തിരുവനന്തപുരം: തിരുവനന്തപുരം നഗരത്തിൽ ടാക്സി സർവീസിന്റെ പേരിൽ കള്ളടാക്സി ഓടുന്നതായി പരാതി.
ടാക്സി രജിസ്ട്രേഷന് ഇല്ലാതെ തന്നെ ടാക്സി പോലെ വാഹനം വാടകയ്ക്ക് ഓടിക്കുന്നതാണ് കള്ളടാക്സി.
വെബ്സൈറ്റിലടക്കം ടാക്സി സർവീസ് എന്ന് പേരും ഫോൺ നമ്പറും നൽകി സ്വകാര്യ വാഹനം ഓടിക്കുന്നതിനെതിരെ പനവൂർ കരിക്കുഴി സ്വദേശി വിജിത്ത് ആണ് മോട്ടോർ വാഹന വകുപ്പിൽ പരാതി നൽകിയത്.
വിനോദയാത്രയുടെ ഭാഗമായി ടാക്സി സർവീസിൽ വിളിച്ച് വാഹനം ബുക്ക് ചെയ്തുതു.
എന്നാൽ നഗരത്തിൽ പ്രവർത്തിക്കുന്ന കേരള വിങ്സ് എന്ന സ്ഥാപനം സ്വകാര്യ രജിസ്ട്രേഷനുള്ള വാഹനമാണ് യാത്രയ്ക്കായി നൽകിയതെന്ന് വിജിത്ത് പറയുന്നു.
ടാക്സിയുമായി ജീവിക്കാൻ ഇറങ്ങുന്ന പാവങ്ങൾക്ക് ഇത്തരം കള്ള ടാക്സികൾ ഭീഷണിയാണെന്നും ഇത്തരം വാഹനങ്ങളിൽ സഞ്ചരിക്കുന്ന യാത്രക്കാർക്ക് അപകടമുണ്ടായാൽ ഇൻഷുറൻസ് ക്ലൈം പോലും ലഭിക്കാത്ത സാഹചര്യം ചൂണ്ടിക്കാട്ടിയാണ് പരാതി നൽകിയതെന്നും വിജിത്ത് ചൂണ്ടിക്കാട്ടുന്നു.
ഇതേ വെബ്സൈറ്റിൽ ബുക്ക് ചെയ്താൽ ഓടാനെത്തുന്ന പത്തോളം കാറുകൾക്ക് ടാക്സി പെർമിറ്റ് ഇല്ലെന്ന് മനസിലാക്കിയതോടെ ആണ് വിജിത് പരാതി നൽകിയത്.
കള്ള ടാക്സിയിൽ സർവീസ് ബുക്ക് ചെയ്ത് തിരുവനന്തപുരം റെയിൽവെ സ്റ്റേഷനിലെത്തി മോട്ടോർ വാഹനവകുപ്പ് ഉദ്യോഗസ്ഥരെ വിവരം അറിയിച്ച് നേരിട്ട് വാഹനം കസ്റ്റഡിയിലെടുപ്പിക്കുകയായിരുന്നു.
സംഭവത്തിൽ പരിശോധിച്ച് നടപടിയെടുക്കുമെന്ന് മോട്ടോർ വാഹനവകുപ്പ് ഉദ്യോഗസ്ഥർ പറയുന്നു
