരുന്ന് മദ്യപിക്കുന്ന ദൃശ്യങ്ങൾ ഇന്നലെ പുറത്തുവന്നിരുന്നു. ഒരു വ്യക്തി പകർത്തിയ ഈ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിച്ചതോടെയാണ് സംഭവം പുറത്തറിഞ്ഞത്.
പ്രാഥമിക അന്വേഷണത്തിൽ ഇത് ഗുരുതരമായ പെരുമാറ്റവീഴ്ചയാണെന്ന് കണ്ടെത്തിയതിനെ തുടർന്നാണ് ഉദ്യോഗസ്ഥർക്കെതിരെ നടപടിയെടുത്തത്. പൊലീസുകാരുടെ തന്നെ സ്വകാര്യ സ്കോർപിയോ കാറിലായിരുന്നു മദ്യപാനം.
വാഹനമോടിച്ചിരുന്ന സിപിഒയും മദ്യപിച്ചിരുന്നതായി ദൃശ്യങ്ങളിൽ വ്യക്തമാണ്.
മദ്യപിച്ച ശേഷം ഇതേ വാഹനത്തിൽ ഉദ്യോഗസ്ഥർ ഒരു വിവാഹ സൽക്കാരത്തിൽ പങ്കെടുക്കാൻ പോയതായും അന്വേഷണത്തിൽ കണ്ടെത്തിയിട്ടുണ്ട്. സംഭവത്തിൽ ആഭ്യന്തര വകുപ്പും പൊലീസ് മേധാവികളും വിശദമായ റിപ്പോർട്ട് തേടിയിട്ടുണ്ട്.
English Summary
Six police officers, including a Grade ASI, were suspended after visuals emerged showing them consuming alcohol inside a car parked outside the Kazhakootam Police Station in Thiruvananthapuram. The incident was termed a serious misconduct in the preliminary inquiry. The officers were also sent for good conduct training.
kazhakootam-police-drinking-alcohol-suspension
Kazhakootam Police Station, Kerala Police, Police Suspension, Alcohol Consumption, Police Misconduct, Thiruvananthapuram News, Law and Order
