ആദ്യകാഴ്ചയിൽത്തന്നെ ആരുടേയും മനം കവരും. ഒരെണ്ണം എന്തായാലും വാങ്ങണം എന്നു തോന്നിപ്പിക്കുന്ന വടിവൊത്ത വാഹനം. മുന്നഴകും പിന്നഴകും കണ്ടാൽ കണ്ണെടുക്കില്ല. അകത്തേക്ക് കയറിയാൽ അന്തംവിടും. അത്രക്ക് പ്രീമിയം ലുക്കാണ്. പറഞ്ഞു വരുന്നത് A5 സെലക്ട് എന്നു പേരിട്ടിരിക്കുന്ന മഹീന്ദ്ര XUV700-യുടെ പുതിയ മോഡലിനെ പറ്റിയാണ്. കാഴ്ചയിൽ മാത്രമല്ല കരുത്തിലും കേമനാണ് പുതിയ മോഡൽ. അത്യുഗ്രൻ സേഫ്റ്റിയാണ് ഒരുക്കിയിരിക്കുന്നത്. താങ്ങാനാവുന്ന വിലയും. കിടിലോൽകിടിലൻ ഫീച്ചറുകളുമായി എത്തുന്ന പുത്തൻ മോഡൽ വാങ്ങാൻ ആളുകൾ ഇരച്ചെത്തുമെന്നുറപ്പാണ്.
മാനുവൽ വേണ്ടവർക്ക് മാനുവൽ, ഓട്ടോമാറ്റിക് വേണ്ടവർക്ക് ഓട്ടോമാറ്റിക്. ഡീസൽ വേണ്ടവർക്ക് ഡീസൽ, പെട്രോൾ വേണ്ടവർക്ക് അതും. അങ്ങനെ വാഹനപ്രേമികൾക്ക് എന്തുകൊണ്ടും ഉതകുന്ന തരത്തിലുള്ള നിർമാണം. മാനുവൽ പതിപ്പിനേക്കാൾ 1.60 ലക്ഷം രൂപ മാത്രം അധികം നൽകിയാൽ ഓട്ടോമാറ്റിക് ലഭിക്കും.
XUV700 AX5 സെലക്ട് വേരിയൻ്റിൽ വയർലെസ് ആൻഡ്രോയിഡ് ഓട്ടോ, ആപ്പിൾ കാർപ്ലേ, സൗണ്ട് സ്റ്റേജിംഗ് ഉള്ള ആറ് സ്പീക്കറുകൾ, ഇൻഫോടെയ്ൻമെൻ്റ് സ്ക്രീനിൽ ആൻഡ്രിനോക്സ് സിസ്റ്റം, ആമസോൺ അലക്‌സ ബിൽറ്റ് ഇൻ, പുഷ് സ്റ്റാർട്ട്/സ്റ്റോപ്പ് ബട്ടൺ, ഇലക്ട്രിക്കലി അഡ്ജസ്റ്റ് ചെയ്യാവുന്ന ORVM, എൽഇഡി ഡിആർഎല്ലുകൾ, ഫുൾ സൈസ് വീൽ കവർ തുടങ്ങി ഫീച്ചറുകളുടെ നീണ്ട നിര തന്നെയുണ്ട്.
ഏറ്റവും വലിയ ഹൈലൈറ്റ് മറ്റൊന്നാണ്. സ്കൈറൂഫ് എന്ന് വിളിക്കുന്ന ഡ്യുവൽ പാനൽ പനോരമിക് സൺറൂഫ്. അതി മനോഹരമായ ഈ ഫീച്ചർ ഒരുക്കിയിട്ടും മറ്റ് എതിരാളികളെ അപേക്ഷിച്ച് വില നന്നേ കുറവാണെന്നതാണ് മറ്റൊരു ആകർഷണം.
എഞ്ചിൻ, പെർഫോമൻസ് പിന്നെ പ്രത്യേകിച്ച് പറയേണ്ട കാര്യമില്ല. കരുത്തനാണ്. തോൽപ്പിക്കുക അസാധ്യം. പെട്രോൾ പതിപ്പിൽ 197 bhp പവറിൽ 380 Nm torque നൽകുന്ന 2.0 ലിറ്റർ ടർബോ പെട്രോൾ യൂണിറ്റാണ് ഉപയോഗിച്ചിരിക്കുന്നത്. 2.2 ലിറ്റർ ഡീസൽ എഞ്ചിൻ രണ്ട് വ്യത്യസ്ത പവർ ഔട്ട്‌പുട്ടുകളിലാണ് ഒരുക്കിയിരിക്കുന്നത്. ബേസ് മോഡലുകളിൽ 153 bhp കരുത്തിൽ 360 Nm torque ഉത്പാദിപ്പിക്കുമ്പോൾ 182 bhp പവറിൽ 450 Nm torque ആണ് വികസിപ്പിക്കുന്നത്.6 സ്പീഡ് മാനുവൽ, ടോർക്ക് കൺവെർട്ടർ ഓട്ടോമാറ്റിക് ഗിയർബോക്‌സ് ഓപ്ഷനുകളാണ് രണ്ട് എഞ്ചിനിലും തെരഞ്ഞെടുക്കാനാവുന്നത്.
AX5 സെലക്ട് വേരിയന്റ് ലക്ഷ്യമിടുന്നത് ടോപ്പ് എൻഡ് ഫീച്ചറുകളിൽ ചിലത് മാത്രം കൊതിക്കുന്ന ടോപ്പ് വേരിയന്റ് വാങ്ങാൻ ബജറ്റ് ഇല്ലാത്ത ആളുകളെയാണ്. 7 സീറ്റർ എസ്‌യുവി സെഗ്മെന്റിലെ പ്രധാന എതിരാളികളുമായി എങ്ങനെ താരതമ്യം ചെയ്‌താലും XUV700 A5 സെലക്ട് ഒരുപടി മുന്നിലായിരിക്കും.
A5 സെലക്ട് എന്നു പേരിട്ടിരിക്കുന്ന മഹീന്ദ്ര XUV700-യുടെ ഈ വേരിയന്റിന് 16.89 ലക്ഷം രൂപയാണ് എക്സ്ഷോറൂം വില. AX5 സെവൻ സീറ്റർ ട്രിമ്മിനെ അടിസ്ഥാനമാക്കിയാണ് നിർമ്മാണം.
താങ്ങാനാവുന്ന വിലയിൽ പുതിയ വേരിയന്റ് എത്തിയതോടെ ബുക്കിംഗുകളുടെ എണ്ണം ഉയരുമെന്ന് ഉറപ്പായി. 2030-ഓടെ 16 പുതിയ എസ്‌യുവികൾ പുറത്തിറക്കാനുള്ള പദ്ധതിയുമായാണ് മഹീന്ദ്ര ആൻഡ് മഹീന്ദ്ര മുമ്പോട്ടു പോവുന്നത്. ഇതിൽ 7 ഇൻ്റണൽ കംബഷൻ എഞ്ചിൻ മോഡലുകൾ, 7 ഇവികൾ, 3 ഫെയ്‌സ്‌ലിഫ്റ്റുകൾ എന്നിവയാണ് ഉൾപ്പെടുന്നത്.
Read Also:മദ്യോപയോഗം കൂടിയാൽ വിശപ്പ് കുറയും, കാൻസർ സാധ്യത കൂടും; മദ്യപാനികൾക്ക് മുന്നറിയിപ്പ് നൽകി ഐസിഎംആർ
