കണ്ണൂർ: കണ്ണൂരിൽ വിവിധയിടങ്ങളിലായി അപകടം. മൂന്ന് പേർ പുഴയിൽ മുങ്ങിമരിച്ചു. പയ്യാവൂരിൽ പുഴയിൽ വീണ് പതിനാലുകാരിക്ക് ജീവൻ നഷ്ടമായി. കോയിപ്പറ വട്ടക്കുന്നേൽ വീട്ടിൽ അലീനയാണ് മരിച്ചത്.
വൈകീട്ട് നാല് മണിയോടെ സഹോദരനൊപ്പം പുഴയിൽ കുളിക്കാനെത്തിയപ്പോൾ കാൽവഴുതി വീഴുകയായിരുന്നു. നാട്ടുകാരും പൊലീസും ചേർന്ന് ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.
ദേവമാതാ സ്കൂളിലെ ഒൻപതാം ക്ലാസ് വിദ്യാർത്ഥിയാണ്. പതിവായി കുളിക്കാനെത്തുന്ന കടവിലാണ് അപകടം നടന്നത്. തളിപ്പറമ്പ് കൂവേരിയിൽ പുഴയിൽ യുവാവ് മുങ്ങി മരിച്ചു. നെല്ലിപ്പറമ്പ് സ്വദേശി ഷാഹിദ്(19) ആണ് മരിച്ചത്. സുഹൃത്തുക്കൾക്കൊപ്പം കുളിക്കാനിറങ്ങിയപ്പോഴാണ് അപകടമുണ്ടായത്.
ചൂട്ടാട് അഴിമുഖത്ത് ഒൻപതാം ക്ലാസ് വിദ്യാർത്ഥി മുങ്ങി മരിച്ചു. പുതിയങ്ങാടി സ്വദേശി ഫൈറൂസ്(14) മരിച്ചത്. നാല് കുട്ടികളാണ് ഇവിടെ ഒഴുക്കിൽപെട്ടത്. മൂന്ന് കുട്ടികളെ നാട്ടുകാർ ചേർന്ന് രക്ഷപ്പെടുത്തി. എന്നാൽ ഫൈറൂസിന്റെ ജീവൻ രക്ഷിക്കാനായില്ല.
ഇന്സ്റ്റഗ്രാമിലൂടെ സൗഹൃദം സ്ഥാപിക്കൽ, പീഡന ശേഷം സ്വർണവും പണവും കൈക്കലാക്കും; മോഡലിങ് കോറിയോഗ്രാഫര് അറസ്റ്റില്
തിരുവനന്തപുരം: വിവാഹ വാഗ്ദാനം നൽകി പെണ്കുട്ടികളെ ലൈംഗികമായി പീഡിപ്പിച്ച മോഡലിങ് കൊറിയോഗ്രഫര് അറസ്റ്റില്. കോഴിക്കോട് കൂടരഞ്ഞി മാര്ക്കറ്റിനു സമീപം പാലകണ്ണി അസീസിന്റെ മകന് ഫാഹിദി (27) നെയാണ് അറസ്റ്റ് ചെയ്തത്.
ടെക്നോപാര്ക്കിലെ ഐടി ജീവനക്കാരിയുടെ പരാതിയിലാണ് അറസ്റ്റ്. പെണ്കുട്ടികളെ പലയിടത്ത് എത്തിച്ച് പീഡന ശേഷം അവരുടെ പക്കല് നിന്നും പണവും സ്വര്ണാഭരണങ്ങളും തട്ടിയെടുക്കുകയാണ് ഇയാളുടെ പതിവ്.
ഇന്സ്റ്റഗ്രാമില് നിരവധി ഫോളോവേഴ്സ് ഉള്ളയാളാണ് പ്രതി. അതു വഴിയാണ് പെണ്കുട്ടികളെ പരിചയപ്പെടുകയും വിവാഹം കഴിക്കാം എന്ന പേരില് കൊണ്ടുപോയി പീഡിപ്പിക്കുകയും ചെയ്തതെന്ന് പൊലീസ് വ്യക്തമാക്കി.
പ്രതിയുടെ ഫോണില് നിന്ന് തെളിവുകള് ലഭിച്ചുവെന്നും പൊലീസ് അറിയിച്ചു.കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
