തിരുവനന്തപുരം: മലയാള സിനിമാ മേഖലയിലെ സ്ത്രീകൾ ദുരനുഭവങ്ങൾ ഹേമ കമ്മിറ്റി റിപ്പോർട്ടിന്റെ അടിസ്ഥാനത്തിൽ സമഗ്ര അന്വേഷണം പ്രഖ്യാപിക്കണമെന്ന് ആവശ്യപ്പെട്ട് കത്ത് നൽകി പ്രതിപക്ഷ നേതാവ് വി ഡി സതീശൻ. മുഖ്യമന്ത്രി പിണറായി വിജയനും സിനിമ, സാംസ്ക്കാരിക മന്ത്രി സജി ചെറിയാനും ആണ് കത്ത് നൽകിയത്. ഇരകളുടെ മൊഴികളുടെയും സമര്പ്പിച്ച തെളിവുകളുടെയും അടിസ്ഥാനത്തില് വനിത ഐപിഎസ് ഉദ്യോഗസ്ഥയുടെ നേതൃത്വത്തില് പ്രത്യേകസംഘം രൂപീകരിച്ച് അന്വേഷണം നടത്തണമെന്നും പ്രതിപക്ഷ നേതാവ് കത്തിൽ ആവശ്യപ്പെട്ടു.(V.D. Satheesan Demands Investigation into Hema Committee Report)
നിയമ വ്യവസ്ഥയില് ക്രിമിനല് കുറ്റമെന്നത് ഒരു വ്യക്തിക്കെതിരെ മാത്രമല്ല സമൂഹത്തിന് എതിരായ കുറ്റമായാണ് കണക്കാക്കുന്നത്. അതുകൊണ്ടുതന്നെ കുറ്റവാളികള് ശിക്ഷിക്കപ്പെടണമെന്നത് നിയമവ്യവസ്ഥയുടെ ആവശ്യമാണ് എന്നും വി ഡി സതീശൻ ചൂണ്ടിക്കാട്ടി. സ്ത്രീകള്ക്കും കുട്ടികള്ക്കും എതിരായ ലൈംഗിക ചൂഷണം ഉള്പ്പെടെയുള്ള അതിക്രമങ്ങള് നടത്തുന്നവര്ക്കെതിരെ ‘സീറോ ടോളറന്സ്’ സമീപനമാണ് സര്ക്കാരില്നിന്ന് ഉണ്ടാകേണ്ടത്. പോക്സോ ഉള്പ്പെടെ ഗുരുതര ലൈംഗിക കുറ്റകൃത്യങ്ങള് വെളിപ്പെടുത്തിയുള്ള റിപ്പോര്ട്ട് ഹേമ കമ്മിറ്റി 2019-ല് സമര്പ്പിച്ചിട്ടും അന്വേഷണം നടത്താതെ റിപ്പോര്ട്ട് പൂഴ്ത്തിയ സര്ക്കാര് നടപടി നിയമ വ്യവസ്ഥയോടുള്ള വെല്ലുവിളിയാണ്.
ഇതു പോക്സോ നിയമപ്രകാരം കുറ്റകരമാണ്. പോക്സോ നിയമപ്രകാരമുള്ള കുറ്റം ചെയ്തെന്ന് അറിഞ്ഞിട്ടും മറച്ചുവയ്ക്കുകയോ റിപ്പോര്ട്ട് ചെയ്യാതിരിക്കുകയോ ചെയ്യുന്നതും ക്രിമിനല് കുറ്റമാണെന്നതു സര്ക്കാര് മറക്കരുത് എന്നും കത്തിൽ പറയുന്നു.
