കുവൈത്തിലേക്ക് മരുന്നുകൾ കൈവശം കൊണ്ടുവരുന്നതുമായി ബന്ധപ്പെട്ട് കർശന നിബന്ധനകൾ
കുവൈത്ത് സിറ്റി: കുവൈത്തിലേക്ക് യാത്ര ചെയ്യുന്നവരുടെ ശ്രദ്ധയ്ക്ക്—വിദേശത്ത് നിന്ന് മരുന്നുകൾ കൈവശം കൊണ്ടുവരുന്നതുമായി ബന്ധപ്പെട്ട് പുതിയ കർശന നിബന്ധനകൾ പ്രഖ്യാപിച്ചു.
നാർക്കോട്ടിക്, സൈക്കോട്രോപിക് വിഭാഗത്തിൽപ്പെടുന്ന മരുന്നുകളാണ് പുതിയ നിയന്ത്രണങ്ങളുടെ പരിധിയിൽ ഉൾപ്പെടുത്തിയിരിക്കുന്നത്.
ആരോഗ്യ മന്ത്രാലയം 2025ൽ പുറത്തിറക്കിയ 202-ാം നമ്പർ തീരുമാനത്തിന്റെ അടിസ്ഥാനത്തിലാണ് നടപടി. ജനറൽ അഡ്മിനിസ്ട്രേഷൻ ഓഫ് കസ്റ്റംസ് ആണ് ഇതുസംബന്ധിച്ച പുതിയ ഉത്തരവ് പുറത്തിറക്കിയത്.
പുതിയ ഉത്തരവ് പ്രകാരം, ഷെഡ്യൂൾ 1 വിഭാഗത്തിൽ ഉൾപ്പെടുന്ന ശക്തമായ വേദനസംഹാരികളും മറ്റ് നിയന്ത്രിത മരുന്നുകളും യാത്രക്കാർക്ക് പരമാവധി 15 ദിവസത്തെ ചികിത്സയ്ക്ക് ആവശ്യമായ അളവിൽ മാത്രമേ കുവൈത്തിലേക്ക് കൊണ്ടുവരാൻ അനുവാദമുള്ളൂ. ഇതിൽ ലഹരിസാധ്യതയുള്ള മരുന്നുകളും ഉൾപ്പെടും.
അതേസമയം, മാനസികാരോഗ്യവുമായി ബന്ധപ്പെട്ടതോ അല്ലാത്തതോ ആയ സൈക്കോട്രോപിക് മരുന്നുകൾ—ഷെഡ്യൂൾ 3, 4, 30 വിഭാഗങ്ങളിൽ ഉൾപ്പെടുന്നവ—പരമാവധി ഒരു മാസത്തെ ചികിത്സയ്ക്ക് ആവശ്യമായ അളവിൽ വരെ കൈവശം വെക്കാൻ അനുവാദമുണ്ടാകും.
എന്നാൽ, ഇതിന് നിർബന്ധമായും ബന്ധപ്പെട്ട രേഖകൾ കസ്റ്റംസ് ഉദ്യോഗസ്ഥർക്ക് ഹാജരാക്കേണ്ടതുണ്ടെന്ന് അധികൃതർ വ്യക്തമാക്കി.
യാത്രക്കാർ കൈവശം വെക്കുന്ന മരുന്നുകൾക്ക് ഒറിജിനൽ മെഡിക്കൽ റിപ്പോർട്ടോ, ചികിത്സിക്കുന്ന ഡോക്ടർ നൽകിയ പ്രിസ്ക്രിപ്ഷനോ ഉണ്ടായിരിക്കണം. ഈ രേഖകൾ സാധുവായിരിക്കണം.
വിദേശത്തുള്ള ഔദ്യോഗിക കുവൈത്ത് അതോറിറ്റികൾ—കുവൈത്ത് എംബസി അല്ലെങ്കിൽ കോൺസുലേറ്റ്—വഴി രേഖാമൂലമോ ഇലക്ട്രോണിക് രീതിയിലോ സാക്ഷ്യപ്പെടുത്തിയതായിരിക്കണം.
രേഖകൾ കൃത്യമായി സാക്ഷ്യപ്പെടുത്തിയിട്ടില്ലെങ്കിൽ, യാത്രക്കാരുടെ കൈവശമുള്ള മരുന്നുകൾ കസ്റ്റംസ് വിട്ടുനൽകില്ലെന്ന് ജനറൽ അഡ്മിനിസ്ട്രേഷൻ ഓഫ് കസ്റ്റംസ് മുന്നറിയിപ്പ് നൽകി.
ആവശ്യമായ നടപടിക്രമങ്ങൾ പൂർത്തിയാക്കുന്നതുവരെ ഇത്തരം മരുന്നുകൾ കസ്റ്റംസ് അധികൃതർ തടഞ്ഞുവെക്കുമെന്നും അറിയിച്ചു. നിയമലംഘനം കണ്ടെത്തിയാൽ തുടർനടപടികൾ സ്വീകരിക്കുമെന്നും അധികൃതർ വ്യക്തമാക്കി.
പുതിയ നിബന്ധനകൾ നടപ്പാക്കുന്നതിലൂടെ ലഹരി ദുരുപയോഗവും അനധികൃത മരുന്ന് കടത്തും തടയുകയാണ് ലക്ഷ്യമെന്ന് കസ്റ്റംസ് വിഭാഗം അറിയിച്ചു.
അതിനാൽ കുവൈത്തിലേക്ക് യാത്ര ചെയ്യുന്നവർ, പ്രത്യേകിച്ച് സ്ഥിരമായി മരുന്നുകൾ ഉപയോഗിക്കുന്നവർ, യാത്രയ്ക്ക് മുമ്പ് എല്ലാ രേഖകളും ശരിയായ രീതിയിൽ സാക്ഷ്യപ്പെടുത്തിയിട്ടുണ്ടെന്ന് ഉറപ്പാക്കണമെന്ന് അധികൃതർ അഭ്യർത്ഥിച്ചു.
