കേരളത്തിൽ സ്വർണവില ഇന്ന് റെക്കോർഡ് ഉയരത്തിൽ
കേരളത്തിൽ സ്വർണവില ഇന്ന് വീണ്ടും ചരിത്രത്തിലെ ഏറ്റവും ഉയർന്ന നിരക്കിലെത്തി. ഗ്രാമിന് 495 രൂപയുടെ വൻ വർധനവോടെയാണ് സ്വർണവില 14,640 രൂപയായി ഉയർന്നത്.
ഇതോടെ ഒരു പവൻ സ്വർണത്തിന്റെ വില ഒറ്റയടിക്ക് 3,960 രൂപ വർധിച്ച് 1,17,120 രൂപയിലെത്തി. സംസ്ഥാനത്ത് ഇതുവരെ രേഖപ്പെടുത്തിയതിൽ ഏറ്റവും ഉയർന്ന സ്വർണനിരക്കാണിത്.
രാജ്യാന്തര വിപണിയിൽ ഉണ്ടായ ശക്തമായ കുതിപ്പാണ് ആഭ്യന്തര വിപണിയിലും സ്വർണവിലയെ റെക്കോർഡ് ഉയരത്തിലേക്ക് എത്തിച്ചത്.
ഔൺസിന് 118 ഡോളർ വർധിച്ച് രാജ്യാന്തര സ്വർണവില 4,953 ഡോളറിലെത്തിയതോടെയാണ് കേരളത്തിൽ വലിയ വർധനവുണ്ടാകുമെന്ന സൂചനകൾ നേരത്തെ തന്നെ വിപണിയിൽ ഉണ്ടായിരുന്നത്.
അതിന്റെ പ്രതിഫലനമാണ് ഇന്ന് സംസ്ഥാനത്ത് കണ്ടത്. ആഗോളതലത്തിലെ രാഷ്ട്രീയവും സാമ്പത്തികവുമായ അനിശ്ചിതത്വങ്ങളാണ് സ്വർണവില കുതിക്കാൻ പ്രധാന കാരണം.
അമേരിക്കൻ പ്രസിഡന്റ് ഡൊണാൾഡ് ട്രംപ് മുന്നോട്ടുവച്ച ഗ്രീൻലൻഡ് അടക്കമുള്ള വിഷയങ്ങളുമായി ബന്ധപ്പെട്ട നയതന്ത്ര തർക്കങ്ങൾ, യുഎസിൽ അടിസ്ഥാന പലിശനിരക്ക് കുറയാനുള്ള സാധ്യതകൾ എന്നിവയാണ് രാജ്യാന്തര വിപണിയിൽ സുരക്ഷിത നിക്ഷേപമെന്ന നിലയിൽ സ്വർണത്തിലേക്ക് നിക്ഷേപകരെ കൂടുതൽ ആകർഷിച്ചത്.
ഇതോടെ സ്വർണത്തിനുള്ള ഡിമാൻഡ് ഗണ്യമായി ഉയർന്നു. അതേസമയം, ഡോളറിനെതിരെ ഇന്ത്യൻ രൂപ റെക്കോർഡ് താഴ്ചയിൽ തുടരുന്നതും കേരളത്തിൽ സ്വർണവില ഉയരാൻ കാരണമായ പ്രധാന ഘടകങ്ങളിലൊന്നാണ്.
രൂപയുടെ മൂല്യം കുറയുമ്പോൾ സ്വർണത്തിന്റെ ഇറക്കുമതി ചെലവ് വർധിക്കുകയും അതിന്റെ നേരിട്ടുള്ള ബാധ്യത ആഭ്യന്തര വിപണിയിലെ വിലയിൽ പ്രതിഫലിക്കുകയും ചെയ്യുന്നു.
ഇതാണ് സംസ്ഥാനത്ത് സ്വർണവില രാജ്യാന്തര വിപണിയെക്കാൾ വേഗത്തിൽ ഉയരാൻ ഇടയാക്കുന്നത്.
വിവാഹ സീസൺ അടുക്കുന്ന സാഹചര്യത്തിൽ സ്വർണവിലയിലെ ഈ കുതിപ്പ് ഉപഭോക്താക്കളെയും വ്യാപാരികളെയും ഒരുപോലെ ആശങ്കയിലാക്കിയിട്ടുണ്ട്.
രാജ്യാന്തര രാഷ്ട്രീയ അനിശ്ചിതത്വങ്ങളും കറൻസി വിപണിയിലെ ചലനങ്ങളും തുടരുന്ന സാഹചര്യത്തിൽ അടുത്ത ദിവസങ്ങളിലും സ്വർണവിലയിൽ വലിയ മാറ്റങ്ങൾ ഉണ്ടാകാനുള്ള സാധ്യത നിലനിൽക്കുന്നതായാണ് വിപണി നിരീക്ഷകരുടെ വിലയിരുത്തൽ.
