ന്യൂഡല്‍ഹി: ഇന്ത്യന്‍ ക്രിക്കറ്റ് താരം വിരാട് കോഹ്ലിക്ക് മുന്നറിയിപ്പുമായി ബിസിസിഐ. ഏഷ്യാ കപ്പിന് മുമ്പ് നടത്തിയ ഫിറ്റ്‌നെസ് ടെസ്റ്റ് ഫലം പുറത്തുവിട്ടതാണ് ബിസിസിഐയെ ചൊടിപ്പിച്ചത്. യോയോ ടെസ്റ്റിന്റെ ഫലം വിരാട് കോഹ്ലി ഇന്‍സ്റ്റാഗ്രാമില്‍ പങ്കുവെച്ചിരുന്നു. ഇത് മണിക്കൂറുകള്‍ക്കകം ഇന്റര്‍നെറ്റില്‍ തരംഗം ആകുകയും ചെയ്തു. രഹസ്യസ്വഭാവമുള്ള ഫലമാണ് കോഹ്ലി പുറത്തുവിട്ടതെന്നാണ് ബിസിസിഐ വാദം.
യോയോ ടെസ്റ്റ് ഫലം പ്രകാരം ഏഷ്യ കപ്പിന് തയ്യാറെടുക്കുന്ന ഇന്ത്യന്‍ ടീം അംഗങ്ങള്‍ കായികക്ഷമത തെളിയിച്ചുകഴിഞ്ഞു. വിരാട് കോഹ്ലിക്ക് 17.2 ആണ് സ്‌കോര്‍. 16.5 സ്‌കോര്‍ നേടിയാല്‍ ഫിറ്റ്‌നെസ് വിജയിക്കും. ടെസ്റ്റ് വിജയിക്കാനായതില്‍ സന്തോഷം എന്നാണ് കോഹ്ലി ഇന്‍സ്റ്റാഗ്രാമില്‍ കുറിച്ചത്. മറ്റ് ഇന്ത്യന്‍ താരങ്ങള്‍ക്കും രഹസ്യസ്വഭാ?വമുള്ള വിവരങ്ങള്‍ സമൂഹമാധ്യമങ്ങളില്‍ പോസ്റ്റ് ചെയ്യരുതെന്ന് മുന്നറിയിപ്പ് നല്‍കി.
ഏഷ്യാ കപ്പിന് മുന്നോടിയായി ആറ് ദിവസത്തെ ക്യാമ്പിലും ഇന്ത്യന്‍ താരങ്ങള്‍ പങ്കെടുക്കും. ബെംഗളൂരുവിലെ ദേശീയ ക്രിക്കറ്റ് അക്കാഡമിയില്‍ ഇന്ന് മുതല്‍ ടീം ക്യാമ്പ് നടക്കും. ഓഗസ്റ്റ് 31 മുതലാണ് ഏഷ്യാ കപ്പ് ക്രിക്കറ്റിന് തുടക്കമാകുക. സെപ്റ്റംബര്‍ രണ്ടിന് പാകിസ്താനെതിരെ ആണ് ഇന്ത്യയുടെ ആദ്യ മത്സരം.
