ആഗോള സാമ്പത്തിക സ്ഥിതി അനിശ്ചിതത്വത്തിലാണെങ്കിലും നടപ്പ് സാമ്പത്തിക വര്‍ഷം രാജ്യം 6.5-7 ശതമാനം വളര്‍ച്ച കൈവരിക്കുമെന്ന് സാമ്പത്തിക സര്‍വെ. 2023-24 സാമ്പത്തിക വര്‍ഷം ഐടി മേഖലയില്‍ നിയമനങ്ങള്‍ കാര്യമായി കുറഞ്ഞതായും നടപ്പ് വര്‍ഷം കൂടുതല്‍ തൊഴില്‍ നഷ്ടം ഉണ്ടാകാന്‍ സാധ്യതയില്ലെന്നും സര്‍വെയി പറയുന്നു. (The country will grow by 6.5-7 percent in the current financial year; These areas are supported)

നിലവിലെ ജിഡിപി മഹാമാരിക്ക് മുമ്പുള്ള സാമ്പത്തിക വര്‍ഷത്തേതിന് അടുത്താണ്. 2023-24 സാമ്പത്തിക വര്‍ഷം രാജ്യം മികച്ച നിലയിലായിരുന്നു. ചരക്കുകളുടെയും സേവനങ്ങളുടെയും കയറ്റുമതിയില്‍ ഈ വര്‍ഷം ഉയര്‍ച്ചക്ക് സാധ്യതയുണ്ടെന്നും സര്‍വെ വിലയിരുത്തുന്നു.

മികച്ച മണ്‍സൂണ്‍ പ്രവചനവും തെക്കുപടിഞ്ഞാറന്‍ മണ്‍സൂണിന്റെ തൃപ്തികരമായ വ്യാപനവും കാര്‍ഷിക മേഖലക്ക് ഗുണകരമാകുന്നതിലൂടെ ഗ്രാമീണ ആവശ്യകതയില്‍ വര്‍ധനവുണ്ടാകും.

ആഗോള തലത്തിലുള്ള സാധ്യതകള്‍ പ്രയോജനപ്പെടുത്തിയതിനാല്‍ സാമ്പത്തിക വിപണികള്‍ പുതിയ ഉയരങ്ങള്‍ കീഴടക്കിയതായും സര്‍വെ ചൂണ്ടിക്കാണിക്കുന്നു. അതേസമയം, മറ്റ് രാജ്യങ്ങളില്‍നിന്നുള്ള ചെലവുകുറഞ്ഞ ഇറക്കുമതി സാധ്യത സ്വകാര്യ മൂലധന വരവിനെ ബാധിച്ചേക്കാമന്നെും ജാഗ്രത വേണമെന്നും സര്‍വെയില്‍ ചൂണ്ടിക്കാണിച്ചിട്ടുണ്ട്.