I prefer his flat, safe place, night aayalum kuzhappamilla…ചാറ്റുകളുടെ സ്ക്രീൻഷോട്ടുകൾ പുറത്ത് വിട്ട് ഫെനി നൈനാൻ
പാലക്കാട്: പാലക്കാട് എംഎൽഎ രാഹുൽ മാങ്കൂട്ടത്തിലിനെതിരേ ഉയർന്ന ലൈംഗിക പീഡന പരാതിയിൽ പ്രതികരണവുമായി യൂത്ത് കോൺഗ്രസ് നേതാവ് ഫെനി നൈനാൻ.
രാഹുലിന്റെ അടുത്ത സുഹൃത്തും അനുയായിയുമായ ഫെനി ഫെയ്സ്ബുക്കിലൂടെയാണ് തന്റെ വിശദീകരണം പുറത്തുവിട്ടത്.
ഫെനി നൈനാനെ കേന്ദ്രീകരിച്ചും അന്വേഷണം പുരോഗമിക്കുന്നതിനിടെയാണ്, അതിജീവിതയുമായി നടത്തിയതായി അവകാശപ്പെടുന്ന നിർണായക ചാറ്റുകളുടെ സ്ക്രീൻഷോട്ടുകൾ ഫെനി പുറത്ത് വിട്ടത്.
പരാതിക്കാരി രാഹുൽ എംഎൽഎയെ കാണാൻ പലവട്ടം തന്നോട് അവസരം ചോദിച്ചിരുന്നുവെന്ന് ഫെനി കുറിച്ചു.
തുടക്കത്തിൽ ഒഴിവാക്കാൻ ശ്രമിച്ചെങ്കിലും പിന്നീട് പാലക്കാട് ഓഫീസിൽ ചെന്നാൽ കാണാമെന്ന് പറഞ്ഞപ്പോൾ, ഓഫീസിൽ സ്വകാര്യത ഇല്ലെന്ന കാരണം ചൂണ്ടിക്കാട്ടി പരാതിക്കാരി അത് നിരസിച്ചതായും ഫെനി പറയുന്നു.
തുടർന്ന് രാഹുൽ എംഎൽഎയുടെ ഫ്ലാറ്റിൽ കാണണമെന്നും മൂന്ന്–നാല് മണിക്കൂർ സമയം വേണമെന്നും പരാതിക്കാരി ആവശ്യപ്പെട്ടുവെന്നും, രാത്രി ആയാലും പ്രശ്നമില്ലെന്ന് അവർ പറഞ്ഞുവെന്നും ഫെനി ആരോപിക്കുന്നു.
ഫ്ലാറ്റിൽ അസൗകര്യമാണെന്ന് പറഞ്ഞപ്പോൾ ഡ്രൈവിന് പോകാമെന്നും എംഎൽഎ ബോർഡ് വച്ച വാഹനം വേണ്ടെന്നും, പരാതിക്കാരി എത്തുന്ന വാഹനംമതി എന്നുമാണ് അവർ പറഞ്ഞതെന്ന് ഫെനി വിശദീകരിച്ചു.
“2024 ഏപ്രിലിൽ ബലാത്സംഗം ചെയ്തുവെന്ന് ആരോപിക്കുന്ന വ്യക്തിയെ, 2025 ഒക്ടോബറിൽ ‘I prefer his flat, safe place, night aayalum kuzhappamilla’ എന്ന് പറഞ്ഞ് കാണണമെന്ന് ആവശ്യപ്പെട്ടതിന്റെ തെളിവുകൾ എന്റെ കൈവശമുണ്ട്.
അതിനാലാണ് ബലാത്സംഗ പരാതി എന്നെ അത്ഭുതപ്പെടുത്തിയതും,” ഫെനി ഫെയ്സ്ബുക്കിൽ കുറിച്ചു.
ഇതിനുമുമ്പ് കേസിലെ പരാതിക്കാരിയുടെ മൊഴിയിൽ ഫെനി നൈനാനെതിരെയും ഗുരുതര ആരോപണങ്ങൾ ഉയർന്നിരുന്നു. രാഹുലിനെ കാണാനായി യുവതിയെ എത്തിച്ചതും പീഡനത്തിന് ശേഷം വഴിയിൽ ഇറക്കിവിട്ടതും ഫെനിയാണെന്നായിരുന്നു ആരോപണം.
എന്നാൽ, തനിക്കെതിരെയുള്ള ആരോപണങ്ങൾ പച്ചക്കള്ളമാണെന്നും ഇതിന് പിന്നിൽ വലിയ രാഷ്ട്രീയ ഗൂഢാലോചനയുണ്ടെന്നും ഫെനി പ്രതികരിച്ചിരുന്നു.
മൂന്നാമത്തെ പീഡനാരോപണത്തെ തുടർന്നാണ് ജനുവരി 11-ന് പുലർച്ചെ പാലക്കാട്ടെ ഒരു ഹോട്ടൽ മുറിയിൽ നിന്ന് രാഹുൽ മാങ്കൂട്ടത്തിലിനെ പൊലീസ് കസ്റ്റഡിയിലെടുത്തത്. നിലവിൽ അദ്ദേഹം പൊലീസ് കസ്റ്റഡിയിലാണ്.
English Summary
Youth Congress leader Fenny Nainan has responded to the sexual assault allegations against Palakkad MLA Rahul Mankootathil by releasing alleged chat screenshots with the complainant. In a Facebook post, Fenny claimed the complainant had repeatedly sought private meetings with the MLA, including at his flat, even months after the alleged assault. He termed the accusations against him false and alleged a political conspiracy. Rahul Mankootathil was taken into police custody on January 11 following the third allegation and remains under custody.
rahul-mankootathil-sexual-assault-case-fenny-nainan-response
Rahul Mankootathil, Fenny Nainan, Youth Congress, Sexual Assault Case, Palakkad, Kerala Politics, Police Custody
