തൃശൂര്: ആറ് ട്രെയിനുകളില് പുതിയ കോച്ചുകള് താല്ക്കാലികമായി അനുവദിച്ചതായി പാലക്കാട് റെയില്വേ ഡിവിഷന്. യാത്രാ തിരക്ക് കൂടിയ സാഹചര്യത്തിലാണ് അധിക കോച്ചുകൾ അനുവദിച്ചത്. തിരുവനന്തപുരം- കോഴിക്കോട് ജനശതാബ്ദി എക്സ്പ്രസിലും കോഴിക്കോട്- തിരുവനന്തപുരം ജനശതാബ്ദി എക്സ്പ്രസിലുമാണ് കോച്ചുകളുടെ എണ്ണം കൂട്ടിയത്.
ഇന്നുമുതല് 17 വരെ ഓരോ ചെയര്കാര് കോച്ചുകള് ആണ് അനുവദിച്ചിട്ടുള്ളത്. തിരുവനന്തപുരം- മംഗളൂരു മലബാര് എക്സ്പ്രസിലും, മംഗളൂരു- തിരുവനന്തപുരം മലബാര് എക്സ്പ്രസിലും നാളെ മുതല് 17 വരെ ഓരോ സ്ലീപ്പര് കോച്ചുകള് കൂടി അനുവദിച്ചിട്ടുണ്ട്. തിരുവനന്തപുരം- മംഗളൂരു മാവേലി എക്സ്പ്രസില് ഇന്ന് ഒരു സ്ലീപ്പര് കോച്ചും അനുവദിച്ചു.
അതേസമയം ആറ്റുകാൽ പൊങ്കാലയോടനുബന്ധിച്ച് റെയിൽവേ സ്പെഷ്യൽ ട്രെയിൻ സർവീസുകളും അധിക സ്റ്റോപ്പുകളും അനുവദിച്ചു. ചില സർവീസുകളുടെ സമയം പുനഃക്രമീകരിച്ചതായും റെയിൽവേ അറിയിച്ചു. മാർച്ച് 13ന് പുലർച്ചെ 1.30ന് എറണാകുളം ജങ്ഷനിൽ നിന്നു സർവീസ് ആരംഭിക്കുന്ന സ്പെഷൽ ട്രെയിൻ (06077) രാവിലെ 6.30ന് തിരുവനന്തപുരം സെൻട്രലിൽ എത്തും. തിരുവനന്തപുരത്തു നിന്നു 13ന് പകൽ 2.15നു പുറപ്പെടുന്ന സ്പെഷൽ ട്രെയിൻ (06078) രാത്രി 7.40ന് എറണാകുളത്ത് തിരിച്ചെത്തും.
