പോക്സോ: സി.പി.എം നേതാവ് അറസ്റ്റിൽ
കോതമംഗലം: പോക്സോ കേസിൽ സി.പി.എം നേതാവ് പിടിയിൽ. കോതമംഗലം നഗരസഭയിലെ ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ മലയൻകീഴ് കുടിയാട്ട് വീട്ടിൽ കെ.വി. തോമസ് ആണ്അറസ്റ്റിലായത്.
ഇന്നലെ വൈകിട്ട് പോലീസ് സ്റ്റേഷനിലെത്തി കീഴടങ്ങുകയായിരുന്നു. ഇയാൾ ഇതിനുമുമ്പും പീഡനക്കേസിൽ പ്രതിയായിട്ടുണ്ട്.
എട്ടാം വാർഡ് കൗൺസിലറും മലയൻകീഴ് ബ്രാഞ്ച് സെക്രട്ടറിയും കോതമംഗലം ഈസ്റ്റ് ലോക്കൽ കമ്മിറ്റിയംഗവുമാണ് ഇയാൾ.
സ്‌കൂൾ വിദ്യാർത്ഥിനിയെ പീഡിപ്പിച്ചെന്ന ബന്ധുക്കളുടെ പരാതിയെ തുടർന്ന് വെള്ളിയാഴ്ചയാണ് കേസ് രജിസ്റ്റർ ചെയ്തത്.
കഴിഞ്ഞ വർഷം മാർച്ച് മുതൽ മൂന്നുവട്ടം ഇയാൾ പെൺകുട്ടിയെ കടന്നുപിടിക്കുകയും മോശമായി സംസാരിക്കുകയും ചെയ്തെന്ന് പരാതിയിൽ പറയുന്നു.
പാർട്ടി പ്രാഥമിക അംഗത്വത്തിൽ നിന്ന് തോമസിനെ കോതമംഗലം ഏരിയാ സെക്രട്ടറി പുറത്താക്കി.
കൗൺസിലർ സ്ഥാനം രാജിവയ്ക്കാനും പാർട്ടി ആവശ്യപ്പെട്ടിട്ടുണ്ട്. ബന്ധുവായ യുവതിയെ പീഡിപ്പിച്ചെന്ന കേസിലും പ്രതിയാണ് ഇയാൾ.
യുവതിയുടെ അടുത്ത ബന്ധുവിനെ കുത്തി പരിക്കേൽപ്പിക്കുകയും ചെയ്തിട്ടുണ്ട്. ഈ കേസ് കോടതിയിൽ നിലനിൽക്കെയാണ് ബിൽഡിംഗ് കൺസ്ട്രക്ഷൻ കോൺട്രാക്ടർ കൂടിയായ തോമസിനെ കഴിഞ്ഞ സമ്മേളനത്തിൽ സി.പി.എം ലോക്കൽ കമ്മിറ്റിയംഗമായി തിരഞ്ഞെടുത്തത്.
ട്യൂഷൻ ടീച്ചർക്കെതിരെ വീണ്ടും പോക്സോ കേസ്
ആറന്മുള: പോക്സോ കേസിൽ പ്രതിയായി ജുഡീഷ്യൽ കസ്റ്റഡിയിൽ കഴിയുന്ന ട്യൂഷൻ സെന്റർ നടത്തിപ്പുകാരനായ അധ്യാപകനെതിരെ വീണ്ടും കേസെടുത്ത് പോലീസ്. മറ്റൊരു പോക്സോ കേസിൽ പോലീസ് ജയിലിലെത്തി അറസ്റ്റ് രേഖപ്പെടുത്തുകയായിരുന്നു.
കിടങ്ങന്നൂർ ജങ്ഷനിലെ സെന്റ് മേരീസ് കോളേജ് ട്യൂഷൻ സെന്റർ നടത്തിപ്പുകാരനും ഗണിത അദ്ധ്യാപകനുമായ കാക്കനാട്ട് പുതുപ്പറമ്പിൽ വീട്ടിൽ അലക്സ് കാക്കനാട് എന്ന് വിളിക്കുന്ന എബ്രഹാം അലക്സാണ്ടർ ( 62) ആണ് അറസ്റ്റിലായത്. പതിമൂന്നുകാരന്റെ മൊഴിപ്രകാരമാണ് രണ്ടാമത്തെ കേസ് പോലീസ് രജിസ്റ്റർ ചെയ്തത്.
കഴിഞ്ഞ മാസം 28 ന് വൈകിട്ട് 4.30 നാണ് ഇവരോട് ഇയാൾ ലൈംഗിക അതിക്രമം കാട്ടിയത്. ഇവിടെ പഠിക്കുന്ന മറ്റൊരു പതിമൂന്നുകാരനു നേരെ ലൈംഗിക അതിക്രമം നടത്തിയതിന് 30 നാണ് ആദ്യ പോക്സോ കേസ് എടുത്തത്.
പിന്നാലെ അറസ്റ്റ ചെയ്ത് റിമാൻഡ് ചെയ്തു. ക്ലാസിനിടെ കുട്ടികളെ കൊണ്ട് തന്റെ സ്വകാര്യഭാഗത്ത് പിടിപ്പിക്കുകയും കുട്ടികളുടെ ശരീരത്തിൽ കടന്നുപിടിച്ച് ലൈംഗിക അതിക്രമം കാട്ടുകയുമായിരുന്നു. പോലീസ് ഇൻസ്പെക്ടർ വി എസ് പ്രവീണിന്റെ നേതൃത്വത്തിലായിരുന്നു നടപടി.
സ്കൂളുകളിലെ പോക്സോ കേസ്: കുട്ടികളെ ചൂഷണം ചെയ്തത് 65 അധ്യാപകർ
തിരുവനന്തപുരം: വിദ്യാലയങ്ങളിലെ പോക്സോ കേസ് പ്രതികൾക്കെതിരെ കർശന നടപടിയെടുക്കുമെന്ന് മന്ത്രി വി.ശിവൻകുട്ടി.
കേരള പൊലീസ് ഓഫീസേഴ്സ് അസോസിയേഷൻ (കെ.പി.ഒ.എ) സംസ്ഥാന സമ്മേളനത്തിന്റെ ഭാഗമായുള്ള പ്രതിനിധി സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.
പൊതു വിദ്യാഭ്യാസ വകുപ്പിന് കീഴിലുള്ള സെക്കൻഡറി സ്കൂളുകളിലെ ജീവനക്കാർക്കെതിരെ 77 പോക്സോ കേസുകളാണ് നിലവിലുള്ളത്.
ഇതിൽ 65 പേർ അദ്ധ്യാപകരും 12 പേർ അനദ്ധ്യാപകരുമാണ്. വകുപ്പുതല അച്ചടക്ക നടപടി പൂർത്തിയാക്കിയ 45 പേർക്കെതിരെ കർശന നടപടികൾ സ്വീകരിച്ചിട്ടുണ്ട്.
വൊക്കേഷണൽ ഹയർസെക്കൻഡറി വിഭാഗത്തിൽ മൂന്ന് കേസുകളാണ് ആകെ റിപ്പോർട്ട് ചെയ്തത്.
ഹയർ സെക്കൻഡറി വിഭാഗത്തിൽ പോക്സോ കേസിൽ സർക്കാർ സ്‌കൂളുകളിൽ നിന്ന് 14 അദ്ധ്യാപകരെയും എയ്ഡഡ് മേഖലയിൽ നിന്ന് 7 അദ്ധ്യാപകരെയും ഇതുവരെ സസ്‌പെൻഡ് ചെയ്തു.
കുട്ടികളുടെ അക്കാഡമിക് നിലവാരം മെച്ചപ്പെടുത്തുന്നതിന് സമഗ്ര ഗുണമേന്മാ വിദ്യാഭ്യാസ പദ്ധതി കേരളത്തിൽ നടപ്പാക്കുകയാണ്. ഇതിന്റെ ഭാഗമായാണ് സബ്ജക്ട് മിനിമം കൊണ്ടുവന്നതെന്നും മന്ത്രി പറഞ്ഞു.
English Summary:
CPM leader arrested in POCSO case. The accused is K.V. Thomas of Kudiayattu House, Malayankeezhu, who serves as the Chairman of the Health and Education Standing Committee of Kothamangalam Municipality.
