നൂറ്റാണ്ടുകൾക്കുമുമ്പ് രക്തംകുടിച്ചിരുന്ന ആൺകൊതുകുകൾ ഇപ്പോൾ എന്തുകൊണ്ട് രക്തം കുടിക്കുന്നില്ല ? ഗവേഷകർ കണ്ടെത്തിയ രസകരമായ ആ കാരണം ഇതാണ് !

ആൺകൊതുകുകൾ സാധാരണയായി രക്തം കുടിക്കാറില്ല എന്ന് എല്ലാവർക്കും അറിയാം. എന്നാൽ എന്താണ് ഇതിനു പിന്നിലുള്ള കാരണം എന്നറിയാമോ ? നൂറ്റാണ്ടുകൾക്കുമുമ്പ് ആൺകൊതുകുകളും രക്തം ഭക്ഷിച്ചിരുന്നു എന്ന് തെളിയിച്ചിരിക്കുകയാണ് ഒരുകൂട്ടം ഗവേഷകർ. ലെബനനിൽ നിന്നുള്ള ലോവർ ക്രിറ്റേഷ്യസ് ആമ്പറിൽ നിന്നുള്ള ആദ്യകാല കൊതുക് ഫോസിലുകളിലൊന്ന് വിശകലനം ചെയ്ത ശേഷം, തിങ്കളാഴ്ച (ഡിസംബർ 4) പ്രസിദ്ധീകരിച്ച ഒരു പഠനത്തിൽ ഗവേഷകർ അവകാശപ്പെടുന്നത് ആൺകൊതുകുകളും മുമ്പ് രക്തം കുടിച്ചിരുന്നു എന്നുതന്നെയാണ്. ലെബനീസ് ആമ്പർ സംരക്ഷിത ഫോസിലുകളാൽ സമ്പന്നമാണ്. ക്രിറ്റേഷ്യസ് കാലഘട്ടത്തിന്റെ ആരംഭത്തിൽ ഏകദേശം 125 ദശലക്ഷം വർഷങ്ങൾ വരെ പഴക്കമുള്ള ഫോസിലുകൾ ഇത്തരത്തിൽ ലഭിച്ചിട്ടുണ്ട്. അങ്ങിനെ ലഭിച്ച ഫോസിലുകളൊന്നിൽ നിന്നുമാണ് രസകരമായ അറിവ് കിട്ടിയത്.

നാൻജിംഗ് ഇൻസ്റ്റിറ്റ്യൂട്ട് ഓഫ് ജിയോളജി ആൻഡ് പാലിയന്റോളജിയിലെയും ലെബനീസ് സർവകലാശാലയിലെയും പാലിയന്റോളജിസ്റ്റും പേപ്പറിന്റെ പ്രധാന രചയിതാവുമായ ഡാനി അസറിന്റെ നേതൃത്വത്തിലാണ് ഈ പരീക്ഷണം നടത്തിയത്. അതിപ്രാചിനമായ ഒരു ആംബർ മൈക്രോസ്കോപിക് പരിശോധനയ്ക്ക് വിധേയമാക്കിയപ്പോഴാണ് അത്ഭുതാവഹമായ ആ കാഴ്ച കണ്ടത്. അതിനുള്ളിൽ സംരക്ഷിക്കപ്പെട്ടിരുന്ന ഒരു ഫോസിൽ ആൺകൊതുകിന്റെയായിരുന്നു. കൂടുതൽ പരിശോധനയ്ക്ക് ശേഷം, കൊതുകിന്റെ അടിവയറ്റിൽ ക്ലാപ്പേഴ്സ് എന്ന പിഞ്ചർ പോലുള്ള അവയവങ്ങൾ ഉള്ളതായി അസർ നിരീക്ഷിച്ചു. ഈ അവയവങ്ങളുടെ സാന്നിധ്യം അവിശ്വസനീയമായ ആ സാധ്യതയെക്കുറിച്ച് വെളിപ്പെടുത്തി, ആൺകൊതുകുകൾ പണ്ട് രക്തം കുടിച്ചിരുന്നു.

പിന്നെ എങ്ങിനെയാണ് ആൺകൊതുകുകൾ ഈ ശീലം ഉപേക്ഷിച്ചത് ? അതിനു കാരണമായി ഗവേഷകർ പറയുന്നത് പൂക്കൾ ഉണ്ടാകുന്ന ചെടികളുടെ കടന്നുവരവാണ്‌. പ്രത്യുത്പാദനത്തിനു അധിക ഊർജ്ജം ആവശ്യമുള്ളപ്പോഴാണ് കൊതുകുകൾ രക്തം കുടിക്കുക. എന്നാൽ ആൺകൊതുകുകൾക്ക് അതിന്റെ ആവശ്യമുണ്ടായിരുന്നില്ല. മുട്ട ഉൽപ്പാദിപ്പിക്കാൻ തങ്ങളുടെ ആവശ്യം ഇല്ലാത്തതിനാലും പൂന്തേനും ചീടികളുടെ നീരും അവരുടെ ആവശ്യങ്ങൾ നിറവേറ്റുന്നതിനാലുമാണ് ആൺകൊതുകുകൾ രക്തം മകുടിക്കുന്നത് അവസാനിപ്പിച്ചത് എന്നാണു ഗവേഷകർ പറയുന്നത്. കാലക്രമേണ പരിണാമത്തിന്റെ ഭാഗവുമായി ആൺകൊതുകുകൾക്ക് വായയുടെ ഭാഗങ്ങൾ നഷ്ടമായതിനാൽ അവയ്ക്ക് രക്തം കുടിക്കുക എന്ന പ്രക്രിയ തികച്ചും ദുഷ്കരമായി തീർന്നു.