പാലാ പുലിയന്നൂർ ബൈപ്പാസ് ജംഗ്ഷനിൽ വാഹന അപകടത്തിൽ കോളേജ് വിദ്യാർഥിക്ക് ദാരുണാന്ത്യം. ഇന്ന് രാവിലെയാണ് സംഭവം. അപകടത്തിൽ പാലാ സെന്റ് തോമസ് കോളേജിലെ രണ്ടാം വർഷ ബിരുദാനന്തര വിദ്യാർത്ഥി വള്ളിയപ്പള്ളി സ്വദേശി അമൽ ഷാജിയാണ് മരിച്ചത്. അമൽ സഞ്ചരിച്ചിരുന്ന ബൈക്ക് കാറിന്റെ പിറകിലടിച്ച് വാഹനത്തിന്റെ നിയന്ത്രണം വിടുകയായിരുന്നു. വാഹനത്തിൽ നിന്നും തെറിച്ച് റോഡിലേക്ക് വീണ അമലിന്റെ തലയിലൂടെ എതിർദിശയിൽ വന്ന ടൂറിസ്റ്റ് ബസ് കയറിയിറങ്ങി. ഉടൻതന്നെ സമീപത്തെ മരിയൻ ഹോസ്പിറ്റലിൽ എത്തിച്ചെങ്കിലും ജീവൻ രക്ഷിക്കാനായില്ല. പുലിയന്നൂർ ബൈപ്പാസ് ജംഗ്ഷനിൽ അപകടങ്ങൾ തുടർക്കഥയാവുകയാണെന്ന് നാട്ടുകാർ ആരോപിക്കുന്നു. അശാസ്ത്രീയമായ പാത നിർമാണമാണ് ഇവരുടെ അപകടങ്ങൾക്ക് കാരണമാകുന്നത് എന്നാണ് ആരോപണം. ഒരാഴ്ചയ്ക്കിടെ ഇവിടെ നാലോളം അപകടങ്ങളാണ് ഉണ്ടായത്. നിരന്തരം അറിയിച്ചിട്ടും യാതൊരുവിധ നടപടിയും ബന്ധപ്പെട്ടവരുടെ ഭാഗത്തുനിന്നും ഉണ്ടാവുന്നില്ലെന്നു നാട്ടുകാർ ആരോപിക്കുന്നു
