ബീച്ചിൽ ജൂതരുടെ ആഘോഷം നടക്കുന്നതിനിടെ തോക്കുധാരികൾ; രണ്ടു തവണ വെടിയേറ്റിട്ടും അക്രമിയെ കീഴടക്കി അഹമ്മദ് അൽ അഹമ്മദ്

ബീച്ചിൽ ജൂതരുടെ ആഘോഷം നടക്കുന്നതിനിടെ തോക്കുധാരികൾ; രണ്ടു തവണ വെടിയേറ്റിട്ടും അക്രമിയെ കീഴടക്കി അഹമ്മദ് അൽ അഹമ്മദ്

സിഡ്നി: സിഡ്നിയിലെ ബോണ്ടി ബീച്ചിൽ ജൂത ഫെസ്റ്റിവലിനിടെ ഉണ്ടായ വെടിവയ്പ്പിൽ മരിച്ചവരുടെ എണ്ണം 12 ആയി.

ഇന്നലെ വൈകിട്ട് ആറുമണിയോടെ ബീച്ചിൽ ജൂതരുടെ ആഘോഷ പരിപാടികൾ നടക്കുന്നതിനിടെയാണ് ആക്രമണം ഉണ്ടായത്.

ഒരു വാഹനത്തിലെത്തിയ രണ്ട് തോക്കുധാരികൾ ജനക്കൂട്ടത്തെ ലക്ഷ്യമിട്ട് തുരുതുരാ വെടിയുതിർക്കുകയായിരുന്നു.

സംഭവത്തിനിടെ ധീരമായ ഇടപെടലിലൂടെ ശ്രദ്ധേയനായ വ്യക്തിയെ പിന്നീട് തിരിച്ചറിഞ്ഞു.

സിഡ്നിയിൽ പഴക്കച്ചവടം നടത്തുന്ന അഹമ്മദ് അൽ അഹമ്മദ് (43) ആണ് ആയുധമില്ലാതെ തന്നെ ആക്രമിയെ നേരിട്ടത്.

ആക്രമണത്തിനിടെ അഹമ്മദിന് രണ്ട് വെടിയേറ്റതായും, നിലവിൽ അദ്ദേഹം സിഡ്നിയിലെ ആശുപത്രിയിൽ ചികിത്സയിൽ കഴിയുന്നതായും അധികൃതർ അറിയിച്ചു.

ആക്രമണം നടക്കുമ്പോൾ, തോക്കുധാരിയെ നേരിടാൻ ആയുധമില്ലാതെ ഒരാൾ മുന്നോട്ടുവരുന്ന ദൃശ്യങ്ങൾ സാമൂഹികമാധ്യമങ്ങളിൽ വ്യാപകമായി പ്രചരിച്ചിരുന്നു.

തുടർന്ന് ആ വ്യക്തി അഹമ്മദാണെന്ന് സ്ഥിരീകരിച്ചു. കാറുകളുടെ മറവിൽ നിന്ന ശേഷം ആക്രമിയിലേക്കു ഓടിച്ചെത്തിയ അഹമ്മദ്, ഇയാളെ കഴുത്തിൽ പിടിച്ച് തള്ളിയിടുകയും തോക്ക് പിടിച്ചെടുക്കുകയും ചെയ്തു. പിന്നീട് അതേ ആയുധം ഉപയോഗിച്ച് ആക്രമിയെ നിയന്ത്രണത്തിലാക്കി.

അഹമ്മദിന്റെ സമയോചിതവും ധീരവുമായ ഇടപെടലാണ് അക്രമികളിൽ ഒരാളെ നിരായുധനാക്കാനും വലിയൊരു ദുരന്തം ഒഴിവാക്കാനും സഹായിച്ചതെന്ന് പൊലീസ് വ്യക്തമാക്കി.

‘സിഡ്നി വെടിവയ്പ്പിലെ ഹീറോ’ എന്ന നിലയിൽ അഹമ്മദിന് സമൂഹമാധ്യമങ്ങളിലും പൊതുസമൂഹത്തിലും വലിയ അഭിനന്ദനമാണ് ലഭിക്കുന്നത്.

അതേസമയം, അക്രമികളിൽ ഒരാളെ തിരിച്ചറിഞ്ഞിട്ടുണ്ട്. നവീദ് അക്രം എന്ന പേരിലുള്ള ഇയാളുടെ സിഡ്നിയിലെ ബോണിറിഗ്ഗിലുള്ള വീട്ടിൽ പൊലീസ് പരിശോധന തുടരുകയാണ്.

English Summary:

The death toll in the shooting during a Jewish festival at Bondi Beach in Sydney has risen to twelve. The attack occurred around 6 pm when two gunmen opened fire on the crowd after arriving in a vehicle. Ahmed Al Ahmed, a 43-year-old fruit vendor, bravely confronted one of the attackers unarmed, managed to disarm him, and prevented further casualties. Ahmed was injured and is currently receiving treatment. Police have identified one suspect and are conducting searches at his residence.

sydney-bondi-beach-jewish-festival-shooting-hero-ahmed

Sydney, Bondi Beach, Shooting, Jewish Festival, Ahmed Al Ahmed, Hero, World News