ജബൽപുർ: ട്രെയിൻ ടിക്കറ്റെടുക്കാൻ പണമില്ലാത്തതിനാൽ ട്രെയിനിന് അടിയിൽ കയറിയിരുന്ന് യാത്ര ചെയ്ത് യുവാവ്. മധ്യപ്രദേശിലെ ഇറ്റാർസിയിൽനിന്ന് ജബൽപുരിലേക്കായിരുന്നു സാഹസിക യാത്ര നടന്നത്. 250 കിലോമീറ്റർ ദൂരമാണ് യുവാവ് ഇത്തരത്തിൽ സഞ്ചരിച്ചത്.(Young man traveled 250 km sitting under the train)
നാല് മണിക്കൂറിലധികമാണ് യുവാവ് ഇത്തരത്തിൽ യാത്ര ചെയ്തത്. തുടർന്ന് റെയിൽവേ ജീവനക്കാർ നടത്തിയ പരിശോധനയിലാണ് ട്രെയിനിന് അടിയിൽ ചക്രങ്ങൾക്കു അരികിലായി തൂങ്ങിക്കിടന്നിരുന്ന യുവാവിനെ കണ്ടെത്തിയത്. ജബൽപുർ സ്റ്റേഷനിൽ എത്തിയ ട്രെയിനിന്റെ താഴ്ഭാഗം ജീവനക്കാർ പരിശോധിക്കുന്നതിനിടെ ചക്രങ്ങൾക്കിടയിൽ മറഞ്ഞിരുന്ന യുവാവിനെ കണ്ടെത്തുകയായിരുന്നു. പുണെ-ദാനപൂർ എക്‌സ്‌പ്രസിന്റെ (ട്രെയിൻ നമ്പർ 12149) എസ്-4 കോച്ചിനു കീഴിലായിരുന്നു യുവാവ് ഒളിഞ്ഞിരുന്നത്.
തുടർന്ന് ഇയാളെ റെയിൽവേ പ്രൊട്ടക്ഷൻ ഫോഴ്സിന് കൈമാറി. പൈസിയല്ലാത്തതിനാലാണ് യാത്രയ്ക്ക് ഈ രീതി തിരഞ്ഞെടുത്തതെന്ന് ചോദ്യം ചെയ്യലിൽ യുവാവ് സമ്മതിച്ചു. യുവാവ് മാനസിക വെല്ലുവിളി നേരിടുന്നുണ്ടെന്നും ഉദ്യോഗസ്ഥർ പറഞ്ഞു.
