മലപ്പുറം: നിലമ്പൂര് ഉപതെരഞ്ഞെടുപ്പില് എല്ഡിഎഫ്, എൻ.ഡി.എ, തൃണമൂല് കോണ്ഗ്രസ് സ്ഥാനാര്ത്ഥികള് ഇന്ന് നാമനിര്ദേശ പത്രിക സമര്പ്പിക്കും.
രാവിലെ 10.30 നാണ് തൃണമൂല് കോണ്ഗ്രസ് സ്ഥാനാര്ത്ഥി പി വി അന്വര് നാമനിര്ദേശ പത്രിക സമര്പ്പിക്കുന്നത്.
നിലമ്പൂര് തഹസില്ദാര് മുമ്പാകെയാണ് സ്ഥാനാർഥികൾ പത്രികാ സമര്പ്പണം നടത്തുന്നത്.
രാവിലെ 09:30 ന് ചന്തക്കുന്ന് ബസ് സ്റ്റാന്ഡ് പരിസരത്ത് നിന്നും പ്രകടനമായി താലൂക്ക് ഓഫീസില് എത്തി നാമനിര്ദ്ദേശപത്രിക സമര്പ്പിക്കാനാണ് തീരുമാനിച്ചിട്ടുള്ളതെന്ന് പി വി അന്വര് പറഞ്ഞു.
രാവിലെ 11 മണിയോടെ എൽ ഡി എഫ് സ്ഥാനാര്ത്ഥി എം സ്വരാജ് നാമനിര്ദേശ പത്രിക സമര്പ്പിക്കും. പ്രമുഖ ഇടതു നേതാക്കള് പത്രികാസമര്പ്പണ വേളയില് സംബന്ധിക്കും.
സ്വരാജിന്റെ തെരഞ്ഞെടുപ്പ് കണ്വെന്ഷന് ഇന്നലെ മുഖ്യമന്ത്രി പിണറായി വിജയന് ഉദ്ഘാടനം ചെയ്തിരുന്നു.
ഇപ്പോള് ഇവിടെ തെരഞ്ഞെടുപ്പ് വേണ്ടി വന്നത് ഏറ്റവും വലിയ വഞ്ചന കാണിച്ചത് കൊണ്ടാണെന്ന് മുഖ്യമന്ത്രി അഭിപ്രായപ്പെട്ടിരുന്നു.
എം. സ്വരാജിന്റെ സ്ഥാനാര്ഥിത്വത്തിന് മണ്ഡലത്തില് മാത്രമല്ല സംസ്ഥാനത്തൊട്ടാകെ വലിയ സ്വീകാര്യതയാണ് ലഭിച്ചത്.
എല്ഡിഎഫ് സര്ക്കാരിന്റെ പ്രവര്ത്തനം പൊതുവെ നാട് സ്വാഗതം ചെയ്തുവെന്ന് മുഖ്യമന്ത്രി പറഞ്ഞു.
ഇതുവരെയുള്ള പൊതുപ്രവര്ത്തനത്തിലൂടെ ക്ലീനായ ഇമേജ് നിലനിര്ത്തുന്ന നേതാവാണ് സ്വരാജ് എന്നും ആരുടെ മുന്നിലും തല ഉയര്ത്തി വോട്ട് ചോദിക്കാന് അദ്ദേഹത്തിന് സാധിക്കുമെന്ന് മുഖ്യമന്ത്രി പറഞ്ഞു.
ബിജെപി സ്ഥാനാര്ത്ഥി മോഹന് ജോര്ജ് ഇന്ന് ഉച്ചയ്ക്ക് ഒന്നരയ്ക്ക് നാമനിര്ദേശ പത്രിക സമര്പ്പിക്കും.
എന്ഡിഎ പ്രവര്ത്തകരുടെ അകമ്പടിയോടെയാകും മോഹന് ജോര്ജ് നിലമ്പൂര് തഹസില്ദാര് മുമ്പാകെ നാമനിര്ദേശ പത്രിക സമര്പ്പിക്കുന്നത്.
മുന് കേരള കോണ്ഗ്രസ് നേതാവായ മോഹന് ജോര്ജ് ഇന്നലെയാണ് ഔദ്യോഗികമായി ബിജെപി അംഗത്വം സ്വീകരിച്ചത്.
മലപ്പുറം ചുങ്കത്തറ സ്വദേശിയായ മോഹന് ജോര്ജ് അഭിഭാഷകനാണ്.
