ശ്രീകോവിലിലെ മുഴുവൻ സ്വർണവും ഘട്ടംഘട്ടമായി കടത്താനുള്ള ആസൂത്രിത പദ്ധതിയായിരുന്നു…പ്രത്യേക അന്വേഷണ സംഘം കോടതിയിൽ നൽകിയത് ഞെട്ടിക്കുന്ന റിപ്പോർട്ട്
ശബരിമല ശ്രീകോവിലിലെ മുഴുവൻ സ്വർണവും ഘട്ടംഘട്ടമായി കടത്താനുള്ള ആസൂത്രിത പദ്ധതിയായിരുന്നു പ്രതികൾക്കുണ്ടായിരുന്നതെന്ന് പ്രത്യേക അന്വേഷണ സംഘം (എസ്ഐടി) കണ്ടെത്തി.
ഹൈക്കോടതിയിൽ സമർപ്പിച്ച റിപ്പോർട്ടിലാണ് ഈ ഗുരുതര പരാമർശം ഉൾപ്പെടുത്തിയിരിക്കുന്നത്.
ശ്രീകോവിലിൽ സ്വർണം പൊതിഞ്ഞ എല്ലാ ഭാഗങ്ങളും ക്രമമായി നീക്കം ചെയ്ത് സ്മാർട്ട് ക്രിയേഷൻസിലെത്തിച്ച് സ്വർണം വേർതിരിച്ച് വിൽക്കാനായിരുന്നു പ്രതികളുടെ ലക്ഷ്യം.
ദ്വാരപാലക ശിൽപ്പങ്ങളും ഏഴ് ഭാഗങ്ങളുള്ള കട്ടിളപ്പാളികളും സംഘം ഇതിനകം തന്നെ കടത്തിയിരുന്നു.
തുടർന്ന് ശ്രീകോവിലിലെ മറ്റ് സ്വർണം പൊതിഞ്ഞ ഭാഗങ്ങൾ നീക്കം ചെയ്യാനുള്ള ശ്രമത്തിനിടെയാണ് കേസിന്റെ വിവരം പുറത്തറിയുന്നത്.
കേസിലെ ഒന്നാം പ്രതി ഉണ്ണികൃഷ്ണൻ പോറ്റി, പങ്കജ് ഭണ്ഡാരി, ഗോവർധൻ എന്നിവർ ചേർന്നാണ് ഈ കവർച്ചാ ഗൂഢാലോചന നടത്തിയതെന്ന് എസ്ഐടി റിപ്പോർട്ടിൽ വ്യക്തമാക്കുന്നു.
സ്വർണപ്പാളി വിഷയം ഹൈക്കോടതിയുടെ പരിഗണനയ്ക്ക് എത്തിയതോടെയാണ് പ്രതികളുടെ പദ്ധതി തകർന്നത്.
ഇതിന് പിന്നാലെ രക്ഷപ്പെടാനുള്ള മാർഗങ്ങൾ ചർച്ച ചെയ്യുന്നതിനായി മൂവരും ബെംഗളൂരുവിൽ രഹസ്യയോഗം ചേർന്നു.
കേസിൽ കുടുങ്ങിയാൽ സ്വീകരിക്കേണ്ട നടപടികൾ ഉൾപ്പെടെ അവിടെ ചർച്ച ചെയ്തതായും റിപ്പോർട്ടിൽ പറയുന്നു.
2025 ഒക്ടോബർ മാസത്തിലാണ് ഈ യോഗം നടന്നതെന്ന് മൊബൈൽ ടവർ ലൊക്കേഷൻ വിവരങ്ങളുടെ അടിസ്ഥാനത്തിൽ എസ്ഐടി കണ്ടെത്തി.
ഹൈക്കോടതിയുടെ ഇടപെടൽ ഉണ്ടായില്ലായിരുന്നുവെങ്കിൽ ശ്രീകോവിലിലെ മുഴുവൻ സ്വർണവും കടത്താനായിരുന്നുവെന്നും റിപ്പോർട്ടിൽ ചൂണ്ടിക്കാട്ടുന്നു.
കട്ടിളപ്പാളിയിൽ നിന്ന് 409 ഗ്രാം സ്വർണം വേർതിരിച്ചെടുത്ത് ബെല്ലാരിയിലെ സ്വർണവ്യാപാരിയായ ഗോവർധനയ്ക്ക് കൈമാറിയതായും കണ്ടെത്തിയിട്ടുണ്ട്.
ഗോവർധന്റെ ജാമ്യഹർജി എതിർത്ത് എസ്ഐടി സമർപ്പിച്ച റിപ്പോർട്ടിലാണ് ഈ നിർണായക വിവരങ്ങൾ ഉൾപ്പെടുത്തിയിരിക്കുന്നത്.
കേസിൽ കൂടുതൽ വിശദമായ അന്വേഷണം അനിവാര്യമാണെന്നും, ഉണ്ണികൃഷ്ണൻ പോറ്റിയെ ബെംഗളൂരുവിലെത്തിച്ച് വിശദമായി ചോദ്യം ചെയ്യണമെന്നും എസ്ഐടി ഹൈക്കോടതിയെ അറിയിച്ചു.
English Summary
The Special Investigation Team (SIT) has revealed that the accused had planned to smuggle the entire gold covering of the Sabarimala sanctum sanctorum in a phased manner. According to the report submitted to the High Court, gold-covered structures including door guardian idols and wooden panels were already removed and processed for sale. The conspiracy involved accused Unnikrishnan Potti, Pankaj Bhandari, and Govardhan. The plan collapsed after judicial intervention, following which the accused held a secret meeting in Bengaluru to discuss escape strategies. SIT has sought further detailed investigation and custodial interrogation.
sabarimala-gold-smuggling-sit-report-high-court
Sabarimala, Gold Smuggling, SIT Investigation, Kerala High Court, Devaswom Board, Temple Gold Theft, Crime News, Kerala News
