ബെംഗളൂരു: മുന്‍നിശ്ചയപ്രകാരം ചന്ദ്രയാന്‍ 3ന്റെ സോഫ്റ്റ് ലാന്‍ഡിങ് വൈകിട്ട് 5.45ന് തന്നെ തുടങ്ങുമെന്ന് ഇസ്‌റോ അറിയിച്ചു. 5.44ന് ഓട്ടോമാറ്റിക് ലാന്‍ഡിങ് സീക്വന്‍സ് ആരംഭിക്കും. ചന്ദ്രയാന്‍ 3 ലാന്‍ഡര്‍ മൊഡ്യൂള്‍ 6.04ന് ചന്ദ്രനിലിറങ്ങും. ചന്ദ്രയാന്‍ ലാന്‍ഡിങ്ങിനുള്ള എല്ലാ ഒരുക്കങ്ങളും പൂര്‍ണമെന്നും ദൗത്യം പ്രതീക്ഷിച്ചതുപോലെ തന്നെ മുന്നോട്ട് നീങ്ങുന്നുവെന്നും ഇസ്‌റോ അറിയിച്ചു.
വൈകിട്ട് 5.45ന് ചന്ദ്രോപരിതലത്തില്‍ നിന്ന് ഏകദേശം 25 കിലോമീറ്റര്‍ ഉയരത്തില്‍ വച്ചാണ് ഇറങ്ങല്‍ പ്രക്രിയ തുടങ്ങുക. ലാന്‍ഡറിലെ 4 ത്രസ്റ്റര്‍ എന്‍ജിനുകളാണ് വേഗം കുറച്ചു സാവധാനം ഇറങ്ങാന്‍ സഹായിക്കുന്നത്. ഇന്നത്തെ ലാന്‍ഡിങ് വിജയകരമായാല്‍ 25ന് ലാന്‍ഡര്‍ മൊഡ്യൂളിന്റെ ഉള്ളിലുള്ള റോവര്‍ ചന്ദ്രോപരിതലത്തിലിറങ്ങും.
എന്തെങ്കിലും അപ്രതീക്ഷിത സാഹചര്യമുണ്ടായാല്‍ ലാന്‍ഡിങ് ഓഗസ്റ്റ് 27ലേക്ക് മാറ്റുമെന്ന് ഇസ്‌റോ നേരത്തേ അറിയിച്ചിരുന്നു. നിലവില്‍ സെക്കന്‍ഡില്‍ 1.68 കിലോമീറ്റര്‍ വേഗത്തില്‍ ചന്ദ്രനു ചുറ്റും ഭ്രമണം ചെയ്യുന്ന ചന്ദ്രയാന്‍ 3 ലാന്‍ഡറിന്റെ വേഗം, നിശ്ചയിച്ചതുപോലെ കുറയ്ക്കാന്‍ കഴിയാത്ത സാഹചര്യമുണ്ടായാലാണു ലാന്‍ഡിങ് 27ലേക്ക് മാറ്റുക.
