ജയ്പൂർ: ദീഗ് ജില്ലയിലെ ഒരു വീട്ടിലാണ് ദാരുണമായ ഈ സംഭവം നടന്നത്. തിളച്ച പാലിലേക്ക് മൂന്ന് വയസ്സുകാരി അബദ്ധത്തിൽ വീഴുകയായിരുന്നു.
സംഭവത്തിൽ ഗുരുതരമായി പൊള്ളലേറ്റ് ചികിത്സയിൽ കഴിയുന്നതിനിടെയായിരുന്നു കുട്ടിയുടെ മരണം. സരിക എന്ന മുന്നുവയസ്സുകാരിയാണ് ബുധനാഴ്ച രാത്രിയോടെ മരണപ്പെട്ടത്.
ചൊവ്വാഴ്ച വൈകുന്നേരമായിരുന്നു മരണത്തിൽ കൊണ്ടെത്തിച്ച ദാരുണ സംഭവം നടന്നത്. പൂച്ചയെ കണ്ട് ഭയന്നോടിയ കുട്ടി അബദ്ധത്തിൽ തിളച്ച പാലിൽ വീഴുകയായിരുന്നുവെന്നാണ് ലഭിക്കുന്ന വിവരം. കുഞ്ഞിന്റെ മുത്തച്ഛൻ ഹരിനാരായണനാണ് ഈ വിവരം പറഞ്ഞത്.
നിലവിളി കേട്ട് ഓടിയെത്തിയ വീട്ടുകാർ കുട്ടിയെ ഉടൻ തന്നെ ജയ്പൂരിലുള്ള ആശുപത്രിയിൽ എത്തിക്കുകയായിരുന്നു. തുടർന്ന് ചികിത്സയിലിരിക്കെയാണ് മരണം സംഭവിച്ചത്.
ചെറിയ അശ്രദ്ധക്ക് വലിയ വില നൽകേണ്ടി വരുമെന്നും, അതാണ് തന്റെ മകളുടെ കാര്യത്തിൽ സംഭവിച്ചതെന്നും മരണപ്പെട്ട കുഞ്ഞിന്റെ പിതാവ് പറഞ്ഞു.
മാത്രമല്ല എല്ലാ കുടുംബങ്ങളും കുട്ടികളെ ശ്രദ്ധയോടെ പരിപാലിക്കണമെന്നും അദ്ദേഹം കൂട്ടിച്ചേർത്തു.
