ഭക്ഷണം കഴിക്കുമ്പോള്‍ കഴിക്കുന്നതില്‍ മാത്രം ശ്രദ്ധിക്കുക എന്നത് പ്രധാനമാണ്. നമ്മളില്‍ പലരും ഫോണ്‍ നോക്കിയും ടിവി കണ്ടും വായിച്ചു കൊണ്ടുമൊക്കെയാവും പലപ്പോഴും ഭക്ഷണം കഴിക്കുന്നത്. എന്നാല്‍ ഭക്ഷണത്തില്‍ മാത്രം ശ്രദ്ധിച്ചു വേണം കഴിക്കാന്‍. ഇത് ഭക്ഷണത്തിലെ പോഷകങ്ങളെല്ലാം ശരീരം ആഗിരണം ചെയ്യാന്‍ സഹായിക്കും. ഭക്ഷണം കഴിക്കുന്ന കാര്യത്തിനു പലരും ഒരു പ്രാധാന്യവും നല്‍കില്ല. വയറു നിറയ്ക്കാന്‍ തിടുക്കത്തില്‍ ഭക്ഷണം ശരിക്ക് ചവയ്ക്കാതെ വിഴുങ്ങുകയാവും പതിവ്. ഇങ്ങനെ വിഴുങ്ങുമ്പോള്‍ ഭക്ഷണത്തിന്റെ രുചി ഒന്നും മനസ്സിലാവില്ല. എന്നാല്‍ ഭക്ഷണം സാവധാനത്തില്‍ ചവച്ചരച്ചു കഴിച്ചാല്‍ അത് ആരോഗ്യത്തിന് ഏറെ ഗുണം ചെയ്യും.
ഭക്ഷണം ചവയ്ക്കുമ്പോള്‍
വായിലാണ് ദഹനപ്രക്രിയ ആരംഭിക്കുന്നത്. ഭക്ഷണം നന്നായി ചവയ്ക്കുമ്പോള്‍ പല്ല് അതിനെ അരച്ച് ചെറിയ ഭാഗങ്ങളാക്കുന്നു. ഇതു മൂലം അന്നജത്തെ ഷുഗര്‍ ആക്കി വിഘടിപ്പിക്കാന്‍ എന്‍സൈമുകള്‍ക്ക് എളുപ്പമാകുന്നു. ഇതു ഭക്ഷണം വേഗം ദഹിക്കാനും സഹായകമാണ്.
ഉദരവും തലച്ചോറും തമ്മില്‍
ഭക്ഷണം ചവയ്ക്കാന്‍ തുടങ്ങുമ്പോള്‍ തലച്ചോറ് ഉദരത്തിലേക്ക് സിഗ്‌നലുകളെ അയയ്ക്കുന്നു. ദഹനത്തിനു സഹായിക്കുന്ന ഡൈജസ്റ്റീവ് ജ്യൂസുകളെ പുറന്തള്ളാന്‍ തലച്ചോറ് നിര്‍ദേശം നല്‍കുകയും ഇത് ദഹനത്തിനു സഹായിക്കുകയും ചെയ്യുന്നു. വളരെ വേഗത്തില്‍ ഭക്ഷണം ചവയ്ക്കുമ്പോള്‍ തലച്ചോറിന് വയര്‍ നിറഞ്ഞു എന്ന കാര്യം മനസ്സിലാക്കാനുള്ള സമയം ലഭിക്കാതെ പോവുകയും ഇത് അമിതമായി ഭക്ഷണം കഴിക്കുന്നതിലേക്കും ശരീരഭാരം കൂടുന്നതിലേക്കും നയിക്കുകയും ചെയ്യും. എന്നാല്‍ വളരെ സാവധാനത്തില്‍ ഭക്ഷണം ചവച്ചരച്ചു കഴിച്ചാല്‍ നമ്മുടെ വയര്‍ നിറഞ്ഞു എന്ന് തലച്ചോര്‍ മനസ്സിലാക്കുകയും ആവശ്യത്തിനുള്ള ഭക്ഷണം മാത്രം കഴിക്കുകയും െചയ്യും.
ദഹനപ്രശ്‌നങ്ങള്‍
വളരെ വേഗത്തില്‍ ഭക്ഷണം ചവച്ചാല്‍ വയറിനു കനം, വായുകോപം, അസ്വസ്ഥത ഇവ ഉണ്ടാകും. ഭക്ഷണം സാവധാനത്തില്‍ ചവച്ചരച്ചു കഴിച്ചാല്‍ ഭക്ഷണം ചെറിയ ഭാഗങ്ങളായി വിഘടിക്കുകയും ഇത് വളരെവേഗം ദഹനത്തിനു സഹായിക്കുകയും ചെയ്യും. അസ്വസ്ഥത ഒന്നും നമുക്ക് തോന്നുകയില്ല.
കാലറിയും അളവും
ഭക്ഷണം സാവധാനത്തില്‍ ചവച്ചു കഴിച്ചാല്‍ കാലറിയും കുറച്ചുമാത്രമേ ശരീരത്തില്‍ ചെല്ലുകയുള്ളൂ. ഇത് വിശപ്പ് കുറയ്ക്കാനും സഹായിക്കും. കാലറി അകത്താക്കുന്നത് ക്രമേണ കുറയുമ്പോള്‍ ശരീരഭാരം കുറയ്ക്കാനും ശരീരഭാരം നിയന്ത്രിച്ചു നിര്‍ത്താനും സഹായകം ആകും. ഭക്ഷണം സാവധാനത്തില്‍ കഴിക്കുമ്പോള്‍ ഭക്ഷണം കഴിക്കുന്ന ശീലം ആരോഗ്യകരമാകുന്നതോടൊപ്പം ശരീരത്തിന് ആവശ്യമായ പോഷകങ്ങളെക്കുറിച്ചും മനസ്സിലാക്കാനും സാധിക്കുന്നു.
