മനാമ : വിദേശ ജയിലുകളിൽ വധശിക്ഷ കാത്ത് കഴിയുന്നത് 51 ഇന്ത്യക്കാർ. ഇതിൽ 42 പേരും ഗൾഫ് രാജ്യങ്ങളിലാണ്. അതിൽതന്നെ യുഎഇയിലാണ് ഏറ്റവും അധികം, 26 പേർ.
ഫെബ്രുവരി 13ന് കേന്ദ്ര വിദേശ മന്ത്രി കീർത്തിവർധൻ സിങ് പാർലമെന്റിൽ നൽകിയ മറുപടി പ്രകാരം സൗദിയിൽ 12 ഇന്ത്യക്കാരും കുവൈത്തിൽ മൂന്നുപേരും ഖത്തറിൽ ഒരാളും വധശിക്ഷകാത്ത് കഴിയുന്നുണ്ട്.
യെമനിൽ വധശിക്ഷക്ക് വിധിക്കപ്പെട്ട് കഴിയുന്ന മലയാളി നഴ്സ് നിമിഷ പ്രിയ, മാപ്പ് നൽകിയിട്ടും വധക്കേസിൽ തീരുമാനമാകാതെ സൗദി ജയിലിൽ കഴിയുന്ന കോഴിക്കോട് സ്വദേശി അബ്ദുൾ റഹീം എന്നിവരുടെ മോചനത്തിനായി ശ്രമം നടക്കുന്നുണ്ട്.
കഴിഞ്ഞ ഫെബ്രുവരി 28ന് കണ്ണൂർ സ്വദേശികളായ തയ്യിൽ സ്വദേശി പെരുംതട്ട വളപ്പിൽ മുരീളധരൻ (43), തലശ്ശേരി നെട്ടൂർ സ്വദേശി മുഹമ്മദ് റിനാഷ്(29), ഫെബ്രുവരി 15ന് യുപി സ്വദേശിനി ഷെഹ്സാദി ഖാൻ (33) എന്നിവരുടെ വധ ശിക്ഷ വിദേശത്ത് നടപ്പാക്കിയിരുന്നു.
വിദേശ ജയിലുകളിൽ വിചാരണ തടവുകാർ ഉൾപ്പെടെ 10,152 ഇന്ത്യക്കാരുണ്ട്. സൗദിയിലും (2,633), യുഎഇയിലു(2,518)മാണ് കൂടുതൽ.
