പുതിയ സൈബർ തട്ടിപ്പിനെ കരുതിയിരിക്കണം
തിരുവനന്തപുരം: ‘വ്യാജ സ്ക്രീൻ’, ‘ബ്ലാക്ക് സ്ക്രീൻ’ പ്രദർശിപ്പിച്ച് മൊബൈൽ ഫോണിലെ ബാങ്കിംഗ് വിവരങ്ങൾ കൈക്കലാക്കുന്ന പുതിയ തട്ടിപ്പ് രീതി ഇന്ത്യയിലേക്ക് വ്യാപിക്കുമെന്ന് വിദഗ്ധർ മുന്നറിയിപ്പ് നൽകി.
യൂറോപ്പിലെ വിവിധയിടങ്ങളിൽ ആൻഡ്രോയ്ഡ് ഫോണുകളെ ലക്ഷ്യമാക്കി പ്രവർത്തിച്ചുവരുന്ന ഈ മാൽവെയറിന് ‘സ്റ്റേർണസ്’ എന്നാണ് പേര്.
ബാങ്കിംഗ് ആപ്പുകൾ തുറക്കുമ്പോൾ യഥാർത്ഥ സ്‌ക്രീനിന് മുകളിലേക്ക് ഒരു വ്യാജ സ്ക്രീൻ ചേർത്തുകാണിക്കുന്നതാണ് ഇതിന്റെ പ്രധാന പ്രവർത്തനം.
ഉപയോക്താവ് പാസ്‌വേഡ്, പിൻനമ്പർ തുടങ്ങിയവ നൽകുമ്പോൾ വിവരങ്ങൾ നേരെ തട്ടിപ്പുകാരുടെ കൈകളിലെത്തും.
ഫോൺ അൺലോക്ക് ചെയ്യുമ്പോൾ കറുപ്പ് സ്ക്രീൻ മാത്രം കാണപ്പെടുകയും അതുവഴി വിവരങ്ങൾ ചോർത്തപ്പെടുകയും ചെയ്യുന്നതും ഈ മാൽവെയറിന്റെ ലക്ഷണമാണെന്ന് വിദഗ്ധർ വ്യക്തമാക്കി.
ടെലഗ്രാം, വാട്ട്‌സാപ്പ് പോലുള്ള ഓൺലൈൻ പ്ലാറ്റ്‌ഫോമുകളിലെ സന്ദേശങ്ങളിലൂടെ ഇത് ഫോണിലേക്ക് കടന്നുവരും.
പ്ലേസ്റ്റോറിൽ ഗൂഗിൾ ക്രോം എന്നിവയുടെ വ്യാജ രൂപത്തിലോ ചില വെബ്‌സൈറ്റുകൾ സന്ദർശിക്കുമ്പോൾ സ്വമേധയാ ഇൻസ്റ്റാൾ ചെയ്യപ്പെടുകയോ ചെയ്യാം.
ആംസ്റ്റർഡാം ആസ്ഥാനമായ ത്രെറ്റ് ഫാബ്രിക് എന്ന സൈബർ സുരക്ഷാ സ്ഥാപനമാണ് മുന്നറിയിപ്പ് പുറപ്പെടുവിച്ചത്.
കയറിപ്പറ്റിയാൽ മാറ്റാൻ പ്രയാസം
ഒരു തവണ ഫോണിൽ പ്രവേശിച്ചാൽ സ്റ്റേർണസ് മാൽവെയറെ നീക്കം ചെയ്യുക അത്യന്തം ബുദ്ധിമുട്ടാണ്.
സാങ്കേതിക വിദഗ്ധരുടെ സഹായം ഇല്ലാതെ ഒഴിവാക്കാനാവില്ല. ബാറ്ററി ലെവൽ ഉൾപ്പെടെ ഫോണിന്റെ പ്രവർത്തനം നിരീക്ഷിക്കുന്നതിനാൽ നീക്കം ചെയ്യാനുള്ള ശ്രമം നടത്തിയാൽ കൂടുതൽ ആക്രമണങ്ങൾ ഉണ്ടായേക്കാം.
ചിലപ്പോൾ അൺഇൻസ്റ്റാൾ ചെയ്യുന്നതിനോടൊപ്പം ഫോൺ ഓഫ് ആവാനും സാധ്യതയുണ്ട്.
ജാഗ്രതാ നിർദ്ദേശങ്ങൾ
പരിചയശൂന്യമായ ലിങ്കുകൾ, സൈറ്റുകൾ എന്നിവ ഒരിക്കലും തുറക്കരുത്
പ്ലേസ്റ്റോറിന് പുറത്തെ ആപ്പുകൾ ഡൗൺലോഡ് ചെയ്യരുത്
പാസ്‌വേഡുകൾ നിരന്തരം മാറ്റണം
സംശയകരമായ സന്ദേശങ്ങൾ ക്ലിക്ക് ചെയ്യാതിരിക്കുക
തട്ടിപ്പുകൾ റിപ്പോർട്ട് ചെയ്യാൻ: 1930 – സൈബർ ഹെൽപ്പ് നമ്പർ
English Summary
Cybersecurity experts have warned that ‘Sternes’, a malware that steals banking details by displaying fake login screens and black screens over Android devices, may spread to India. The malware, active in several European countries, captures banking PINs and passwords by overlaying fake screens on banking apps. It also infiltrates devices through fake apps resembling Google Chrome on the Play Store or via links on Telegram and WhatsApp.
Once it infects a device, removing it is extremely difficult and requires professional help. Users are advised to avoid unfamiliar links, download apps only from trusted sources, and update passwords frequently. Cyber fraud can be reported via helpline 1930.
sternes-android-malware-india-warning
Cybersecurity, Malware, Sternes, Android, Banking Fraud, Fake Screen, Kerala, ThreatFabric, Cyber Alert, 1930 Helpline
