അതെന്നാ…മട്ടന്നൂര് കേരളത്തിലല്ലെ
തിരുവനന്തപുരം: സംസ്ഥാനത്ത് ആകെ 1200 തദ്ദേശ സ്ഥാപനങ്ങളുണ്ടെങ്കിലും, 1199 എണ്ണത്തിലേക്കാണ് സംസ്ഥാന തിരഞ്ഞെടുപ്പ് കമ്മീഷൻ ഇത്തവണ വോട്ടെടുപ്പ് പ്രഖ്യാപിച്ചത്.
കണ്ണൂർ ജില്ലയിലെ മട്ടന്നൂർ മുനിസിപ്പാലിറ്റിയെ ഒഴിവാക്കിയാണ് രണ്ട് ഘട്ടങ്ങളിലായുള്ള തിരഞ്ഞെടുപ്പ് തീയതി പ്രഖ്യാപിച്ചത്. ഇതിന് പിന്നിൽ പതിറ്റാണ്ടുകൾ പഴക്കമുള്ള രാഷ്ട്രീയ തീരുമാനവും നിയമപോരാട്ടവുമാണ്.
1990-ൽ ഇ.കെ. നായനാർ നേതൃത്വം നൽകിയ എൽഡിഎഫ് സർക്കാർ മട്ടന്നൂർ പഞ്ചായത്തിനെ മുനിസിപ്പാലിറ്റിയായി ഉയർത്താൻ തീരുമാനിച്ചു. എന്നാൽ 1991ൽ അധികാരത്തിലെത്തിയ കെ. കരുണാകരൻ സർക്കാർ ഈ തീരുമാനം പിൻവലിച്ചു.
ഇതിനെതിരെ സിപിഎം നൽകിയ ഹർജിയോടെയാണ് ദീർഘകാല നിയമപോരാട്ടം ആരംഭിച്ചത്. 1996ൽ സിപിഎം വീണ്ടും സർക്കാർ രൂപീകരിച്ചതിന് പിന്നാലെ മട്ടന്നൂർ മുനിസിപ്പാലിറ്റിയായി പ്രഖ്യാപിക്കപ്പെടുകയും 1997ൽ ആദ്യ തിരഞ്ഞെടുപ്പ് നടക്കുകയും ചെയ്തു.
തദ്ദേശ ഭരണ സ്ഥാപനങ്ങളിലെ ഭരണസമിതിയുടെ കാലാവധി അഞ്ച് വർഷമാണ്. മട്ടന്നൂരിൽ തിരഞ്ഞെടുപ്പ് നടന്നത് മറ്റിടങ്ങളേക്കാൾ വ്യത്യസ്ത സമയക്രമത്തിലായതിനാൽ പൊതു തിരഞ്ഞെടുപ്പിനൊപ്പം ഇവിടെ വോട്ടെടുപ്പ് നടത്തുക സാധ്യമല്ല.
അവസാനമായി 2022ലാണ് മട്ടന്നൂരിൽ തിരഞ്ഞെടുപ്പ് നടന്നത്, അതിനാൽ നിലവിലെ ഭരണസമിതിയുടെ കാലാവധി 2027 വരെ തുടരും.
മട്ടന്നൂർ മുനിസിപ്പാലിറ്റി ഇതുവരെ സിപിഎമ്മിന്റെ കോട്ടയായാണ് അറിയപ്പെടുന്നത്. എന്നാൽ കഴിഞ്ഞ തിരഞ്ഞെടുപ്പിൽ വലിയ രാഷ്ട്രീയ മാറ്റങ്ങൾ ദൃശ്യമായി.
35 വാർഡുകളിലായി നടന്ന മത്സരത്തിൽ 21 സീറ്റോടെ എൽഡിഎഫ് ഭരണം നിലനിർത്തിയെങ്കിലും, 28 സീറ്റിൽ നിന്നാണ് 21ലേക്ക് താഴ്ന്നത്. 14 സീറ്റുകൾ നേടി യുഡിഎഫ് ശക്തമായ മുന്നേറ്റവും കാഴ്ചവച്ചു.
English Summary
Although Kerala has 1200 local self-government bodies, elections have been announced only for 1199, excluding Mattannur Municipality in Kannur. This is due to a long-standing political decision and legal battle that shaped Mattannur’s civic status. In 1990, the LDF government under E.K. Nayanar elevated Mattannur to a municipality, but the decision was revoked by the K. Karunakaran government in 1991, leading to years of legal dispute. The status was eventually restored in 1996 when the LDF returned to power, and the first municipal election was held in 1997.
Since municipal councils serve a five-year term and Mattannur follows a separate election cycle, it cannot be synchronized with the statewide local body polls. The last election in Mattannur was held in 2022, and the current council’s tenure will continue until 2027.
The municipality has long been a CPM stronghold, but in the last election, the party faced a significant challenge. Out of 35 wards, LDF won 21 seats—down from 28—while UDF made a strong gain with 14 seats.
