പാർട്ടിക്ക് പാര പണിയുന്നത് പതിവാക്കി പാർട്ടി പത്രം; ‘വീക്ഷണം’എഡിറ്റോറിയൽ വിവാദത്തിൽ
പാർട്ടിയുടെ ഔദ്യോഗിക നിലപാടുകളെ അവഗണിച്ച് സ്വന്തം വഴിയിലാണ് കോൺഗ്രസ് മുഖപത്രമായ വീക്ഷണം മുന്നേറുന്നതെന്ന വിമർശനങ്ങൾ ശക്തമാകുകയാണ്.
ബലാത്സംഗ പരാതിയിൽ കുടുങ്ങിയ എംഎൽഎ രാഹുല്മാങ്കൂട്ടത്തിനെ പാർട്ടി പ്രാഥമിക അംഗത്വത്തിൽ നിന്നും സസ്‌പെന്റ് ചെയ്ത സാഹചര്യത്തിൽ, അദ്ദേഹത്തെ വെളുപ്പിക്കുന്ന രീതിയിലുള്ള എഡിറ്റോറിയൽ പ്രസിദ്ധീകരിച്ചതോടെ വീക്ഷണം വീണ്ടും വിവാദത്തിൽ.
ഇത് ആദ്യമല്ല. കെ.എം. മാണിയുടെ മകൻ ജോസ് കെ. മാണിയെ യുഡിഎഫിലേക്ക് തിരിച്ചെത്തണമെന്ന് ആവശ്യപ്പെട്ടുകൊണ്ട് ഈ വർഷം മെയ് മാസത്തിൽ പ്രസിദ്ധീകരിച്ച എഡിറ്റോറിയലും വലിയ രാഷ്ട്രീയതർക്കങ്ങൾക്ക് വഴിവച്ചു.
പാർട്ടി നേതൃത്വത്തിന്റെ ഒരു ആഭ്യന്തര ചര്‍ച്ചയും ഇല്ലാതെ പ്രസിദ്ധീകരിച്ച ആ എഡിറ്റോറിയൽ അന്നും കടുത്ത വിമർശനങ്ങൾക്ക് ഇടയാക്കിയിരുന്നു.
ഇന്നത്തെ എഡിറ്റോറിയൽ രാഹുലിനെതിരെ സിപിഎം രാഷ്ട്രീയ ഗൂഢാലോചന ആസൂത്രണം ചെയ്യുകയാണെന്നു വാദിക്കുന്നു. “രാഷ്ട്രീയ ഗൂഢാലോചനയുടെ ഇരയാണ് രാഹുല്‍.
കോണ്‍ഗ്രസില്‍ വളരുന്ന യുവാക്കള്‍ സിപിഎമ്മിന് ഭയമാണ്” എന്ന വാദം മുന്നോട്ടുവെച്ചിട്ടുണ്ട്. പ്രതിപക്ഷ നേതാവും കെപിസിസി പ്രസിഡന്റും അടക്കം പാർട്ടി നേതൃത്വം രാഹുലിനെ വിമർശിച്ച് നിൽക്കുന്ന സാഹചര്യത്തിലാണ് ഈ നിലപാട്.
വീക്ഷണത്തിന്റെ ഈ പ്രവൃത്തിയിൽ മുതിർന്ന നേതാക്കൾ പരസ്യമായി അസ്വസ്ഥത പ്രകടിപ്പിച്ചു. പാർട്ടിയുടെ ഔദ്യോഗിക നിലപാടിന് പൂർണ്ണവിരുദ്ധമായ ഒരു എഴുത്താണ് വന്നതെന്നും, ഇത് ഒരിക്കലും അംഗീകരിക്കാനാകില്ലെന്നും കെപിസിസി പ്രസിഡന്റ് സണ്ണി ജോസഫ് വ്യക്തമാക്കി.
എഡിറ്റോറിയൽ പിൻവലിക്കാൻ നിർദേശം നൽകിയിട്ടുണ്ടെന്നും അദ്ദേഹം ഉറപ്പിച്ചു.
വീക്ഷണത്തിന്റെ എഡിറ്ററായി പ്രവർത്തിക്കുന്നത് കെപിസിസി വൈസ് പ്രസിഡൻറ് ജെയ്‌സൺ ജോസഫാണ്. എഡിറ്റോറിയൽ പ്രസിദ്ധീകരണത്തിൽ പാർട്ടി നയങ്ങളും മാധ്യമ പ്രൊഫഷണലിസവും പാലിക്കപ്പെടുന്നില്ലെന്ന വിമർശനം ഉയരുന്നു.
രാഹുലിനെ സംരക്ഷിക്കുന്ന തരത്തിലുള്ള എഡിറ്റോറിയൽ പ്രസിദ്ധീകരിച്ച നടപടി പാർട്ടിക്ക് വലിയ നാണക്കേടായതായി നേതാക്കൾ വിലയിരുത്തുന്നു.
ഇതിനിടെ, വിഷയത്തിൽ അനൗപചാരിക അന്വേഷണം തുടങ്ങാൻ ഉന്നത നേതൃത്വത്തിലൊരു ധാരണ ഉണ്ടായതായും സൂചനയുണ്ട്.
English Summary
Congress mouthpiece Veekshanam has triggered controversy again by publishing an editorial defending MLA Rahul Mankootathil, who is facing a rape allegation and has been suspended from the party. The editorial contradicts the official party stance, causing embarrassment to the Congress leadership.
This is not the first time Veekshanam has taken a stand contrary to party policy; a previous editorial urging Jose K. Mani to return to the UDF had also drawn criticism. Congress leaders, including KPCC president Sunny Joseph, have rejected the latest editorial and demanded corrections. There are indications that an informal inquiry may be initiated into the issue.
veekshanam-controversy-rahul-editorial-congress
Veekshanam, Congress Kerala, Rahul Mankootathil, editorial controversy, KPCC, Kerala politics, UDF, CPM allegations
