തിരുവനന്തപുരം: അടുത്ത നാല് മുതല് അഞ്ച് ദിവസം കേരളത്തില് ശക്തമായ മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് മുന്നറിയിപ്പ് നല്കി.
ബംഗാൾ ഉള്ക്കടലില് രൂപപ്പെട്ട പുതിയ ന്യൂനമര്ദ്ദവും അറബിക്കടലില് തെക്കന് തീരത്തിന് സമീപമുണ്ടായ ചക്രവാതച്ചുഴിയും സംസ്ഥാനത്ത് മഴ ശക്തമാക്കുന്ന അന്തരീക്ഷം സൃഷ്ടിച്ചിട്ടുണ്ട്.
ആറ് ജില്ലകളിൽ ഇന്ന് യെല്ലോ അലർട്ട്; തെക്കൻ കേരളമാണ് കൂടുതൽ മഴ
തെക്കന് കേരളത്തിലാണ് ഇപ്പോള് ഏറ്റവും ശക്തമായ മഴ മുന്നറിയിപ്പ്. ഇന്ന് തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി എന്നീ ആറ് ജില്ലകളില് യെല്ലോ അലര്ട്ട് പ്രഖ്യാപിച്ചു.
ഒറ്റപ്പെട്ട സ്ഥലങ്ങളില് ഇടിമിന്നലോടെയും ശക്തമായ കാറ്റോടെയും കൂടിയ മഴയ്ക്ക് സാധ്യതയുണ്ടെന്ന് കാലാവസ്ഥ വകുപ്പ് വ്യക്തമാക്കി.
പത്തനംതിട്ട–കോട്ടയം–ഇടുക്കി: മൂന്ന് ദിവസം തുടർച്ചയായി മഴ കനക്കും
ചൊവ്വാഴ്ച പത്തനംതിട്ട, കോട്ടയം, ഇടുക്കി, മലപ്പുറം ജില്ലകളിലും ബുധനാഴ്ച കോട്ടയം, ഇടുക്കി ജില്ലകളിലും യെല്ലോ അലര്ട്ട് നിലവിലുണ്ടാകും.
വ്യാഴാഴ്ച പത്തനംതിട്ട, കോട്ടയം, കണ്ണൂര്, കാസര്കോട് ജില്ലകളിലും ശക്തമായ മഴ മുന്നറിയിപ്പോടുകൂടി യെല്ലോ അലര്ട്ട് പ്രഖ്യാപിച്ചിട്ടുണ്ട്.
24 മണിക്കൂറില് 64.5 മുതല് 115.5 മില്ലിമീറ്റര് വരെ ലഭിക്കുന്ന മഴയാണ് ‘ശക്തമായ മഴ’യായി കണക്കാക്കുന്നത്.
ബംഗാൾ ഉള്ക്കടലിൽ പുതിയ ന്യൂനമർദ്ദം; അറബിക്കടലിലെ ചുഴിയും ശക്തമാകുന്നു
അതിനാല് വെള്ളപ്പൊക്കം, മണ്ണിടിച്ചിൽ, കനത്ത ഒഴുക്ക് തുടങ്ങിയ സാഹചര്യം ഒഴിവാക്കാന് ജാഗ്രത പാലിക്കണമെന്ന് വകുപ്പ് ജനങ്ങളോട് അഭ്യര്ഥിച്ചു.
അതേസമയം, കേരളത്തിന്റെ തെക്കന് തീരത്ത് കള്ളക്കടല് ഭീഷണിയും നിലനില്ക്കുന്നു. ഇന്ന് രാത്രി 8.30 വരെ തിരുവനന്തപുരം തീരപ്രദേശങ്ങളില് (കാപ്പില്–പൊഴിയൂര്) 0.9 മുതല് 1.1 മീറ്റര് വരെ ഉയരമുള്ള തിരമാലകള് ഉണ്ടാകാനാണ് സാധ്യത.
കന്യാകുമാരി ജില്ലയിലും വൈകുന്നേരം 5.30 വരെ 1.3 മുതല് 1.5 മീറ്റര് വരെ ഉയരമുള്ള തിരമാലകളുടെ ആഘാതം ഉണ്ടായേക്കാമെന്ന് ദേശീയ സമുദ്രസ്ഥിതിപഠന ഗവേഷണ കേന്ദ്രം അറിയിച്ചു.
ഇടിമിന്നലോടുകൂടിയ മഴയ്ക്ക് സാധ്യത; യാത്രക്കാരും മത്സ്യതൊഴിലാളികളും ജാഗ്രത പാലിക്കണം
ഉയർന്ന തിരമാലകള് മൂലം കടലാക്രമണ സാധ്യത കൂടുതലായതിനാല് തീരപ്രദേശങ്ങളിലെ മത്സ്യബന്ധന പ്രവർത്തനങ്ങൾ, തീരസഞ്ചാരം, വാഹനഗതാഗതം എന്നിവയില് ജാഗ്രത പാലിക്കണമെന്ന് അധികൃതര് മുന്നറിയിപ്പ് നല്കി.
ശ്രീലങ്കയ്ക്ക് സമീപമുള്ള തെക്ക് പടിഞ്ഞാറന് ബംഗാള് ഉള്ക്കടലിലാണ് പുതിയ ന്യൂനമര്ദ്ദം രൂപപ്പെട്ടത്.
ഇതിന്റെ സ്വാധീനഫലമായി അടുത്ത അഞ്ചുദിവസവും കേരളത്തില് ഇടിമിന്നലോടു കൂടിയ ലഘു മുതല് ഇടത്തരം മഴ തുടരുമെന്നാണ് പ്രവചനം.
English Summary
A new low-pressure area over the Southwest Bay of Bengal near Sri Lanka and a cyclonic circulation near the Kerala coast are expected to bring continuous rain to the state for the next 4–5 days. Several districts, especially in South Kerala, are under yellow alert. High waves and sea attack warnings are also issued along the southern coast.
